Bujang Berani Iban Dua

BATANG RAJANG… Kar menua Sarawak nunjuka menua Kanowit (Batang Rajang) ti diperimba bansa Iban ti betuaika Mujah.

Tusun Ke-17

MUJAH BUAH RAYA

Mujah ti bensumbar Buah Raya tu siku tuai kayau Iban ti beberita jelai nama tampak rita di Entabai, Julau berengkah ari taun 1840an ngagai 1860.

Ketegal pemerani sereta pengelandik iya nyadi tuai, Sharif Masahor di Mukah meri iya pangkat Panglima. Panglima Mujah tu anak Melina “Bunga Ringkai” datai ari Skrang. Niang Apai iya Melina “Bungai Ringkai” endang tuai kayau Iban Skrang ke suah matak kayau ngalahka rayat perintah Raja Merom @ Sultan Berunei di Oya, Mukah enggau di Balingian serambau enggau penatai James Brooke ke Sarawak.

Urung taun 1840, iya matak bala iya pindah ke Saribas lalu diau enda lama di kaki Bukit Sadok, lalu bumai berimba menua ulu Spak. Lebuh iya diau di Spak, iya suah nemuai ngagai bala tuai Iban Saribas baka sida Igoh apai Lamban di Ulu Layar, Unal “Bulan” di ili Spak enggau Orang Kaya Pemancha Dana “Bayang” di Padeh. Maya penemuai tu mih iya belajarka adat beburung enggau chara-chara ngayau. Udah bulih penemu kena ngayau, Mujah berunding, nadai guna iya terus diau di menua Saribas laban udah mayuh tuai kayau diau di menua nya. Iya pan berunding deka matak bala pindah ngiga menua baru.

MUJAH JADI ENGGAU ANDAK

Nyau udah lama ke berunding, Mujah nemuai ngagai Encharang ke diau di Ulu Anyut, di Paku. Iya diau enggau sida Encharang bisi dua tiga hari aja.

Lama-lama ke diau dia, iya nukuka Andak, anak dara Encharang ke bini iya. Encharang setuju enti Mujah deka nguai lalu diau enggau sida di Ulu Anyut, ba endur ke diatu dikumbai Tembawai Tingkah. Mujah pan jadi enggau Andak lalu diau di ulu Anyut.

Lebuh ke berandau enggau sida di Sungai Anyut, Mujah madahka kebuah iya ti pindah ari Skrang ke Spak laban deka berimba menua baru, nambahka pemayuh temuda rimba bansa Iban. Taja pan iya rindu ke pengawa ngayau tang iya enda setuju enggau chara bala tuai Saribas baka sida Igoh apai Lamban enggau Unal “Bulan” ke semina rindu ngemeranka pengawa ngayau tang nadai ati deka ngemesaika menua, tanah temuda, bali rimba bansa Iban ke tau alai bumai kena ngidupka diri.

PINDAH NGINA MENUA BARU

Dalam randau iya maya nya Mujah mega madahka diri deka nyadi tuai kayau tauka manuk sabung. Iya deka mai bala Iban pindah ngiga menua baru, ari luar menua Saribas, Skrang enggau Batang Lupar ke udah diuan mayuh bansa Iban. Nya alai iya deka mai bala iya pindah berumpang menua ulu sungai Entabai enggau sepemanjai sungai Kanowit ke besabung enggau menua ulu Layar. Kenu ku Mujah menua nya agi puang, semina diuan bansa Beketan ke pindah ari Paku enggau Batang Krian.

Bala orang Anyut enda ulih diumbuk Mujah laban sida enggai ninggalka menua lama. Bala sida bini iya sebilik mega enggai enggau Mujah pindah.

Andak ukai semina enggai enggau pindah tang minta sarak. Seduai pan sarak. Penyarak seduai nya ukai ari laya, nya alai seduai sarak sempekat aja semina betukar tinchin aja. Seri manis.

Udah sarak enggau Andak anak Encharang di Anyut, Mujah deka bebini baru ngiga indu ti deka enggau iya pindah ke Entabai, sekali tu iya nanya indu orang di ulu Matop dalam Paku mega. Taja pan Mujah lelaki ke sigat gamal sereta beberita berani, tang nadai seiku indu orang Paku ngili Anyut sanggup jadi enggau Mujah lalu dibai iya pindah ngagai menua baru. Maya nya kelia menua Entabai nya kira jauh ari Saribas. Mujah enda jera, enda putus pengarap. Sekali tu iya nanya indu orang Penom ti benama Mapong, dalam Paku mega, tang sekali tu mega jelungan baru laban Mapong mega enggai nitihka iya pindah ke menua baru.

PINDAH NGAGAI ULU ENTABAI

Nyau datai ba maya ke pindah, Mujah pan nguluka bala iya, Iban ari Saribas, Skrang enggau Lemanak. Sida bedarat nengah tatai Keladan lalu nuju bukit antara Entigis ulu Ngiau enggau Jaloh enggau antara Jaloh enggau Penom. Ari bukit nya sida pan bejalai baru nuju bukit ke nyerara menua ulu Layar enggau Entabai. Mujah enggau bala iya pan berumah dia.

Sekumbang ti diau dia mayuh mega bala Iban ari Ulu Layar nitihka sida.

Mujah empu mega seiku ari tuai serang maya nya. Udah ti dialahka bansa Iban, bala munsuh ti diau di ulu Entabai, ulu Julau, ulu Entaih enggau ulu Kanowit rari lalu pindah diau begelumu ba seiti genturung pendiau di ili Kanowit.

