Anang saru; suntuk tau nyadi kaya

LABAN dikesinu Petara, Migu seduai bini iya nyadi kaya bulih reta tengkira,bulih mas, bulih pirak.

MAYUH kitai Iban kelalu deka ngemandaika diri, lalu bisi mega semadi ditibarka rangki baru muka mulut, laban kelalu lembau, kelalu ngemaruhka diri. Bisi sekeda endang enda angkat, enda engkebut enti ukai rarika munsuh. Tu siti ari banding gaya jerita ba renggat tu.

MIGU ENGGAU SINDI

Nyadi kelia bisi Iban siku penama Migu. Iya bebini ngambi indu siku penama Sindi. Bini iya Sindi tu anak Tuai Rumah Amit.

Bebendar amat Tuai Rumah Amit nagang anak iya Sindi enda ngasuh jadi enggau Migu, meda iya bangat seranta nadai utai kemisi.

Taja pia, seduai keran bendar deka jadi melaki bini. Udah seduai jadi, seduai lalau diau kediri. Rumah seduai digaga Migu nya betiangka buluh, bedindingka gari tikai, lalu beatapka kulit kayu. Sinu endar meda gaya pendiau seduai.

Kelimpah ari ke balat penyai alai diau, seduai mega seranta. Deka makai nadai asi, deka ngirup nadai ai, deka berapi nadai kayu. Suah endar seduai ke lapar nadai utai dempa. Orang bukai enggai meri seduai laban meda Migu tu ngelusu endar, enggai kiruh enggau orang bumai. Ni bisi utai dempa enti enda bumai.

PENGELANDIK MERI PNYENANG

Taja pia, Migu tu landik endar ngaga bubu. Genap hari iya semampai majakka diri ngaga bubu. Mayuh bengkah pemesai bubu ke digaga iya, tang ke endang nyengala udah tembu lalu ulih ditan ba sungai nya bisi tujuh iti. Bubu iya tujuh iti nya chukup tegap, sereta manah endar digaga iya. Baka ke ukai utai digaga orang ngelusu.

Nya alai bubu tujuh bengkah nya meh ke dianjung lalu ditaan iya ba sungai lalu kelimpah ari nya, bisi mega ditan iya ba batang ai besai.

Hari siti nurun meh Migu tu ngabas bubu iya. Peda mayuh endar ikan ulih bubu iya. Lebuh iya datai di rumah gaga endar meh tudah Sindi meda mayuh ikan ulih bubu laki iya Migu. Nyau bebesai ikan ulih bubu nya. Bala sida semah, sida mengalan, sida empurau, sida tengadak. Tudah ikan baka bangah enggau entabalang nyau enda dipalik Sindi enggau Migu. Seduai melaki bini lantang endar nyawa laban selalu bisi ikan ka lauk.

Genap hari, genap pagi semua bubu Migu tujuh bengkah nya semampai bulih ikan magang. Bisi tujuh hari Migu udah seruran bulih ikan.

ULAR SAWA ENGGAU BELALANG BELEMAN

Nya pengudah lapan hari iya nurun ngabas bubu lalu lebuh datai ba tampun bubu, dia iya meda ular sawa enggau ular belalang benung betunang, bebelit pangan. Ular sawa nya indu, lalu ular belalang nya lelaki.

Belalang seduai Sawa sama betemu enggau pangan diri di ulu sungai nya, alai Migu naan bubu iya. Seduai nya bisi leman enggau pangan diri. Migu lalu netak iku Sawa, lalu dibai iya pulai ke rumah sereta diselitka iya ba lalau tangga.

Lebuh maya iya datai di rumah, hari bangat endar ujan. Tudah Migu tu nyau gegetar laban chelap pulai ngabas bubu. Iya lalu bekindu ba dapur dalam bilik.

Benung seduai melaki bini makai tengah hari, datai temuai tiga iku. Semua bala temuai tiga iku nya sigat magang gamal. Sida berupai sama kering endar gamal, meda ari gaya gumpal isi. Jejabung ilang sida tiga sama panjai nipas tengah laman. Nya ga ipak lelanjang kena sida tiga, endang gaya orang sikap deka nurun ngayau.

Meda penatai sida tiga, Sindi seduai Migu lalu ngasuh sida tiga sama duduk. Sida endang deka duduk. Sindi pan lalu ngenahka sida tiga nya makai, laban ke endang bisi lauk ikan, nadai malu ngenah temuai makai.

Makai meh sida tiga, nadai utai ngenyang-ngenyang nya. Nyau berupai nyegang buah lemba sida tiga empa pengenyang. Ni enda kenyang laban belauk ikan ulih bubu Migu. Sindi seduai laki iya pan gaga endar ati meda sida tiga sama kenyang. Ke tambah mega meda orang tiga iku nya deka dibai seduai merarau enggau seduai. Nadai kala udah orang bukai makai ba bilik seduai kelimpah ari sida tiga iku nya.

NGATUR LAYA BUNSU ULAR

Udah badu makai, temuai tiga iku nya lalu madah sida nya ngambi Migu laban deka minta iya ngadu laya nembiak ba rumah sida.

“Aku tu enda kala ngintu laya, enda nemu adat. Entua aku baru nemu adat, tau ngintu laya orang,” ku Migu.

“Kami enggai mai entua nuan, kami deka begunaka penemu nuan. Nuan enda tau enda enggau kami, laban nuan aja ke diguna kami penemu ngintu laya tu,” ku temuai tiga iku nya.

