PETARA, ANTU! •Kuasa Mistik Bunsu Petara

AUR MALI… Sekeda ari bansa bulu aur dikena Iban kelia ngukum bunuh orang ti beleman tauka jadi mali.

Tusun Ke-54

BEPELASARKA penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: i. Kuasa mistik Petara (God, Almighty, Tuhan) ii. Kuasa mistik Bunsu Petara (Dewa, Diety) iii. Kuasa mistik Antu [Sitan, Jin, Iblis]. Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu. Sekali tu aku mai pemacha ngenang pasal adat mali jadi melaki bini ti bsisi bekaul enggau kuasa mistik Bunsu Petara.

ASAL ADAT UKUM JADI MALI MELAKI BINI

Kedua kali Sera Gunting [Uchu Sengalang Burung] ngemedung ngagai menua aki iya Sengalang Burong di Tansang Kenyalang, Sera Gunting diau sebilik enggau aki seduai ibu iya Endu Dara Chempaka Tempurong Alang; iya nya menyadi bunsu indai iya Dara Tinchin Temaga. Serang Gunting seduai ibu iya nya endang serambau; nya alai jampat amai seduai teleba sereta begulai bebakih enggau pangan diri. Kelimpah ti diau sebilik baka nya seduai mega nyau enggai jauh ari pangan diri; main begulai, makai seretai begulai, gawa dini-dini endur pan begulai. Nyau kelama-lama ti diau begulai baka nya, ujung-ujung seduai nyau belabuh rindu sereta sayauka pangan diri; besulu, beambai alai mih seduai nya.

Kira-kira sebulan udah nya Endu Dara Chempaka Tempurong Alang pan temu sida sebilik betubuh bisi. Begau sida sebilik, sida serumah nya. Meda utai baka nya Sengalang Burong pan ngangauka sida serumah, sida sebilik nya baum. Endu Dara Chempaka Tempurong Alang udah ngaku ba mua apai iya Sengalang Burong lalu ngambu Sera Gunting ti beleman enggau iya ngelama tu. Ulah seduai tu besai amai pemali lalu pemali nya dikumbai Pemali Ngudi Menua.

Sebedau Sengalang Burong mutuska adat ukum ti patut ba Serang Gunting enggau ibu iya Endu Dara Chempaka Tempurong Alang, iya mega ngeletak adat munyi tu. “Indu tauka lelaki mali nyebut nama entua. Barang sapa ti ngelanggar pemali tu [nyebut nama entua], deka kena sumpah tulah, busung lalu ditinggang nasit ti jai sepemanjai umur kita idup di dunya.”

Udah tembu Sengalang Burong nurunka adat pemali melaki bini nya ngagai Serang Gunting, iya pan bejaku baru. “Anak mit ti deka diadaka Endu Dara Chempaka Tempurong Alang tu ila, deka dibunuh ‘pantang enggau aur’ nitihka adat jadi mali bansa kitai. Pia mega, Sera Gunting mesti pulai ke dunya mensia awakka iya madahka sida din pasal adat mali melaki bini tu; laban nya mih kebuah aku enda ngeletak ukum bunuh ba seduai iya mibu.”

ADAT PENTI PEMALI

Nitihka adat sida di Tansang Kenyalang jeman nya, indu enggau lelaki ti petunggal sekali / petunggal diri menyadi tau jadi melaki bini enggau pangan diri. Seduai nya sama peturun aki ini. Orang ti ke mali besulu, beambai tauka beleman enggau pangan diri iya nya tusut ari: apai enggau anak, indai enggau anak, ibu enggau anak menyadi lelaki, aya enggau anak menyadi indu, diri menyadi, aki enggu uchu. Enti sida ti mali tu bisi ditemu ngaga ulah ti enda beradat baka nya, sida tu deka kena adat penti pemali lalu diukum bunuh pantang enggau aur: amai besai penyalah mali tu. Pia mega sida tu mega enda tau jadi melaki bini enti enda kena adat mali: Besapatka Ai: reti nya mandi darah babi.

Nitihka tusut diri sebilik, indu enggau lelaki ti diri petunggal; petunggal sekali diri menyadi tauka petunggal dua kali tauka petunggal jauh tau jadi melaki bini; nadai pemali. Kelimpah ari nya diri petunggal di atas nya tadi; ambi ke chunto; diri menyadi tampung pala, ibu tauka aya enggau anak menyadi tauka anak petunggal, ini tauka aki engau uchu, endang mali beambai, besulu tauka jadi melaki bini lalu ukum iya nitihka penyemak kaul diri sebilik.

