Nyadi teladan dalam gempung enggau gulu

ATUR begulu sigi dikerindu kitai bansa Iban.

KITAI bansa Iban endang nadai kala pambar enggau pangan diri. Bansa Iban meh nyadika chunto tauka teladan mayuh pupu raban bansa di Malaysia laban ditemu semampai begempung, begulu sereta begulai lalu bekunsi pemedis enggau penyamai ngereja pengawa, kelebih agi beduruk.

Semua ulah sereta pengawa begawai, begulu enggau pangan diri dalam pengerami, pengawa umai baka beduruk, pengawa rama, ngasu beburu sereta gulu bukai endang chukup manah kena ngempung ati bala kitai raban bansa Iban. Tu nyengkaum sida ti diau nguan rumah panjai sereta mega bala kitai Iban ti diau di mengeri tauka di pasar.

Atur ti baka nya endang manah kena bansa kitai ngaul pangan diri sereta ngerapitka gempung ati kitai begulai dalam pendiau, begulai seperabung, dalam semua bansa pengawa, di opis, di sekula sereta di sebarang alai endur. Gulu munyi nya tadi meh endang diatur beduduk ari sekeda batang tuju ti meruan. Bisi utai nya diatur bepun ari pemesai guna iya dalam asal pengawa bumai; bisi nya ketegal deka niti nali utai ti enda tau enda dikereja kitai kena nampung pengawas sida niang aki ini kitai kelia lalu bisi mega nya ketegal pemesai sangkut paut iya dalam idup rama enggau idup kitai bepengarap lama, pengarap baru tauka ari perintah kuasa ti megai kitai. Bisi mega iya beduduk ari peneka suku raban bansa siti-siti kena sida nyembah petara, nyembah kuasa pengarap sida siku-siku.

CHUKUP NGERINDUKA ATI

Kitai sama nemu, enti nya pengerami melah pinang tauka bisi mega orang ngumbai iya gawai lelabi, reti nya kena bejadika indu enggau lelaki jadi melaki bini. Tu endang pengawa ti chukup ngerinduka ati taja pan batang tuju iya kena nampung ruang bilik, nampung peturun mensia awakka enda punas.

Semua atur pengawa baka nya endang kenyau ari jeman kelia, ari jeman begiling nyadung ai kelia udah dipejalaika aki ini kitai menya kena ngempung merabung pupu raban bansa kitai Iban. Gulu baka nya sigi chukup tegut kena ngeringka kaul enggau kempit raban awakka nyamai sereta likun belama begulai enggau pangan diri.

Sigi amat bisi tuju meh ajar sida aki ini kitai kelia ti ngelalau sereta nangkan madah enti kitai begempung pengawa endang lempung ka tambah mega kitai kering. Tang enti kitai pechah, kitai deka mudah belah, mudah dikekah, mudah patah, mudah dialahka orang ti ngelaban kitai.

Ambika banding batang kayu ti digembar dua tauka tiga enggau mayuh agi endang enda mudah ulih dipatahka, dilentur tauka ditetak. Tang enti sebatang aja, iya deka mudah patah, mudah belah, mudah ditetak, mudah dilentur sereta ngujungka iya enda tan. Enda ku jaku sema orang, enti kitai begempung kitai teguh tang enti bepechah belah, kitai runtuh.

BEGEMPUNG NGUPAS SUNGAI

Bisi ga pengawa dikereja bebala mayuh nya laban kena nembuka sekeda pengawa tauka penanggul bala mayuh besangkut paut enggau pengelikun sereta pengelantang pendiau mayuh. Ambika banding, menua kami di Kedap ti mangkang Batang Melupa suah bendar ga begempung ngupas sungai nya ngambika batang enggau reba ba sungai nya enda ngachau pejalai perau enggau muto sepit taja pan kemayatu jarang bendar ngena jalai ai agi. Bala jelu ai mangah ti tajam ngeli merangap besai (baya) endang semampai bisi ayan ba ai kami menua kelebih agi maya ai pasang. Taja pia bala mensia mayuh nganti maya ai mabu baru ngupas sungai nya.

Nyadi pengawa baka ngasu enggau beburu mega suah diatur maya lapang pengawa, maya hari manah. Kala mega bala ngatur pengawa beburu ba Batang Melupa ari ulu rumah kami ngagai Lubuk Jelapa ari ili Sekula Primari Nanga Assam. Maya nya suba pengawa nya dipejalaika kena ngulihka ikan ka tambah mega kena ngerindang ati semua bala mayuh ti sama enggau. Kami ke nembiak mega suah beburu ba sekeda sungai mit ti bepati ba Batang Kedap – Kedap tu pati Melupa. Beburu ba sungai mit enda ibuh ngena perau tang bejalai aja taja pan pejalai ngagai endur beburu nya enda kurang ari dua jam. Endang mai bekal kena merarau tengah hari laban pengawa nya semak empat lima jam baru tembu. Nya pan bepanggai ba pemulih ikan. Kelimpah ari ti bulih ikan ambika lauk diri empu enggau ungkup dijual mega, atur beburu sigi manah kena ngempung sereta ngerinduka ati bala mayuh ti sama enggau.

