Jaku uti maya melah pinang

BEGAMBAR enggau apai indai.

SAMPAI ngagai kemaya hari tu, endang agi bisi uti ‘ngetan enggau muka kuta’ lebuh maya bala Iban bisi ngintu pengerami gawai enggau melah pinang ti bisi atur nikika pengabang. Tu ukai ngetan bubu ridan munyi ku lagu aya bidik Ricky El.

Tau mega atur tu dikumbai ngelalu penatai pengabang lalu ngetanka kuta ba pala tangga, tengah rumah enggau ba ujung puting setak rumah panjai nya. Reti nya tau ngagai tiga iti kuta ditan kena ngelalu penatai pengabang, iya nya sida ke niki bebala mayuh.

Sekeda ari leka jaku kena ngetan sereta jaku ngena muka kuta lebuh bisi pengerami melah pinang ba rumah panjai munyi ti entudi tu.

“Langgarka dulu bala pengabang tu, aus bala sida nya,” ku bujang jegak orang empu rumah ke lalu mantil bala pengabang meri ngiri ai tuak ka irup sida.

JAKU NGENA MUKA KUTA

Jaku kena ngetanka kuta munyi tu: “Nya alai tentu nuan tu unggal enggau pebulang leka mata, ruai besai rumah raya kami tu, udah diredai kami enggau punggai ampang mensuga, ke begamal mua pemanah tak merah mansau jera, bisi gaga orang gambar baya betapa meradai di nanga Kedap pati Sungai Melupa ili.

“Peda nuan sepiak ari kanan udah diredai kami enggau punggai jalih kanggan, chukup macham mayuh ara, tisi udah diungki enggau ragi benang setera, puchuk nyin tak lenuk-lenuk bisi betebuk neladan rayuk bulan penama, udah dichao orang enggau sekelat gambar maskuta, udah diserah perintah ngagai tuai rumah bulih mudah megai kuasa ka tanda raja merintah orang.

“Nya alai tu aya, dikumbai kami kuta pua ka penanya temuai datai ke betandai pulai hari. Tu dikumbai kami lintang batang penekat bujang sigat ke bejalai mua penyimat, nyidi pantap abi jari; tu dikumbai kami jamban titi rawan pun ibun pasun jelu jugam ganggam lengan ningkarka dan tebelian wi. Nya alai puting nyin aya udah diibun selangking biring bubut buban enti nyerumba linda sabung silam iya benyawa depan-depan ngibun pengkalan jalai mati.

“Tu ke dikumbai kami telaga tungku tiga pandi dara bintang berasap, baka kijap dini hari; tu dikumbai kami letung pandi duyung ke serintak nyabak rerung mata bangkung tudung sempayung mata hari mati.

“Nya-alai tu aya dikumbai kami tengkebuk sauk kumang letung dayung pemandang, letau jayau ai tungguk tuau ke serintak nyabak rangau-rangau bambaika senulau bulan pegari. Nya alai ari tebing nyin ke dikumbai kami pendai dara telanjing bayam sengkiling ngepit ringgit ke belilit mua pengelebat nanchang pekat jaku danji. Nyadi siti tu dikumbai kami kuta tabi, kedua kuta pengaga, lalu ketiga kuta basa, meda kita ke bebala mansang ngabang, ke begamal remba-remba nuntung di mua panding berejang.

“Nya alai ke tu aya, ngasuh nuan nekang puchuk tapang ngulihka idang ai singut udah nyempalut raja rembia aku ngasuh nuan engkabah limau tapah ke bebuah bulat segala, ngasuh nuan ngenggam daan limau rangan ke bedaan rakah rinda, lalu aku tu unggal ngasuh nuan megai pelekat jaku melikat surat Tuan Serega enggaika kitai enda tau tama gerija ke sereta mansang sembiang; enggaika kitai tak selama iya mangkang api neraka ke bisa angat ngerendang.”

