Bujang Berani Iban Dua• CHULO ‘Tarang’@ Begarak

NGASU… Maya lepa enda ngayau bujang berani Iban endang rindu sereta landik ngasu jelu dalam kampung.

BBI Tusun Ke-15
“ENTI nuan enda nyua pulai baru tawak nya, nuan deka dibunuh kami ditu,” pia ku sida. Laban ti nemu diri empu endang salah, Encharang pan lalu mulaika ketawak nya ngagai orang ke dilaban iya bentaruh nya tadi.

Lebuh Linggir ‘Mali Lebu’ nguluka kayau ngalahka Melanau di Belawai, Ilas, Matu, Igan tauka ba tempat ke bukai di sebelah Nanga Rajang, Chulo “Tarang” endang siku ari manuk sabung ti dikearapka iya ngambu dulu nachahka munsuh. Baka nya mega, maya iya ngalahka bansa Beketan ke betuaika Apai Siba di Ulu Sugai, Tarang bedengah rawai lapan lalu bulih mayuh tangkap [ulun].

Kala mega Chulo ‘Tarang’ seduai Isut ari Paku enggau orang ngayau ngalahka munsuh iya di Banting ke betuaika Orang Kaya Rabong ari Skrang. Sida ngayau ngena dua buah perau pengayau ke besai. Lebuh ke bepantap ngelaban munsuh tu Chulo bedengah tiga iku, tang semina sigi aja pala dibai iya, laban ati iya keran agi deka mai dua igi tajau ke berega, dalam bilik munsuh nya. Maya tu mih iya diberi orang ensumbar ‘Tarang’ ketegal pemerani enggau pengering iya ngelaban munsuh.

ORANG KAYA RABONG

Datai di Skrang, pala sigi ke ulih iya nya ditinggalka iya ba Orang Kaya Rabong tegal ti keran agi mai dua igi tajau nya pulai ke Paku. Tarang tu beberita berani tang udah disumpah antu gerasi enda tau nyadi tuai matak kayau. Sepemanjai umur iya mih Chulo tu endang enda kala nyadi tuai matak kayau. Iya semina kala nguluka orang kayau anak. Maya kayau besai iya seruran nyadi manuk sabung Linggir Mali Lebu, Orang Kaya Pemancha Dana “Bayang” enggau Minggat apai Runai.

Di Paku, Chulo “Tarang” bebini ngambi Siah. Seduai beranak seiku aja, iya nya Tandok. Ari Paku sida Tarang sebilik pindah ke Sebelak lalu berumah di Kedoh ke alai bini iya Siah mati. Udah Siah parai, Chulo bebini baru jadi enggau Dinggu anak Ramping ti bensumbar “Gumbang” di Nanga Tawai di Rimbas. Seduai bisi anak tujuh iku, tiga lelaki, empat indu. Nama anak seduai iya nya Dungkong, Ngadan, Unggit, Lanjing, Gulang, Insin enggau Tujoh.

Udah ti belaya enggau petunggal iya Orang Kaya Antau “Linggang Nengeri”, Ramping “Gumbang” mai menantu iya Chulo “Tarang” enggau sida sebilik pindah ari Nanga Tawai ke ulu Rimbas. Sida berumah di Nanga Ulai ari ili menua Bayor. Ari Nanga Ulai , Ramping enggau menantu iya Chulo pindah ke Batang Krian laban ti enda chukup tanah endur bumai. Dia sida berumah di Kumpai. Pemindah Chulo tu lebih kurang sama serambau enggau pemindah sida Enchana “Letan” ari Kerangan Pinggai di Paku ke Awik, pati Sungai Krian.

Udah entua iya Ramping mati, Tarang dichirika Raja Charles Brooke nyadi penghulu keterubah megai menua Ulu Krian. Anak Tarang ke benama Ngadan seduai Unggit mega sama bujang berani. Menantu iya dua iku iya nya Kandau seduai Ngindang ari Paku mega sama bujang berani Iban.

Dalam taun 1860, Minggat apai Runai ari Awik dichiri nyadi penghulu menua ili Krian. Dungkong ari Kumpai dichiri nyadi penghulu di ulu Krian. Seduai tu sama dipadu Raja Charles Brooke nyadi tuai megai menua nya. Maya nya bala Iban ti diau ari kaki Wong Embuas nyentuk ke ulu kin apin talukka perintah Raja.

Tegal pengachau ti suah nyadi dalam Batang Krian dia Raja deka nyerang sida. Raja nangkan sida patut nyadi nembiak Minggat di Awik tauka Tarang di Kumpai enti sida deka nundukka perintah Raja.

NGEMPANG JALAI PENGAYAU

Orang Nanga Kabo enggau orang Batang Budu enggai nundukka perintah. Sida rari ke ulu Senulau laban deka nan enggau Ranggau seduai Janting di Bukit Batu di Ulu Katibas. Sebedau nya bala indu nembiak dianjung sida ke Ulu Julau dulu lalu dijaga sekeda bujang berani sida empu. Bala Raja Charles Brooke ngayau Iban Batang Krian ti enggai nundukka perintah Raja. Taja pia, nadai mayuh Iban Layar, Paku, Rimbas, Krian ili enggau Awik nurun dalam kayau nya. Sida ke enggau Raja nya pan semina ngudahka aja. Sida takutka Raja ringat ngagai sida, nya kebuah sida nitih aja tang main-main aja, enda bendar.

