Petara, Bunsu Petara, Antu!

Tusun Ke-55

KUASA MISTIK BUNSU PETARA

Bepelasarka penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Bunsu Petara (Dewa, Diety) (3) Kuasa mistik Antu (Sitan, Jin, Iblis). Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu. Sekali tu aku mai pemacha ngenang pasal adat mali jadi melaki bini ti bsisi bekaul enggau kuasa mistik Bunsu Petara.

PENTI PEMALI BANSA IBAN

Penti pemali bansa Iban iya nya pengarap bansa Iban dulu kelia ti bisi besangkut paut enggau adat sereta jalai pengidup aki ini ari kelia menya: sebedau penatai agama Keristin tauka agama bukai. Nitihka pansik Antropologi enggau Sosiologi penti pemali ti dipegai mensia dunya dulu kelia kena sida nagang mensia mayuh ngaga pengawa ti jai tauka utai ti manah. Sekeda pemansik sosial madah, penti pemali iya sebengkah ari pesaka jalai pengidup mensia di serata dunya ti tumbuh ari peneleba pengidup sida dulu suba. Peneleba pengidup mensia dunya tu ngundan ajar moral ke manah sereta tinggi ti tau nyadi teladan, nyadi chuan mensia awakka kitai mensia ngembuan ulah (disiplin) ti manah sereta pandai ngibun jaku.

Nitihka pansik sosial penti pemali nya sebengkah ari atur dikena ngenataika ajar sereta teladan ti manah ngagai semua mensia. Sekeda atur tauka adat dalam pengidup mensia bisi ngundan penti pemali awakka mensia takut ngelaban atur tauka adat nya. Mayuh agi penti pemali nya ngembuan tuju meri jaku ajar, jaku lalau tauka teladan awakka mensia ngembuan ulah ti manah dalam daya idup sida. Sekeda penti pemali ngundan gelema pesan, mesej ti patut dititihka mensia kenyau ari jeman kelia menya. Reti nya genap pupu raban bansa di dunya tu bisi ngembuan penti pemali kediri empu kena sida ngatur jalai pengidup diri empu.

PENTI PEMALI MAYA BINI NGANDUNG

Dalam jalai pengidup bansa Iban dulu kelia, orang ti bepenti maya sida ke indu ngandung iya nya ukai semina laki tauka bini ti betubuh bisi nya, tang sida sebilik, sida serumah tauka orang ukai. Ambi ke chunto, maya bini ngandung laki indu nya enda tau munuh tauka nyayat sebarang jelu, manuk tauka utai idup ke bukai. Kelimpah ari laki indu nya, orang bukai mega enda tau munuh tauka nyayat jelu, manuk tauka utai bukai ba rumah, bilik tauka ruai indu ti ngandung nya. Enti penti pemali ti enda dititih, maya beranak indu nya tau mati baka jelu, manuk tauka utai bukai ti dibunuh tauka disayat nya.

Agi mayuh penti pemali ti enda tau digaga laki indu nya maya bini iya ngandung baka: enda tau muntas tin – enggai ke mulut anak iya rubik, enda tau nanchang tali – enggai ke anak indu nya pedis deka ada, enda tau ngechat utai – enggai ke anak iya bisi menawa ba kulit, enda tau matahka kaki manuk, pama tauka semua utai ti idup – enggai ke kaki anak iya timpang pendiau ba kaki tauka jari, enda tau mantangka paku lawang – enggai ke anak tusah deka ada. Mayuh mih penti pemali ti bukai ti enda alah sebut; lalu enti ditihihka memagang laki indu nya nadai ulih ngereja pengawa dikena ngidupka di dunya tu.

NAPI PENANGGUL BINI NGANDUNG

Baka ni chara kitai Iban kelia mutarka mayuh macham pengawa enti bini betubuh bisi? Enti ba pengawa baka munuh jelu, manuk tauka semua utai idup, pengawa nya ulih mih diseliahka laban laki indu nya tau enda munuh semua utai idup lalu tau ngasuh orang bukai ngereja pengawa nya. Sema jaku enti laki indu nya endang tukang ngaga rumah, mekanik kerita, baka ni iya deka bulih penatai pemisi maya timpuh semilan bulan?