Tukang sadung ai tuak pan lalu mantil aya ke baru abis ngetan kuta tadi.

DIEMPANG SITI AGI KUTA

Pengudah ke ninga jaku orang empu rumah ngetanka kuta ba pala tangga rumah panjai orang ke ngempu pengawa nya, bala pengabang mayuh pan majakka pejalai sida niti rumah. Datai ba tengah rumah, dia sida diempang siti agi kuta. Jaku udah tu lagi nya ari pengari pengabang kena iya muka kuta ba tengah rumah panjai nya.

“Kami tu nyau datai ba tengah rumah, nyau datai ba lintang batang ke digaga kita ditu kena nyambut penatai kami sebuat. Nya alai kami ke datai ari lansar Layar Bebangai datai ari gelenggang Layar nyadi ke betubuh bala besai niki bukit ke lelegit tinggi gegiau ngili ai ngulu sungai niti batang kawi lamba mikai nengah semilu batu chanai tak nentang kami enggau pebulang mata nampai meda menua pegai Saratok sitak kitai lalu nuju kami ngagai tengan Melupa nyadai manggai lambu kami di munggu madang kair jugu sengayan silai ninga sera kukuk manuk banda kita ditu kela-kela balat penyelai, tak kesal kami tadi Igat dijungkal kandang kerigai, sida ke nembiak bisi bebatak mai pulai.

“Kejang kami ari nya lalu bejalai muntang tanjung ke ngelung ngiku tupai, lalu datai ba lumbi kami tadi di pendai ili kita ditu, lalu mandi kami tadi di perebeni ai mulai, lalu berunsut enggau belusun sabun kedai lalu begari beranti-anti balat beguai ninga gendang tak nyau nerantang palu bendai.

Tak enda lama udah bekau nya, enda bulih sempa pinang tuai, peda tak kaya-kaya bujang melisa nyan menira tanda tambai tak kayak-kayak bujang biak minching tabak piring rendai lalu tangkanka bujang ganggam ngepit jelayan manuk tawai lalu nuntung sida bujang lempung ba mua kami ke betugung bala besai, tak lalu ngenang sida, nyangka kami ke bisi salah burung pimpin bejampung raup beragai.

“Nya alai randa-randa sida bujang bula lalu ngaga pedara lima piring dibuai, lalu nyeru bujang nemu ngangauka antu bunsu sempandai. Lalu nyampi bujang mereti munyi menani manang matai. Nya baru kami niki ari pendai pengkalan besai kita di liung Melupa Lubuk Bundung nyadai teleba alai Cina Ah Pung i ti agi kelia nyual macham perengka barang pemakai nguntunh. Lalu tiki kami ari pendai pengkalan besai kita tadi, lalu titi bala kami panti landi ke pengaki manuk tawai, panti lantak kita ditu baka setak kena lunjak kaki bejalai.

ENGKERAMBA DUA IKU

“Datai ba tengah laman kita din tadi, peda tak lindung ayung silam entam belayam sabang enseluai, malik ngijap aku tadi Igat meda pun tiang pengingat ke bisi chap tanda sempekat terubah gawai. Dia aku meda engkeramba dua iku sama betunga, bisi penemu landik nanya, siku seduai ngadi siku seduai ngika, siku ngibu, siku ngaya. Dia kami tak bela ketawa sentaie landai. Lalu tegepang aku tadi Igat sereta tama peretang rumah panjai kita di batang gelenggang Melupa Lubuk Bundung mulai meda gelegar kita ditu tak nyau mantar anchau tikai. Perening aku ngagai dinding tak nadai beseling selit utai; lupu aku malik ngagai mua pintu peda aku manah udu ngumba lagu sapu bichu chat cherai. Malik aku ke panggau peda tak lengau-lengau baka kubau raja Brunai. Dia kami lalu dituntung sida teruna dara lempung enggau julung ai ganjai, sua kiba jengkau ke kanan, nya alai kami tak nyau betangkan lubah bejalai. Nya alai datai di tengah rumah tu aya, tu baru ati tak berai chukup tusah, kena tegah sida jenawang bujang bungah, kada enda tu ke dikumbai kita tu pengakah rumah, penanya temuai datai.

