Sama keran meh kitai mansang

KILANG sawit di Saratok.

AGI bisi ga sekeda orang madah bala Iban nyakal pemansang, enda nerima projek ari perintah.

Ke bendar iya kitai Iban ba rumah panjai endang tebal sereta agi bingung pala ngenang pemansang. Kebuah pia, sida lalu kurang beseling, kurang mereti pasal pekara nya. Agi mayuh endang ngembuan penemu ti keran nyakal pemansang beduduk ari ti ngumbai perintah deka ngambi tanah pia aja lalu enda dibayar pampas sereta nadai ngenatai penguntung.

Laban ti enda mereti penuh meh sida agi mayuh takutka pemansang ti datai nujah ngerenchah sereta nujah menua sida. Nyakal pemansang sigi ba ujung mulut sida tang enda nemu penemu nya ngenataika pengerugi ngagai diri empu.

Sida lalu lubah deka teputar penemu lalu keran ngumbai pemansang ti datai nya kena perintah ngumpan ati sida lalu ukai kena nulung sida ngagai jemah ila. Bisi ga sekeda bala sida tu udah kena tipu lalu ngujungka sida jeraka pemansang. Bala sida tu nyengkaum sekeda ti udah kena tipu sekeda kompeni ti bedanji madah deka mai penguntung ngagai sida nyengkaum nganti pala tanah pesaka (NCR) nya ngagai mixed zone.

Nya alai anang baka nya; ubah meh penemu. Aram meh kitai sama nyingkang ke mua nuju pemansang; enda ngena bendar penemu takutka pemansang. Nadai kebuah kitai Iban rumah panjai patut nagang tanah pesaka tuai, tanah galai tauka tanah NCR dikemansangka ngena skim bekunsi baka Salcra. Kes bala kena tipu nya nadai sangkut paut enggau Salcra. Bala sida Iban di Bintulu nya kena tipu siti kompeni menua tu empu.

Taja pia, kes nya udah diatur enggau manah lalu ngujungka tanah nya diatu udah diberi pala tanah mixed zone.

Bala kitai Iban di rumah panjai tetap deka beruntung ari pemansang jalai sereta enggau skim bekunsi ngemansangka tanah baka ti dikenataika perintah tauka kompeni ngagai siti-siti kandang menua.

Di genturung menua Saratok, Betong, Kanowit enggau di menua Bekenu sereta Miri, endang udah lama dikemansangka tanah sida ngena jalai bekunsi. Reti nya bala menua nya nejuka kompeni besai ngemansangka tanah pesaka sida lalu ngujungka sida bulih pala tanah mixed zone. Menua nisi jalai ari Bintulu nuju Miri endang penuh ari sepiak-sepiak jalai laban madang buah sabun tauka dikelala agi ngena nama sawit. Orang menua nya lama udah nanam sawit ngena jalai bekunsi. Kompeni nya nyengkaum Salcra enggau Sarawak Oil Palm Bhd (SOP) sereta bisi mega kompeni bukai enggi menua tu empu.

BALAT MANSANG

Nya alai enti kitai merati ba pelilih menua ti udah disebut aku nya, menua nya endang udah balat mansang dalam pengawa nanam kebun buah sabun tauka sawit. Kelimpah ari serantu jalai ari Bintulu ke Miri, menua nisi jalai ari Lubok Antu ke Betong, ari Betong ke Saratok, ari Saratok ke Roban, ari Bintangor ke Kanowit, endang udah penuh laban kebun sawit. Tu meh utai ti ulih peda kitai, iya nya pemansang tanah ti udah ditanam kebun sawit.

Jalai mit baka Jalai Ulu Paku, Jalai Ulu Rimbas di menua pegai Betong enggau Debak; Jalai Ulu Krian, Jalai Kaki Wong ngagai Babang, Jalai Bajau di Saratok; Jalai Nibong Tada sampaika Nanga Dap di Kanowit; Jalai Bekenu, Jalai Bukit Peninjau, menua Ladang Tiga di Miri, semua tisi jalai ari sepiak-sepiak endang udah ditanam enggau sawit bedandang besai magang.

Beduduk ari pemansang sawit ti kala berega tinggi dulu ari tu, menua nya udah ditemu mansang. Pengidup mensia mayuh mega udah ditemu nyamai agi lalu betambah agi mega pengelantang enggau penyenang sida.

Kanowit, Betong enggau Saratok dudi agi ari Miri dalam pemansang kebun sawit, laban tiga bengkah menua tu mayuh agi dikemansang ulih Salcra tauka kompeni bukai berengkah ari tengan tuan 1990an suba. Tang menua Miri endang udah berengkah ngereja sawit dalam taun 1970an suba, kelebih agi sida ba Ladang Satu, Dua enggau Tiga enggau dandang kebun sawit bukai ti dikemansangka ulih kompeni Sarawak Oil Palm.

“Taja pia, bala di Saratok gaga bendar ati tegal pemansang dalam kebun sawit ti kemansangka Salcra pengelama bebelas taun ti udah,” ku siku tuai rumah ti enda ngasuh nama iya ditulis ditu.

Utai ti ku iya nya endang amat, laban kelimpah ari menua sida ti enda jauh ari pasar Saratok sigi udah lama ensepi penyamai tegal kebun sawit ti udah meri dividen genap taun. Bala di Melupa enggau Assam sigi mayuh bekuli ba Salcra lalu beridup dia laban Salcra bisi nyendiaka alai bemalam ba Saratok Oil Palm Mill. Auh bunyi injin ba kilang nya ulih dinga ari mayuh rumah panjai ngelingi nya maya malam hari. Tu meh utai ti manah, laban iya mai alai gawa. Pengidup bala mayuh ti gawa dia mega berupai jauh nyamai ari sebedau tu.