Udah nya sida tiga nya lalu nanya Migu baru.

“Kati nuan bisi meda orang betunang tadi? Kati nuan bisi meda seduai ngaga leman enggau pangan diri? Udah nya nuan lalu mai buok indu nya lalu diselitka nuan ba lalau tangga?” ku siku ari sida temuai tiga iku nya.

“Amat nya deh. Amat bisi aku meda orang dua iku ngaga leman tadi,” pia ku Migu. Iya lalu nurun nitih temuai tiga iku nya.

Lebuh baru datai ba tengah laman rumah iya, sida tiga nya lalu ngasuh Migu ngetu sereta mejamka mata iya. Pejamka iya mata meh nundaka padah sida tiga. Enda lama iya ke pejam, siku sida lalu ngasuh iya enchelak baru. Peda iya nyau nyelaie gaya menua ke alai iya bediri, ukai tengah laman iya agi tang nyau ba tengah laman rumah panjai orang sebuah ke chukup panjai sereta manah. Nyau rapas peda ujung setak sepiak ari ulu nyin empa pemanjai rumah orang nya.

Lemai nya udah badu bebela makai, Migu lalu ngintu laya orang nya. Nadai lama iya mutuska pechara orang nya, laban iya amat bisi meda seduai dua iku ke ngaga leman enggau pangan diri. Ka tambah, iya bisi mai buok – iku ular sawa ke ditetak iya suba – nya ambi ka kelaie seduai amat bisi beleman.

UPAH BATU PENDING

Orang deka meri iya tajau setawak enggau mayuh macham utai bukai ke berega ambi ka upah iya ke ngadu ka laya sida. Tang Migu enggai nyambut semua utai nya, laban iya keran deka minta rengka siti ke dikumbai batu pending. Ninga bakanya, orang nadai kakang, lalu terus ngenjuk batu pending ka upah iya. Batu pending nya lalu deka dibai iya pulai, simpan iya dalam raga.

Tang sebedau iya ngejangka menua nya, orang dia lalu madah ngagai Migu: “Laban nuan udah bulih batu pending, nya alai nuan tau ninga semua utai ke enda ulih dinga orang bukai”.

Udah bekau nya, semua orang ke diau dalam rumah panjai nya lalu dipeda iya bebali nyadi ular, mina sida tiga ke ngambi iya ngatur laya nya aja ke agi mengkang nyadi mensia.

Ku siku ari sida tiga, “Nyadi kami tu bunsu ular. Batu pending nya kena kami ular ninga jaku anak mensia ke bisi puni. Kami ulih ninga jaku anak mensia ke puni lalu bisi mega sekeda ke puni nya dipantuk kami.”

Migu nyau ngenung ninga jaku sida nya. Sida tiga lalu ngasuh iya mejamka mata anang engkebut. Enda lama iya mejamka mata, lalu enchelak sereta nemu diri bediri ba tengah laman rumah iya empu, alai iya ke terubah diasuh sida tiga nya pejam hari sebedau nya.

Laban ke ngembuan batu pending nya Migu ulih ninga jaku semua utai, baka jaku empeliau, tau ninga randau bala sida tichak, jaku jelu bukai ke berandau enggau diri sama diri.

BATU PENDING NGASUH MIGU KAYA

Nyadi sekali Migu ninga manuk berandau ka pasal utai lama ke disimpan bala aki ini sida kelia. Manuk lalu terebai ngagai pulau babas mali. Migu tu nengkilaka manuk nya tadi. Dia iya meda manuk ngeranjai ba tanah. Lebuh manuk ngeranjai, dia peda iya pansut setawak, bebendai, tajau enggau mayuh macham utai bukai ti berega ari tanah dikeranjai manuk nya. Udah nya manuk nya lalu pulai ninggalka utai nya dia.

Meda bakanya, Migu lalu mansang ngambi setawak, ngambi bebendai, tajau enggau semua utai ke pansut ari tanah kair manuk nya tadi.

Nama agi deh, lalu kaya raja meh Migu seduai bini iya laban bisi rengka tengkira ke berega nya tadi. Seduai lantang bendar ati meda semua utai nya betugung ba bilik seduai.

Bala orang bukai ke meda nya, mayuh ngumbai seduai ngenchuri. Tang dini seduai bisi ngenchuri, laban semua nya endang utai diberi Petara ke sinu meda seduai balat merinsa, balat seranta.

Tegal seduai nadai jai, nadai beduan orang, Migu seduai Sindi dikesinu Petara, lalu udah nya lantang diau bepegai ba adat, ba tungkat, lurus nguan menua.

Entua iya Tuai Rumah Amit pan balat nesal laban udah muru anak iya Sindi seduai Migu dulu suba mula seduai jadi ari bilik sida. Diatu iya bebendar amat deka ngaul Migu seduai Sindi baru, laban meda seduai nyau kaya raja. Endang sigi baka ulah kitai mensia.

Ari ensera Migu tu meh kitai Iban bulih jaku munyi tu: “Baka ke bisi batu pending, lansik ninga.” Ensera tu mega ngajar kitai awakka anang bejai sereta ngelipakka orang tegal suntuk.

Baka tuai rumah nya, nasal dudi pan nadai reti, munyi tibar jaku enggau leka lagu sekeda penanyi.

Oleh TELESA EMPERAN