Sebedau kayau tu mayuh orang ari ili Krian enggau ari Saribas ngena chara belalai ngasuh bala kaban sida rari belalai ngagai endur ke likun. Maya kayau tu semina bala Iban ari Skrang aja enggau ati ti beamat-amat. Bala pengayau ari ili Krian, Paku, Layar enggau Rimbas, anang ke deka bebendar, mayuh agi sida ti ngempang jalai pengayau ke bukai enggai ke kaban belayan sida pedis jamah bala perintah Raja.

Bala sida ari Undup enggau Banting mega bebendar ngarika perintah Raja. Endang utai ti dianti-anti sida ti dibai Raja ngayau bala Iban tunga ke menua nya.

Orang Kabo, orang Budu, ulu Budu enggau Dassey tusah besai enti enda ditulung diri semenua ke enggau perintah ngayau. Sida alah tang enda mayuh bala sida lesi bebadi. Tambah mega maya nya orang Kabo mantu kaban belayan sida ti rabat ba rumah panjai bukai. Rumah sida ditunu bala Raja. Tembawai rumah nya nyadi pendam ke dikumbai Pendam Besai Nanga Kabo.

Udah ke alah ba kayau nya, orang Kabo pechah dua bagi. Sebagi ke agi kih kering ati enggai nundukka perintah Raja. Sida tu rari lalu diau begulai enggau Ranggau seduai Janting di Julau ti nan di Bukit Dugan di Ulu Ensiring. Sebagi agi nundukka perintah Raja.

Enda lama udah nya Raja Charles Brooke ngasuh Minggat ngayau sida ke enggai nundukka perintah. Sida nya udah rari ke ulu Kanowit enggau ulu Mujok, begulai enggau Iban Katibas di ulu Kamalih enggau di Bukit Stulak enda jauh ari entigis ulu Kanowit. Maya nya Libau “Rentap”, diau ba Bukit Stulak udah ke pindah ari Bukit Lanjak laban ke dialahka perintah Raja di Bukit Sadok dalam taun 1861.

Meda penyarut ba Krian-Katibas ke enda ngetu-ngetu, Libau-Rentap ti nyau tuai amai pindah ke ulu Kabo ke nangkup entigis ulu Awik, Julau, Sarikei enggau ulu Binatang. Dia mih iya mati lalu dilumbung di Bukit Sibau.

Udah ti alah dikayau bala Minggat di Ensiring, Ranggau seduai Janting pan rari lalu nan di Bukit Dugan. Meda seduai lalu enggai ngaku alah, Raja Brooke ngasuh Minggat mai Tarang, Linggir “Mali Lebu” enggau Entering apai Nawai enggau tuai-tuai Iban di Julau nyerang Bukit Dugan. Maya kayau tu, Chulo “Tarang” seduai Entering enda tentu senang ati. Seduai enda tentu kemerah laban mayuh amai nembiak seduai enggau orang angkat ngelaban perintah Raja. Dua iku nembiak Chulo “Tarang” nya apai Dassey maya nya sama enggau munsuh nan di Bukit Dugan.

Ba kayau ke sekali tu sida Tarang dibai Minggat bejalai bedarat nengah jalai ke mar sereta jauh. Sida nadai besatup enggau munsuh, laban datai sida di Bukit Dugan, bala munsuh udah rari nadai agi dia; lalu dipelaba , munsuh Raja ti kaban Tarang nya endang udah nemu munsuh deka datai ari padah Tarang empu. Minggat madahka iya, perintah semina ngasuh sida ngalahka munsuh ti apin nunduk ba Bukit Dugan aja.

Dalam taun 1863, lebuh Tuan Raja ngayau Kayan enggau Kejaman di kelimpah, Chulo ‘Tarang’, Minggat enggau Linggir ‘Mali Lebu’, endang dikearapka Raja nguluka bala Iban ari Kalaka-Saribas. Maya nya sida enda tentu bulih dengah. Sida berasai lembau-selembau disabung perintah Raja, tang semadi mih laban takutka Raja.

BUJANG BERANI

Maya perintah Raja ngayau Bukit Batu di Ulu Mujong, Kapit, dalam taun 1882, Chulo “Tarang” mega siku ari tuai Iban ke dikearapka Raja Charles Brooke, kelimpah ari Minggat. Seduai endang diasuh matak jalai belama. Maya kayau nya dua iku menantu iya ti benama Kandau seduai Ngindang bakal. Anak Tarang empu ti benama Unggit bedengah mayuh munsuh.

Endang amatka padah antu dalam mimpi iya. Bujang berani ti benama Chulo “Tarang” orang dagang ti kaya, bumai bulih padi. Kenu ku sida ke tuai kelia enda ngetu-getu orang bukai meli padi ari iya ngena benda kebuk, tabak, simpai rangki, tawak, bebendai enggau reta tengkira ti bukai. Maya nya bansa Iban apin nemu utai ti benama duit. Nadai duit. Ngisi ukum pan ngena reta tengkira, ngena tajau.

Ba ujung kandang taun 1870, Chulo ‘Tarang’ masuk agama Kristian. Iya mih tuai bansa Iban di batang Krian ti pemadu dulu masuk Kristian ti dibai bala paderi British maya nya. Iya mega keterubah bansa Iban Batang Krian ti berumah betiangka kayu tebelian ti besai-besai. Tarang danjan pulai ke Sebayan dalam taun 1888 sebedau rumah panjai sida tembu. Iya dianjung ngagai pendam Lubuk Temual di Kumpai.

(Betampung ba Tusun Ke-16 minggu nyin ila)

Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatsApp tu: 013-8325146