PETARA, ANTU • Kuasa Mistik Antu

ANTU DALAM HOTEL… Antu ti kala ayan ba hotel-hotel endang bisi sangkut paut enggau roh mensia ti kala diau tauka gawa ba hotel nya.

Tusun Ke-59
BEPELASARKA penemu litericha, agama Monoteismse, Politeisme, Panteisme, Animisme enggau Sains Spiritual (Spiritual Science), kuasa dunya mistik tauka ‘alam ghaib’ dibagi ngagai tiga raban iya nya: (1) Kuasa mistik Petara (God, Almighty, Tuhan) (2) Kuasa mistik Bunsu Petara (Dewa, Diety) (3) Kuasa mistik Antu [Sitan, Jin, Iblis]. Sida tu seraban ari ‘supernatural being’ ti diau ba dunya ti enda ulih peda tauka digusung mensia dunya. Semina mensia ti bisi ngembuan kuasa mistik aja ulih bekaul tauka datai ba dunya sida tu. Sekali tu aku mai pemacha ngenang pasal sekeda ari kuasa mistik Antu.

ANTU NGAYANKA DIRI

Nitihka pansik Sains Spiritual, Antu tau dibagi ngagai dua kategori: 1. Antu – energi ari tubuh mensia ti udah parai @ roh ‘tubuh halus” 2. Antu jai: Sitan, Jin, Iblis, Sihir – ‘supernatural being.’ Tiap-tiap bansa di dunya tu bisi bansa Antu kediri empu lalu disebut ngena nama ti bebida: dalam English disebut ghost, specter, phantom, wraith, spirit, demon, genie, incubus, devil, etb bepanggai ba penyadi semengat mensia ti parai. Reti nya energi tauka roh mensia ti udah parai tau nyadi Antu Jai: Sitan, Jin, Iblis, Sihir, enti roh / semengat mensia nya alah laban Antu Jai @ energi negatif nya.

Mayuh orang nyebut, Saintis tauka mayuh agama enda pechaya bisi Antu di dunya tu: fakta tu enda nemban; salah. Utai ke amai iya nya sekeda agama tauka Saintis ukai enda pechaya tang sida enda nyebut nya Antu. Ambi ke chunto Saintis nyebut ‘energi eletromagnetis, energi negatif’ lalu bisi agama nyebut ‘supernatural being’ tu jin, iblis, Orang Bunian” , enggau ti bukai. Dua minggu ti udah, aku mai pemacha mansik 10 kebuah Antu ayan ba mua mata mensia dunya. Kelimpah ari nya, mayuh bansa Antu ti sengaja ngayanka diri tegal ti ngundang mensia ti kala ngangau, nguna tauka bebakih enggau sida nya. Bansa Antu ti baka nya tentu kala dikangauka Manang, Beliau, Bomoh, Dukun nyumanka sida ti tabin raya tegal ti dikachau Antu bukai. Nya alai maya sida ke tabin nya udah gerai, Antu lalu ngasaika diri udah diterima nyadi bakih mensia nya. Nya alai, tentu iya bisi utai dipinta ari mensia ti udah ditulung iya nya tauka iya seruran deka nyadi pangan mensia dunya nya tadi. Ambi ke chunto, mayuh kitai Iban ngaga niat sebelah batu, bukit tinggi, pendam misteri sereta tempat-tempat ti disadang diuan mayuh bansa Antu. Lebuh ti niat ba tempat nya, kitai Iban mai piring ading, manuk tauka babi awakka disayat ba endur nya.

Di Kalimantan sekeda bansa Dayak munuh uduk. Piring, manuk tauka jelu nya ti disayat awakka nyadi pemakai ‘korban’ Antu ti disembah tauka endur sida minta utai nya. Maya nya mega orang ti niat minta mayuh macham utai baka: sida ti tabin minta diri gerai, sida ti punas minta anak, sida ti peresa minta pas, sida ti seranta minta reta tengkira duit ringgit, minta tuah limpah sereta mayuh mih peminta bukai ti bisi besangkut paut enggau pengidup mensia di dunya. Kenu ku sida ti kala berandau enggau aku, enti dalam biau sampi sida nya besemaya deka malas utai ti dipinta sida nya, peminta sida nya jampat agi ulih japai sida.

SEMAMPAI NGIGA PELUANG BEBAKIH

Nya mih kebuah, udah niat ke dipinta sida nya datai, sida deka ngatur program ‘malas niat’ kena sida malas utai ti dipinta sida nya tadi. Nya mih kebuah, sema sida lubah tauka enda ingat malas niat sida nya tadi, bisi utai ti enda manah deka nyadi ba sida nya. Nya mih utai ti tau nyadi, ba sekeda kitai Iban ti enda bejimat-jimat lebuh ti ngaga kaul enggau kuasa mistik Antu. Kebuah baka nya, Antu endang semampai ngiga peluang bekaul lalu bebakih enggau kitai mensia. Sebaka enggau kitai mensia mega, Antu ti deka ngaga kaul tauka deka bebakih enggau kitai mensia endang bisi tuju sebaka enggau tuju sida ti deka ngayanka diri ba mua mata mensia.

