PETARA, ANTU!• Kuasa Mistik Antu:Sitan, Jin, Iblis

KAMPUNG JERUNG… Enda tau nunu tauka manduk utai ti enda manah bau dalam kampung ti baka tu.

Tusun Ke-53
BEPELASARKA penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: i. Kuasa mistik Petara (God, Almighty, Tuhan) ii. Kuasa mistik Bunsu Petara (Dewa, Diety) iii. Kuasa mistik Antu [Sitan, Jin, Iblis]. Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu.

PENTI PEMALI

Minggu tu aku mai pemacha mansik pasal kuasa mistik Antu ti bekaul enggau penti pemali dalam jalai pengidup bansa Iban. Penti pemali tu endang amai bisi ‘exist, wujud” dalam jalai pengidup tetiap bansa di serata dunya tu. Penti pemali mega bisi disebut dalam bidang penemu Sains Sosial tauka Sains Spiritual. Dalam jalai pengidup kitai Iban ti agi megai pengarap tauka agama Adat, penti pemali tu enda tau enggau kitai main-main. Iya ukai pekara ti ulih dikelikuhka kita ngena chara penemu diri empu aja laban iya bisi kaul enggau kuasa mistik Antu tauka Bunsu Petara (Dewa) lalu dikemendar ‘diizin’ Petara (God Almighty, Tuhan).

Nitihka penemu Sains Spiritual, penti pemali mai reti utai ti enda tau dikereja sebarang mensia bepelasarka pengarap tauka agama laban enti utai nya dikereja iya tau ngenataika penusah tauka ukum ari kuasa dunya mistik ‘dunya ghaib’ Antu tauka Bunsu Petara. Ambi ke chunto, penti pemali maya kitai mensia tama ke dalam kampung: enda tau nunu budu, belachan tauka utai ti bebau . Enti utai nya dikereja kitai, kuasa mistik Antu ‘makluk halus alam ghaib’ deka meri timbal ti tau ngenataika penusah ngagai kitai ti nunu utai nya.

Tentu kitai Iban kala ninga pasal orang ti mai telu manuk ke dalam kampung; lebuh deka manduk tauka makai utai nya, iya tau bebali nyadi telu matu bau tauka nadai isi. Utai ti nyelai baka nya disebut ‘latung’ laban iya nyelai tang amai nyadi; ‘pelik tetapi benar’.

Nya mih nunjukka kuasa mistik Antu ‘alam ghaib’ ulih ngachau pengidup kitai mensia enti kitai ngelanggar penti pemali sida sereta sumbung lalu enda bebasaka sida Antu ti endang amai bisi dalam babas kampung nya. Maya tama babas kampung jerung kitai mensia enda tau ragak, bejaku kelalu inggar tauka bejaku changka enggaika utai ti disebut kitai nya tau ngachau pengelikun tauka medis ati sida Antu ti endang amai bisi meratika ulah kitai mensia; taja kitai enda ulih meda sida.

Semina mensia ti bisi ngembuan “Sixth & Seventh Sense” aja ulih tepedaka sida ‘makhluk halus’ nya. Mayuh mega penti pemali dalam babsa kampung jerung ti bukai enda alah sebut baka: enda tau ngensung, enda tau ngangau, enda tau ngambi utai ti nadai orang empu dalam babas, enggai ti bukai. Pia mega sebedau tama babas kampung ti jarang digusung mensia, kitai patut besampi minta ngagai Petara (God Almighty) tauka Bunsu Petara (Dewa) minta diri empu dijaga ari Antu ‘alam ghaib.”

PENTI NYA ‘ TABOO’

Nitihka penemu Sains Sosial, penti pemali reti nya utai ti enda tau dikereja ‘ taboo’ ngagai mayuh macham pekara ti tau mai penusah dalam aktiviti mensia, adat ti kudus tauka pemali ti bepelasarka ulah moral sereta agama. Orang ti ngelanggar penti pemali deka dikutuk mensia mayuh lalu diukum nitihka adat tauka undang-undang mensia dunya. Sekeda pemansik Sosial-psikologi madah, penti pemali dalam pengidup kitai Iban kena nagang kitai ngereja pengawa ti jai lalu tau ngasuh kitai bebadi, tabin, merinsa mensena tauka parai.

Ambi ke chunto, mali makai utai ti enda ti tudung enggaika dijeput antu lalu tau ngasuh mensia tabin tegal Antu. Uji kitai mansik ajar moral dalam penti pemali nya ngena penemu Sains. Pemakai ti enda ti tudung tau inggap lalat, lunyung lalu kaki lunyung, lalat ti udah inggap ba utai kamah sereta ngundan igi penyakit “kuman, bateria, virus” tau pindah ngagai pemakai ti enda ditudung nya. Lebuh kitai makai utai ti enda ditudung nya, igi penyakit nya tau tama ke dalam perut enggau tubuh kitai lalu tau ngasuh kita tabin raya baka pedis perut chirit, mutah bira muang ai .

Nitihka saintis Sosial Sigmund Freud, beleman tauka jadi mali melaki bini sereta munuh apai indai nya endang penti pemali serata dunya “universal”. Taja pia, penemu mensia ti bepelasarka “Rationalisme & Sains” udah ngepunka ulah mensia sengaja ngelanggar penti pemali nya laban kenu ku sida penti mali kelalu nyekat adat enggau atur jalai pengidup sosial sida. Nitihka Sains Spiritual ulah jai mensia di dunya nya tau ngujungka semengat ‘tubuh rohani, roh’ tau nyadi energi negatif (Antu) maya udah mati ila.

PATUT BEJIMAT-JIMAT

Penti pemali dalam jalai pengidup bansa Iban nyengkaum berengkah ari pengawa dalam rumah tangga (domestik), pengawa bumai betaun, ngasu beburu, pengawa berikan, etb. Kitai Iban ti agi megai pengarap Agama Adat tauka Animisme patut bejimat-jimat lalu minta penemu ari Manang tauka Lemambang pasal pekara nya. Manang tauka Lemambang aja ulih muai penti pemali Iban ti ukai Keristin. Kitai Iban ti udah megai agama Kristian patut enda irau pasal penti pemali taja pia…, kita tau minta penemu ari Paderi gerija diri empu pasal penti pemali nya.

Nya mih, kuasa dunya mistik ANTU ti endang amai bisi ‘wujud’ di dunya mensia. Nya alai bejimat-jimat lalu nguna pikir ‘spiritual’ ti tinggi kena kitai mensia mutarka penusah tegal ANTU. (Referen: Freud, Sigmund, Totem and Taboo: Lewis, N. (1983) Life in Egypt under Roman Rule, Clarendon Press)