CHARA MUTARKA PENTI PEMALI

Baka ni chara kitai Iban kelia tauka maya hari diatu mutarka penanggul penti pemali maya bisi betubuh bisi? Kenu ku sida ke tuai, sekeda ari chara sida kelia iya nya: maya ti ngeeja tauka ngelaban penti pemali nya; enti pengawa nya enda tau enda dikereja tegal ti bekuli ngiga duit, nyaga pengelikun diri tauka mayuh macham pengawa ti enda ulih diseliahka: (1) Udah sida ngereja pengawa nya, sida enda tau becherita tauka madahka sapa-sapa. Reti nya diau diri aja lalu enda ibuh nangika nama-nama utai. (2) Laki indu ti ngandung nya tau enda bepenti lalu ulih ngaga semua utai, lalu orang bukai mega enda ibuh ngerara iya. Kitai Iban ti udah megai pengarap Keristin endang enda diasuh Paderi gerija sida bepenti maya bini sida betubuh bisi / ngandung.

KAUL PENTI PEMALI ENGGAU PENGERAI

Penti sida ke indu maya sida ti betubuh bisi mega nyau semak sebaka engau enggi laki iya. Sekeda ari penti nya bisi kaul enggau pengerai ti bisi besangkut paut enggau pansik biologi. Ambi ke chunto; enda tau makai ikan ti enda betisik baka baung, jeringut, keli, undang enggau ti bukai. Kebuah pia, ikan ti enda betisik baka nya selalu bisi pati ti ngundan rachun baka baung, jeringkut – lalu rachun dalam tubuh ikan nya tau ngasuh anak ti dikandungka indu nya tabin laban sistem hormon jaga dalam tubuh iya apin kuat ngelaban sekeda rachun nya.

MESETI MEGAI PENTI PEMALI 45 HARI

Kenu ku orang tuai, indu ti baru udah beranak patut megai penti pemali lebih kurang 45 hari (dua bulan setengah). Ambi ke chunto, enda tau makai buah rampu mata – kebuah baka nya laban rampu mata nya chelap tau ngasuh pejalai darah sida enda lanchar pejalai dalam tubuh. Tubuh indu ti udah beranak begunaka pengangat, nya mih indu ti baru udah beranak patut bekindu awakka tubuh sida angat lalu ngelancharka pejalai darah. Penti pemali ti bisi besangkut paut enggau sistem tubuh / biologikal tu enti enda dititihka tau ngasuh indu nya bebadi tauka enda pengerai laban mayuh penyakit deka datai baka begetah (pansut darah tauka nanah ari vargina).

Nitihka penemu Sains (Fisiologi) indu ti baru udah beranak endang patut nyaga pengerai diri empu ngena chara ‘bepenti pemali’ laban maya ti ngadaka anak sida napi mayuh macham pemedis baka telih, bedarah lalu maya ti neranka anak sida lenyau mayuh energi (tenaga) ti tau ngujungka sida tabin enda tan pedis nyentuk ke sekeda bisi lesi bebadi maya ti beranak. Penti ti nitihka Sains Spiritual ulih diputarka ngena chara spiritual mega nitihka pengarap tauka agama diri empu. Kebuah pia, penti pemali nya bisi besngkut paut enggau tiga kuasa mistik ‘alam ghaib’ di dunya tu. Iya pekara misteri tu semina ulih dipansik mensia ti tinggi ‘spiritual practice’ (penemu agama / pengarap).

Nya alai, enti pemacha bisi utai deka ditanya tauka deka bebagi penemu pasal tiga kuasa mistik nya, tau SMS HP: 01114019115 / 0138475146. Pia mega pemacha tau ngirumka cherita sereta gambar pasal kuasa ‘alam ghaib’ nya ngagai Inbox FB aku. Terima kasih mega ngagai kita ti udah ngirum informasyen, tanya tauka gambar.