“Tak kesal aku di jungkal kandang kerigai sereta aku tetentangka pelintang batang kita tak melintang ngalitka ruai, punggang setak nadai rawak alai bejalai kena tatam bala Iban ke tereban barui datai. Di tengah nya udah diengkahka gambar gajah dua berintai, ari kanan bisi gajah meram nelan pesilan ular beluai, ari kiba engkahka kita gambar sawa masung rusa betanduk ngumba ke periga pampang tigai, ari mua engkah ka kita kendi labu tamaga chukup bunga, betalika kemuja ringgit rantai. Lalu ngetu lupu aku meda batu ke genilu ngalitka jalai, ngenung meda wuong tak beranggung ringkat tigai, tampung letung ke bekilung balat pemanjai.

“Peda aku tak kindang-kindang bujang mekang bebaju biru tanchut bechabang; enti agi kelia dulu menya, nyangka nya disemaka kita bujang puntang medang, bejaku mua penau-nau leka sera nyawa inggar didinga semua kami ke datai, enda pindah-pindah ari nyawa sanggir dindang laut Malaya muka pasa ngisik belula nyepu serunai. Kada enda lebuh aku ke mai bala ngemayuh tu laban tak nadai nemu pesu awak jalai.

“Nya alai jawang aku tak tegepang deka surut undang nikal pulai mai indu ke digelumu bala besai matak nembiak ke baka jengkak nunda juak ke betanjak mudik sungai, udah nya tak bejaku sida ibu pangkat indai; lapa laba nuan Igat enda tekelalaka nya kuta basa sida di Kedap ulu kena nyatup kebu ngelalu bala kitai ke datai.

“Lapa lumbi nuan Igat ku sida ke tuai kaban ini, sida ngelala nya kuta tabi kena orang nganti kitai ke datai bebala besai. Enti nuan Igat enda netang nya kuta lintang batang sida di ulu Embawang nunggang kena segang pemansang jalai besai. Ni ubat lama kitai menya ulih sida Musa uchu Subung, kena nuan muka kuta gaga awakka telenga bisi jalai.

“Nya alai kami ke datai tu bakanya ga, ukai muntang ukai nengkebang, ukai muntis ukai niris, endang nyuan endang neladan orang ke tuai dulu parai. Kami tu kitu nunda pejalai niang Tarang lebuh berumpang Batang Krian mulai nunda pejalai niang Minggat Apai Runai. Terubah iya nembuai ngagai ulu batang Rajang mulai dia medung nengah wuong tak betampung batu besai, meraka letung tak betanjung ngelung sungai tak dipungga Minggat Apai Runai laban ke bisi bebekal badi lesi bilai tak tebuka awak jalai enda bulih sesempa pinang tuai, mua penyamai-nyamai nya jalai nemuai ke ulu langgai kutai ngiga setawak raban bebendai tak rerangai nyaris nerentang. Tang diatu Igat enda ga baka nya, laban menua udah bekalih raja betukar megai, adat udah kena padat pegai bansa kitai dalam balai kubu Simanggang.

“Nya alai tu utai kena aku nganti ka kelia kena aku muka kuta gaga kita tu, laban tu udah digaga tuai kitai Dayak dipejurai tuai-tuai bansa kitai, ke dikumbai orang panding ngerang.”

Nyadi reti adat ngena sida ke datai nya sigi panding ngerang. Enti pulai ngagai mata duit mina tiga ringgit aja. Enti iya sigi panding dua ringgit tang laban nya digaga ‘ngerang’ nya alai tambah seringgit. Tu endang siti ari uti lebuh berami, kelebih agi maya orang melah pinang.

Jaku muka kuta tu deka ditampung baru dudi ila.

Oleh TELESA EMPERAN