Bujang Berani Iban Dua

UKAI IBAN… Tajai pia pemajik indu Dayak tu mega suah nyadi buah mulut bansa bukai di dunya.

Tusun Ke-16

KEDU “LANG NGINDANG”

Kedu tauka ensumbar iya ke tampak agi iya nya “Lang Ngindang” tu tuai Iban Skrang di Nanga Bunu. Tegal pemerani enggau penaluk nembiak ngagai iya, Kedu dichiri perintah nyadi penghulu di Nanga Bunu, Skrang. Lang Ngindang suah nguluka bala iya ngayau ngalahka bansa bukai ke diau di Merakai di Kalimantan, Indonesia kena pegai perintah Belanda. Iya ngayau ngena perau pengayau ke besai.

Hari nya Kedu beban perau pengayau ba munggu seigi di tinting Engsanga antara ulu Tebat enggau ulu Buai di Skrang, enda jauh ari rumah panjai sida. Udah kayu ke ditebang iya nya rebah, enda berasai dia iya pan lelap tinduk jenak amat. Engka tegal ti lelak amai. Lebuh ke tinduk nya, Lang Ngindang bemimpi asai ke agi nebang kayu sepi iya. Lebuh ke bebendar nebang kayu, iya tepedaka sebuah rumah panjai orang ari atas iya ke nebang kayu nya. Lebuh iya malik ke rumah orang nya, iya meda indai tuai orang seiku nyenguk ari mua jenila. Indu nya malik ngagai iya lalu bejaku nagang iya nebang kayu ngelingi nya enggaika ngerusak madang pisang enggau tebu di ujung bilik sida. Ninga indu nya madah munyi nya, Lang Ngindang pan lalu nyaut.

BEMIMPI BETEMU ENGGAU TUTONG

“Enda aku nemu ditu bisi rumah orang, dih. Minta ampun mih, ibu. Rumah sapa tu dih?” pia ku Lang Ngindang.

“Tu mih rumah panjai orang Gelong,” ku saut indu nya.

“Tutong bisi ditu,” ku indu nya bejaku baru.

Ninga munyi nya, Lang Ngindang pan lalu niki ke rumah indu nya. Datai iya ba ruai rumah nya, Tutong pan ngelaluka iya.

“Lalu, unggal. Duduk ke tikai kitu,” ku Tutong. Lang Ngindang pan duduk betunga mua enggau Tutong. Seduai berandau sambil nginsap ruku.

“Anang agi nuan nebang kayu sengapa semak rumah kami ditu unggal, enggaika ngerusak utai tanam ngelingi endur tu,” ku Tutong bejaku baru.

“Nya mih…aku minta ampun, unggal. Enda aku nemu ditu bisi rumah orang,” pia ku timbal Lang Ngindang.

“Jemah ila enti nuan bisi ngereja pengawa ke besai anang enda ngangauka kami, awakka kami nulung nuan,” pia ku Tutong.

“Baka ni aku ulih madahka kita?” tanya Lang Ngindang.

“Mudah aja. Sayat nuan manuk seiku, ambika piring lalu kangau nuan nama kami enggau nyawa ti inggar. Nya baru kami deka datai nulung nuan,” pia ku Tutong.

“Au mih. Kati ku aku tu deka nyadi tuai kayau? Baka ni, dih?” ku Ngindang.

“Enti nuan deka nguluka orang ngayau, nuan mesti ngangauka kami minta tulung,” ku Tutong.

Udah nya Lang Ngindang pan lalu tedani. Nya baru iya nemu nya mimpi. Iya pan mulaika diri ke rumah.

LANG NGINDANG ENDA PUAS ATI

Taja pan iya udah dichirika perintah nyadi penghulu tang iya meruan enda puas ati ngagai perintah Raja Brooke tegal ngasuh rayat mayar chukai pintu. Iya nangkan nembiak iya, enda ngasuh sida mayar chukai pintu. Kelimpah ari nya, iya mega suah ngelanggar undang-undang perintah Raja Briooke Sarawak laban udah suah matak kayau ngalahka bansa Kantu di Merakai, Kalimantan. Tang utai ke ngasuh iya udu amat ringat lalu ngelaban perintah Raja Brooke nya laban bala Raja udah nyerang bala iya lebuh sida mansang deka ngayau.

Tegal penyalah Lang Ngindang ti ngelaban perintah Raja, Tuan Maxwell, Residen di Simanggang maya nya, ngasuh Orang Kaya Pemancha Nanang nguluka bala sedadu perintah Raja Brooke nyerang rumah Lang Ngindang di nanga Bunu dalam taun 1879. Ba perang nya Lang Ngindang alah lalu rumah panjai sida ditunu bala Raja.

RUMAH LANG NGINDANG DISERANG

Udah ke alah di Nanga Bunu, Lang Ngindang enggau bala manuk sabung iya Uching “Kesulai Tandang”, Aming “Ijau Kemelang” enggau ke bukai nyengkaum Sigat ari Tanjong, Basek “Tengkujuh Darah” ari nanga Tanyit, Dunggau ari nanga Murat enggau Busut ari Enteban rari lalu ngaga kuta di tuchung Bukit Stulak.

Dalam taun 1881, sekali agi bala perintah ke betuaika Orang Kaya Pemancha Nanang ngayau ngalahka Lang Ngindang di Bukit Stulak. Lang Ngindang pan alah baru. Udah ti alah dia, Lang Ngindang enggau bala iya nyerahka diri lalu nundukka perintah. Sekeda ari sida nya pulai ke Skrang, sida ke bukai nitihka Lang Ngindang pindah ke Kanowit. Lang Ngindang diasuh ngisi ukum ngena sepuluh igi tajau awakka nyadi jamin iya enda agi ngaga pengachau ngelanggar undang-undang perintah Raja Brooke.

Lang Ngindang enggai agi pulai ke Skrang laban enggai meda mua sekeda ari bala pemesai bansa Orang Putih di Kubu Alice di Simanggang ke endur iya deka bebaik enggau perintah. Iya enggai bebaik di Simanggang tang mai perintah bebaik di Sibu.

DIAU MENDAM DI BAWANG ASSAN

Mindah ari Bukit Stulak, Lang Ngindang mai bala iya pindah ke Kanowit. Di Kanowit sida berumah di Nanga Tebalong enggau Nanga Kesit di Entabai. Betaun-taun udah diau dia, Lang Ngindang matak bala iya pindah ke ili agi lalu diau mendam di Bawang Assan di Sibu datai ke iya mati.

Uchu Lang Ngindang ke benama Gani mega berani lalu suah diasuh Raja Charles Brooke ngayau Kayan di Ulu Batang Rajang ti enggai mayar chukai pintu. Gani mati di Bawang Assan dalam taun 1959.

Taja pan Lang Ngindang angkat ngelaban Raja tang tuju ati iya enda sebaka enggau enggai Libau-Rentap. Kebuah pia, Lang Ngindang ngelaban undang-undang perintah Raja Brooke tegal iya ti ringat laban Raja nagang iya ngayau rayat Raja Brooke empu. Reti nya Lang Ngindang ngelanggar undang-undang. Engka nya kebuah orang Gelong enda datai nulung iya nitihka semaya?

(Betampung ba Tusun Ke-17 minggu nyin ila)

Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatapps tu: 013 8325146

Oleh HARRY USUP UMBAR