Cherpan:Adat Menua Siga

GAMBAR pengiyas

Tusun Kedua

MAYA bejalai nadai ngetu. Batang insap nyau udah apus. Hari nyau lemai-selemai. Jaum bedau ga nyaut. Ati iya belabuh irau. “Nyangka udah pulai semati iya nya. Beli nadai madah. Bulaka semaya,” ku Jana bisi berasai nyidaka bakih iya. Enda nemu kebuah bakih iya nya. Iya lalu nguji ngangkatka tubuh jelu nya. Tak enda terangkat. Enti bisi Jaum baru nadai penanggul ku ati iya. Sekumbang ke ngapuska sebatang insap tadi, Jana nyau tingatka utai ti nyadi sebedau seduai iya nurun ngasu.

Sida serumah benung begau. Bala orang ari opis pengerai enggau bala polis sampal datai ngagai rumah panjai sida. Bisi ngelima iku bala polis bekerigang ngempang jalai ba penama ngagai rumah panjai. Seduai iya bisi ninga rumah sida nya dilikup orang. Sida serumah ditagang mindah. Seduai iya mupuk ari ujung bilik.

KABAN BELAYAN DATAI
Seduai iya sama nemu, minggu nyin kemari rumah sida bisi rabat. Tuai rumah sida udah ninggalka dunya. Naka pemayuh kaban belayan ari semak enggau jauh bisi datai ngesah penusah sida. Siku anak Tuai Rumah nya ke gawa di Semenanjung pan bisi datai. Kenu ku cherita, anak iya nya udah bisi beperesa di padang bilun di Kuching tang ditemu nadai dirampit penyakit Covid 19. Nya kebuah iya dikemendarka pulai ke rumah panjai tang lebuh datai di Sibu iya ditemu bisi tanda dirampit. Ketegal nya, rumah sida lalu digusung orang opis pengerai enggau bala terabai menua. Sida nya bisi tetemuka mayuh orang udah kena rampit.

KENA ADAT BEKURUNG
Jana tekenyit ninga serap orang bejalai semak iya. Iya tegepang meda Jaum udah datai. Mua pangan iya nya nyau puchat kelat. Jana ngadang utai bisi salah.
“Lapa nuan laun amat datai? Nadai ninga letup enggau sepu buluh senapang aku nuan?” ku tanya Jana.
“Bisi aku ninga tang aku laun kitu laban aku beratika pejalai mayuh bendar trak polis enggau soldadu nengah jalai nuju rumah kitai. Ari empara aku, sida tampak bendar dipeda. Kada enda kena adat bekurung kitai,” ku Jaum balat irau ati.
“Apu baka nya nih? Lagi tua berundingka hal adat bekurung nya. Diatu kati ku tua enggau jelu ke ditimbak aku?” ku Jana nanya bakih iya. Iya nanya ngapa, laban iya nemu Jaum endang ngelempaika semua utai ba iya.

“Aku nadai mayuh jaku, nitihka runding nuan”, ku Jaum.
“Baka tu ku pelin aku. Tua emparu jelu nya dulu awakka nyamai dibai tua pulai. Enda ibuh tua ngerinan iya segala. Udah jelu nya diemparu, tua mulaika diri ke rumah mai dagin nya. Nya tanda tua ukai mindah sebarang,” ku Jana.
“Sebarang iya mih.” ku Jaum.

Seduai iya ngerinan bangkai jelu nya. Babi nya besai agi ari ti dijangka Jana nya alai iya pama bendar dikalang seduai iya nuju tebing sungai. Raran digaga, api diidup lalu enda lama udah nya bau rum babi diuru ba raran nya nyau ngaba. Bulu babi ti bedau tingkil lalu dikikis. Tubuh babi nya nyau alus. Enda lama udah nya, tubuh jelu nya lalu dibelah seduai iya awakka ngulihka perengka dalam iya. Hari maya nya nyau udah tumbuh nyang. Seduai iya beguai-guai mela jelu nya awakka jampat agi beputar pulai. Seduai iya bela mai setengah tubuh jelu nya.
Seduai iya nuju jalai besai, laban enti nyidi jalai neresap ti rembus ba ujung bilik sida, seduai iya tau tesat. Niti jalai besai nya seduai iya enda ulih nyeliahka betemu sereta mansa bala polis ti ngempang jalai.
“Hi, berhenti!” ku tegur polis ti ngetanka seduai iya. Lampang babi seduai dilekaka seduai ari san seduai.
“Datai ari ni seduai? Orang mayuh udah di dalam rumah magang. Lapa seduai enda ngasika adat enda tau mindah ari rumah?” ku tegur siku orang polis ngena jaku Iban.

Jaum merening Jana. Seduai iya ka-ka gegetar deka nyaut. Jana berundingka diri mesti sabar nyaut. Enda tau ngayanka diri kelalu takut. Manah ngena jaku alus, ku ati iya. Nya endang siti chara iya lebuh dikangauka Pengetua menya maya iya agi besekula.

Oleh JANTAN UMBAT