Suah mega Antu ngayanka diri laban sida deka ngundang kuasa mistik paranormal baka ubat, leka puchau tauka pengaruh ti dibun kitai mensia dunya. Reti nya, endang agi mayuh kitai mensia dunya ti apin megai agama Kristian bisi ngibun utai nya. Kebuah Antu ti ngundang pengaruh tauka leka puchau ti diibun orang nya, endang enda ulih saut mensia dunya; lalu agi misteri. Sekeda ngumbai Antu endang deka nguji pemisa tauka ‘mencabar’ pengaruh tauka leka puchau ti diibun mensia dunya nya. Nya mih kebuah, selalu orang nyebut; mensia ti bisi ngibun pengaruh tauka leka puchau, suah meda tauka ninga Antu maya sida bejalai kediri sebelah babas, sebelah nengeri tauka di endur bukai. Kekadang sida nya suah, meda tauka betemu enggau Antu dalam mimpi tauka segenda datai maya sida kediri ba rumah diri empu. Enti utai baka nya suah nyadi, nya tanda orang ti bisi ngembuan kuasa mistik [pengaruh & leka puchau] nya patut ngibun utai nya ngena chara ti betul; ngena pengawa spiritual ti engkeman enggau agama tauka pengarap diri empu.

Ambi ke chunto, kitai Iban ti bisi ngembuan kuasa mistik baka nya, patut ngintu tauka merekat utai ti diibun sida nga ngena chara spiritual ti engkeman [Begawai tauka Bedara|. Maya nya sida patut mantaika piring ading nyayat manuk tauka babi ke pemakai ‘korban’ Antu ti bisi kaul enggau ubat tauka pengaruh nya. Nya alai, orang ti tau endur sida tu betanya pasal pengawa tu iya nya Beliau, Manang tauka Lemambang. Taja pia kitai patut ingat – Manang bisi dua raban / bansa iyang: 1. Iyang Bunsu Petara (Dewa) 2. Iyang Bunsu Antu (Kuasa Mistik Antu). Nya alai, pengawa spiritual ti bisi kaul enggau ‘alam ghaib’ baka tu ukai pekara mudah laban iya bisi besangkut paut enggau tiga kuasa mistik Petara (Tuhan, God Almighty), Bunsu Petara (Dewa, Diety) & Antu. Engka mayuh kitai kala ninga serabana tauka penusah sida ti bisi ngembuan objek misteri tu selalu ditinggang penusah baka: tabin misteri, mimpi rawan, gerau antu maya kediri, jai nasit / sial. Pia mega, selalu kitai ninga rita pasal pemarai ti nyelai sida tu. Tentu kitai Iban kala ninga rita pasal sida ti gila, tuyu pendiau tegal sida bisi ngibun pengaruh taring babi, taring rusa, tanduk pelanduk, etb.

Nama kebuah baka nya? Saut iya agi misteri…lalu bepanggai ba tikas spiritual Antu ti bekaul enggau sida nya. Taja pia, bisi ga pansik ti madah, kuasa mistik Antu dalam pengaruh, ubat tauka leka puchau ti diibun sida nya tau ngachau orang ti empu utai nya, enti objek mistik nya enda diguna tauka salah guna.

ENDA KEMPANG ATI

Suah mega kitai ninga rita pasal kitai Iban ti udah megai, agama Kristian ti agi ngibun objek kuasa mistik ‘alam ghaib’ baka nya baka: leka puchau Antu, ubat tauka pengaruh, enggau ti bukai. Sida enda kempang ati muai utai nya taja sida udah arap lalu nyembah Petara (Tuhan, God Almigthy). Nama utai ti patut dikereja sida nya? Pilih mih atas penyamai ati sereta pengarap diri empu. Buai ngena leka puchau, ubat tauka pengaruh nya gena chara alus, adat basa: lalu besampi madahka diri enda beguna kuasa mistik Antu tauka kuasa mistik Bunsu Petara nya agi lalu nyerahka diri 100 pesen ngagai Petara (Tuhan, God Almighty) dalam nama Lord Jesus Christ. Pekara ti bendar nitihka pansik agama enggau Sains Spiritual iya nya, kita mensia enda ulih bekaul enggau dua tauka tiga kuasa mistik nya begulai, saum. Kitai mensia patut milih satu ari tiga kuasa mistik nya. Sekali ke kitai pechaya tauka enda; utai nya endang baka nya – ‘It’s a fact of mistery’

Nya mih sekeda ari kebuah Antu manah tauka Antu Jai: Sitan, Jin, Iblis ngayanka diri ba mua mata mensia. Agi mayuh mih kebuah bukai tang enda alah sebut, enda alah pansik. Dunya Misteri Petara (God Almighty) tu endang enda ulih pansik mensia dunya enggau silik: lalu tetap nyadi misteri.