PINDAH NGAGAI KANOWIT

Udah ti ngalahka munsuh, Mujah pan matak nembiak iya pindah ke ili ke agi. Sida pan berumah di Nanga Engkaup. Udah betaun-taun diau di Engkaup, Mujah enggau bala iya lalu deka pindah ke ili ke agi. Tang sebedau sida pindah Mujah ngasuh sekeda ari nembiak iya dulu kin matau menua nya laban maya nya sida bemunsuh enggau bansa bukai ti lama udah diau mendam di menua nya. Sida dulu matau menua ti dikumbai Nanga Namangu ti deka alai sida berumah. Maya ke matau menua tu bala Mujah tinduk dalam perau takutka diserang bala munsuh.

Enti enda ketegal Mujah Buah Raya, kada bisi Iban di menua Kanowit?
Udah sida tembu berumah di Nanga Namangu nya baru sida pulai ke Engkaup baru ngambi bala indu enggau nembiak. Datai sida di Engkaup, sida meda mayuh bala orang datai baru deka nitihka sida pindah ke menua baru. Lemai nya Mujah mai bala nembiak iya baum. Maya nya iya mantah chara tuai-tuai Iban Saribas ngayau ngalahka mayuh endur datai ke Sambas enggau Pontianak di Kalimantan. Sida nya semina munuh munsuh lalu ngerampas sekeda barang ke berega tang enda diau lalu bempu menua nya. Mujah nangkan bala iya, enda ngasuh nunda chara kayau bala tuai ari Saribas. Maya nya mega Mujah ngasuh bala iya ngaga perau pengayau ke besai agi kena sida ngalahka munsuh di menua baru. Mujah madahka nembiak iya, enti Kumang ke betemu enggau iya dalam mimpi ngamatka jaku deka nulung iya, menua Kanowit ulih diempu bansa Iban.

Udah perau pengayau sida tembu, Mujah enggau bala manuk sabung iya lalu nemuai ke Paku enggau Layar minta besi kena ngaga sangkuh enggau senyata ke bukai. Kenu ku Mujah, ngena senyata tu sida deka ngalahka munsuh. Enti munsuh udah alah menua nya mesti diempu Iban ari Paku, Layar, Skrang enggau Lemanak. Kenu ku Mujah menua Kanowit tu ulih diempu sida enti sekumbang ke dia, sida enda nyerang bansa bukai di luar menua Kanowit.

Apin lama iya udah pulai ari Saribas, Uyu apai Ikum ari Julau nemuai ngagai iya. Uyu apai Ikum tu endang manuk sabung Mujah, tuai Iban ari ulu Julau ke tau serang. Suba iya suah nyadi manuk sabung O.K.P Dana “Bayang”, Aji, enggau O.K.P Nanang. Uyu nemuai ngagai Mujah laban deka nanya sekali ke bala Iban bisi munsuh di menua baru. Mujah madah bala Beketan Julau ti lama udah diau di ulu Sugai enda ngachau bala Iban ke baru pindah kia. Sida nya enda tau dikayau. Mujah madahka Uyu apai Ikum, semina bansa bukai ke diau di sepemanjai sungai Julau, Binatang, Nyelong enggau Sarikei aja tau dikayau laban sida iya udu ngachau bala Iban ti deka pindah ngagai endur nya. Udah nya bala Mujah enggau Uyu pan besikap deka ngayau munsuh sida nya.

PINDAH NGILI BATANG RAJANG

Udah dua malam di rantau jalai, sida pan datai di Nanga Julau. Tekala nya sida pan nyerang lalu ngalahka munsuh ke enda besedia. Sida bulih mayuh dengah enggau tangkap. Bekejang ari Nanga Julau, Mujah enggau bala iya ngayau lalu ngalahka rumah bansa bukai di Kanowit. Maya nya bala Mujah-Buah Raya mega bulih mayuh dengah enggau tangkap. Pulai ngayau ari nya Buah Raya pan mai bala iya nirika gawai Enchabuh Arung.

Udah menua Kanowit, Julau enggau Entabai diempu bansa Iban, Mujah suah matak kayau ngalahka bansa bukai tungga ke barat laut nanga Batang Rajang. Ketegal pemujur Mujah ngalahka bansa bukai nya alai diatu menua Kanowit, Julau, Sarikei, Sibu enggau Bintangor diuan mayuh bansa Iban ari Lemanak, Layar enggau Skrang. Nyau pengelama udah nya byau mayuh Iban ari menua nya datai lalu mendam ba sebelah menua ili Batang Rajang.

Kelimpah ari ke ngalahka bansa bukai di sebelah menua nya, Mujah mega suah nulung Unggat seduai Gerinang ngalahka munsuh sida di Ulu Batang Rajang enggau Balleh, awakka menua nya ulih diempu bansa Iban ke pindah kia ari Batang Ai enggau Batang Kanyau di Kalimantan.

(Betampung ba Tusun Ke-18 minggu nyin ila)

Nya mih asal penatai bujang berani Iban nyentuk ke jeman Raja Brooke. Bansa Melayu Sarawak enggau Iban enda kala bemunsuh ari kelia nyentuk ke diatu. Jeman kelia menya, di Batang Lupar, Saribas, Batang Rajang Iban semina bemunsuh enggau bansa Seru, Baketan, Beliun enggau Orang Ulu; nya pan tegal bansa Dayak ti ukai ‘Ibanic group’ nya mungkal nanjar bansa Iban maya sida bepindah ngiga menua baru endur bumai betaun. Terima kasih ngagai kaban FB ti udah ngirumka mayuh gambar bansa Dayak Borneo. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146

Oleh Harry Usup Umbar