Tebal agi bala sida tu gawa ba kebun baka nyuluk sereta ngangkut buah sawit ngagai kilang. Mayuh mega sida gawa ba kilang, ba mayuh bengkah macham pengawa lalu bisi ga siku dua gawa ba opis.

Terubah iya suba ba menua kami, endang amat bisi orang nyakal Salcra tang nyau kelama-lama sakal nya enda tentu balat laban meda pemansang menua ti dikenataika ulih Salcra. Sida ti nyakal nya berubah runding laban Salcra nadai ngachau sida, kelimpah ari sida ti nadai empu tanah kena laban pemansang kebun sawit nya. Kami sebilik enggau bala bukai ti bisi tanah kena alai nanam sawit nya beruntung amat laban semua tanah nya udah diberi pala tanah mixed zone. Terubah nerima dividen suba pan bisi ga masuk duit bepuluh ribu. Taja pan diatu dividen bisi kurang mimit laban buah udah kurang agi, tang nya mengkang mai penguntung enggau penyamai ka bala mensia mayuh. Nya alai jarang ti enda tuchum lebuh maya dividen bisi dibayar ulih Salcra.

PENEMU KE SALAH

“Nadai rugi meh bala kitai di Saratok ti masuk bekunsi enggau Salcra ngemansangka kebun sawit bedandang besai. Lebuh maya dividen datai, taja enda bepuluh ribu baka terubah iya suba, jarang ti enda nerima ngagai ribu ga diatu,” ku tuai rumah nya tadi.

“Nya alai penemu siku dua dulu suba ti madah nadai guna masuk Salcra nya berupai salah. Kitai sama meda, bala ti bisi tanah dipasuk enggau Salcra diatu udah bulih pala tanah Mixed Zone magang, lalu pia mega genap taun bisi nerima dividen.

“Ka tambah nya, bala bukai, nyengkaum sida ti nadai tanah dipasuk enggau Salcra pan bisi ga awak enggau gawa ba kilang Salcra, makai gaji besai. Peda kitai bala sekeda nyau bisi entuka,bisi mutosikal, bilik nyau bisi kerusi manah enggau sekeda utai bukai ka tambah bisi belanja kena nganjung anak ngagai institusi pelajar tinggi.”

Kelimpah ari ti ngujungka tanah NCR nyadi tanah mixed zone, Salcra mega mantu nagang tanah nyadi nyadi kampung jerung nadai dinga kesung nyumbuh bujang, nyadi tanah pengerang lalu tanah nadai berega. Enti tanah nya enda dikemansang lalu terus nyadi kampung tuai, tanah nya tetap nadai rega, lalu nyadi ‘gajah burak’. Tu tau dikumbai kitai siti pengerugi besai laban tanah nya nadai dikena lalu ngejungka iya nadai ngemansutka asil.

Bisi mega kitai Iban nyeliahka tanah enggau kandang semak rumah dipansa tauka dirintas jalai alun tauka jalai mit. Ulah sida tu nyengkaum ngaga blok tauka empang jalai baka ngena pagar kayu tauka kuta digaga ari kayu kena ngempang jalai awakka enda ulih dipansa entuka enggau pengangkut jalai alun.

PEMANAH PEMANSANG

Tu ba jalai ti udah digaga tauka udah disungkur lipan. Nyadi sekeda bantah sida nya ba rintis jalai ulih sida opis perintah tauka kompeni ti udah diberi kontrak tauka lisin ngemansangka sekeda kandang menua bekelingi tauka enda jauh ari endur nya. Reti nya sida tu enggaika pemansang setegal sida enda ngemendarka jalai mansa tanah tauka rumah sida.

Runding ti baka tu tau dikumbai kitai penemu tauka runding surut. Tu runding ‘gostan’, lalu ngerugi. Orang ti deka ka pemansang enda patut ngembuan runding baka tu.

Bisi ga kitai Iban beambi ulih maya menua dipansa jalai. Ambika banding bisi ba serantu jalai ari Bintangor ngagai Julau lebuh jalai deka digaga orang enggau manah dalam ujung taun 1980an suba, ti alai bisi ba siti genturung menua orang bisi nemu dua iti sempar tauka langkau kubur berimbai. Nyadi lebuh jalai mansa, sida tu munyi ke bisi dibayar pampas tang engka bisi sekeda sida empu menua nya nemu nya kubur bula, nya alai bisi diterima polis siti ripot madahka nya pendam bula, reti nya nadai bangkai orang ditumbak dia. Lebuh ditasat polis, ripot nya amat. Sigi endang nadai bangkai orang tauka entubung ditumbak dia. Sida ti udah nerima pampas bayar nya munyi ti ditangkap polis laban nipu. Taja pia, penulis enda nemu nama pengujung kes nya.

Ulah ti baka tu mega penemu surut lalu enda patut dikembuan kitai bansa tauka bansa bukai. Kita patut gaga sereta temegah ati menua diri udah kena bungkur pemansang ti mai tuah, mai limpah ngagai rayat mayuh. Nya alai buai meh penemu ti surut, ti nekul jalai penguntung, jalai penyenang.
Ari ti nyakal, belubah meh kitai sama nyubuk reti enggau pemanah pemansang.

Oleh TELESA EMPERAN