BESAPATKA AI

Enti indu enggau lelaki ti mali tusut tu diau begulai sebedau seduai ngisi ukum nya engka laban seduai orang ti seranta, seduai mega enda tau jadi melaki bini. Tang enti seduai, majak deka diau begulai enggau pangan diri mega, seduai tu patut diukum bunuh: pantang enggau aur tauka seduai mesti “Besapatka Ai” : mandi darah empat iku babi. Reti nya empat iku babi nya disayat ba ai sungai ari ulu seduai ti mandi tauka nyelam ba ai nya. Empat iku da babi nya deka disayat di pantai kena nasih menua @ pelasi menua.

Enti sema indu enggau lelaki ke jadi mali nya enda diintu sereta ngisi ukum nitihka adat ajar Sengalang Burong nya tadi, menua mensia di dunya deka ditinggang penusah ujan kudi, sungai bah tanah tusur. Pia mega penyakit enggau indu utai deka ngerusak umai enggau utai tanam mensia. Nyau kelama-lama adat ukum ajar Sengalang Burong nya nyau berubah nitihka ubah dunya mensia berengkah ari jeman Beti “Berauh Gumbang”.

Jeman nya lelaki ti benama Abang jadi mali enggau Tali Bunga. Nitihka tusut peturun diri sebilik Tali Bunga nya anak petunggal Abang. Nya alai Beti ngasuh seduai nya ukum nitihka adat ti diletak Sengalang Burong tang seduai nya sama orang seranta. Nya alai Beti sereta enggau tuai-tuai rumah bukai lalu ngeletak ukum bunuh ‘pantang enggau aur’. Lebuh Beti baru deka datai jari ngukum Abang seduai Tali Bunga, tekenyit amai iya ninga nyawa orang ngangauka nama iya. “Beti! Beti! Nama kebuah nuan ngukum mensia baka nya?! Kelalu kasar chara nya…!” “Seduai udah ngelanggar adat jadi mali ti nitihka adat Sengalang Burong lalu seduai enda ulih ngisi ukum nya.” “Taja seduai enda ulih mayar ukum nya, enda mih nuan tau munuh seduai baka nya.” “Kati ku enggau seduai tu, dih?” “Berengkah ari diatu, enti pekara jadi mali tu nyadi, nuan patut ngasuh seduai tu mandi darah babi ti jelan pemesai. Babi seiku da patut disayat ba pantai kena muai antu sial, antu rua, antu rangka ti tau ngerusak umai kita. Kelimpah ari darah babi, utai ti dikena Besapatka Ai iya nya baka tu:

  1. Pedang panjai kena ngerandang remang rarat.
    2.Beliung lajung kena mungga urat lensat.
    3.Sumpit tapang kena ngerejang lubang kilat.
    4.Kumbu rayung kena nyerayung tekuyung dalam ungkap.
    5.Kain beragi kena miau mua hari sarat bebuat.
    6.Pinggai besai kena nyekat tanah rarat.
    7.Besi panti landai ke alai kaki betakat.
    8.Rangki kena nasih ai ngambi enda beriap.
    9.Tepayan endur nyimpan semengat.

Ba kategori ti ngaga ulah jadi melaki bini tauka beleman bekalih tusut tauka dikira mali, deka diukum ngena lapan igi jabir lalu mandi darah babi, “Besapatka Ai.” Ba kategori ti bukai senentang orang ti beleman tauka jadi mali; semua nya nitihka adat Sengalang Burong ti dibai Sera Gunting ngagai bansa Dayak Iban.

Taja pia, maya jeman seiku tuai bansa Dayak Iban ti benama Kaya iya nya peturun serak kelima Beti, bisi seiku lelaki ti benama Bukol beleman enggau ibu iya ti benama Brenyan, sebaka enggau ulah Abang seduai Tali Bunga kelia. Kaya bejalaika ukum bunuh “pantang enggau aur” ba seduai nya: nitihka adat mali ti diajar Sengalang Burong. Malam seduai nya ti dibunuh, ribut kudi sereta ujan bangat datai lalu ngerusak rumah panjai Kaya di Sungai Letong di Paku.

Pun aur ti endur sida ngambi aur ti dikena sida munuh Bukol seduai Brenyan agi bisi dipeda tumbuh ba Nanga Selamoi seberai tapak rumah panjai Kaya kelia, enda jauh ari sebuah rumah panjai di Sungai Pelanduk ke diatu. Kenu ku orang tuai, Rumah Kaya nya kelia rusak dipangka ujan ribut kudi laban Kaya enda nitihka adat ti diajar Bunsu Petara ngagai Beti.
Nya mih, asal adat ukum penti pemali beleman tauka jadi melaki bini “incest taboo” nitihka agama Adat Iban. Nya alai bejimat-jimat lalu nguna pikir ‘spiritual’ ti tinggi kena kitai mensia mutarka penusah beleman tauka jadi mali dalam jalai pengidup kitai Iban tu. Taja pia, kitai Iban ti udah megai agama Kristian bisi chara kediri empu kena mutarka penti pemali ti berat tu nitihka ajar Paderi ba gerija diri empu.