Pengawa ti bakatu meh ti ulih neguhka kaul enggau gempung ati sereta penyerakup entara bala nembiak redak rumah panjai, tuai enggau biak, indu enggau lelaki. Bala nembiak redak rumah panjai endang diajar awakka begulai manah sereta bebasaka pangan diri. Sida dipatihka ngereja pengawa beraban laban nemu atur begulai sereta beraban ngereja pengawa nya ngenataika pengering. Atur tu meh ti nyadika pun pengering enggau pemerani nembiak redak sereta pungka lelaki rumah panjai kelia, iya nya maya menua agi siga, agi bemunsuh.

SENANG DIALAH MUNSUH

Rumah panjai ti tegap, dijaga enggau manah deka pedis dialahka munsuh. Tang enti rumah panjai nadai begempung, nadai pengering, iya deka senang dialahka munsuh. Beduduk ari tu meh bala Iban ba rumah panjai diatu keran nampung atur gempung bakanya lalu ngichaka iya nyadi batang pengering enggau batang pemerani sida idup dalam dunya injau tu.

Nyadi diatu enti bebala mayuh ngereja pengawa umai baka beduruk sereta bedandang besai, bala Iban rumah panjai sigi berasai kering, berani sereta likun laban bekeringka pangan diri taja pan nadai agi bemunsuh baka kelia.

Enti ngasu beburu sida bekeringka pangan diri awakka enda takut tauka nangika jelu babas siang tauka malam. Laban ngasu tu dalam babas, sida nadai berasai takut laban bebala mayuh. Bakanya mega enti beburu ba sungai mit tauka besai sida nadai penangi tauka utai diketakut laban bekeringka pangan diri. Nya meh pemanah sereta pengelebih bebala mayuh. Tu meh utai ti dipinta, dikedeka kitai bansa, kitai menua.

Lebuh anak kitai baru deka mansang, udah iya nemu bejaku sereta mereti jaku, apai indai enda tau enda ngajar iya pemesai reti basa ngagai pangan diri. Anak mit nya deka diajar pasal pemesai reti ngembuan pemanah enggau pengelandik begulai enggau diri sebilik, diri menyadi, diri serumah, enggau apai indai sereta orang tuai.

Bepun ari tu meh anak kitai Iban lalu teleba sereta landik begulai lalu bekaul enggau pangan diri, enggau orang bukai enda ngira sapa, enda ngira bansa. Ulah ti manah bakanya mega jadi pengelebih sereta pemanah kena idup begulai dalam raban bansa. Nya alai mayuh orang sigi muji anak kitai Iban chukup likun dalam pendiau, landik begulai sereta bekaul enggau begempung entara diri sama diri ketambah mega enggau bansa bukai. Sida dipuji laban chukup angkun begempung ngereja semua bansa pengawa. Tu mega siti pekara ti chukup ngenyulutka gempung, kaul sereta pemereti ati pupu raban bansa, kelebih agi nembiak redak ba rumah panjai.

NGEMBUAN MAYUH PENEMU

Siti pengelebih raban bansa Iban ba rumah panjai ti udah nyadi pengering sida nya tegal raban bansa Iban ti dikumbai sama sebaka pemaruh enggau peninggi. Raban bansa Iban dikumbai orang ‘egalitarian’, reti nya nadai lebih ari pangan diri tang sama sebaka ba penuduk enggau pendiau dalam dunya. Kitai Iban nadai atur beraja, nadai besultan. Kitai bisi ketuai ti dipilih laban ketegal ngembuan mayuh penemu, pengelandik matak jalai nyadi tuai. Kekadang bisi ga bala tuai kitai ba rumah panjai baka tuai rumah, pengulu, pemancha enggau temenggong nya sigi peturun orang megai kuasa nyadi tuai ari kelia; tang mayuh ketuai diatu endang mungkal nyadi tuai laban bisi penemu, bisi pengelandik megai orang.

Nya alai diatu, taja pan datai bepuluh iku bala nembiak ba rumah panjai nya udah bisi diploma bisi degree sida terus ngasika tuai rumah lalu ninga jaku iya. Ari penaluk enggau pengangkun bala nembiak redak ngagai tuai rumah meh semua atur pengawa ti udah disebut dulu ari tu tadi ulih dipenyadi sereta dipejalaika enggau manah sereta nadai penekul, nadai penanggul, nadai penekang.

Pemujur rumah panjai ngatur sereta bejalaika semua atur pengawa begulu, begempung bakanya endang utai ti udah ngemujurka semua pengawa nyadi pematak jalai nuju pengelikun, pemaik enggau gempung ati ti meruan belama iya ungkup nembiak redak ba rumah panjai. Nya alai kitai raban bansa ti mengkang ngemeranka pendiau ba rumah panjai patut terus sama besukung enggau tuai rumah, enggau diri sama diri awakka semua atur pengawa ti manah bakanya terus nyadi pengering, nyadi peneguh kaul sereta gempung ati nembiak redak rumah panjai. Iya mega ngichaka kitai terus sepenemu, segulai sejalai. Tu meh tau ngasuh rumah panjai Iban nyadi chunto pemadu nyulut dalam gempung sereta pemereti ati ba pengidup raban bansa di menua Sarawak Tansang Kenyalang tu.

Oleh TELESA EMPERAN