Laya enda badu tau nyadi pelajar

SAMPUK madah Ikan patut ditunggu laban selalu makai kaban sida.

KELIA mayuh macham utai nyelai nyadi. Bisi nya ngasuh takut, bisi ngasuh gaga ati lalu bisi mega ngasuh ketawa sereta mega bisi ngasuh pedis pala.

Sekali tu kitai bekunsika siti ensera ti tau ngasuh ketawa lalu tau mega ngasuh pedis pala mimit.

Ensera pasal laya sekeda utai idup nyengkaum sekeda jelu, burung enggau berapa bansa utai idup ngelingi sida sigi manah kena merindang ati bala kitai, tuai enggau nembiak.

Uji kitai belematika laya Enterekup, iya nya sebansa burung, enggau sekeda orang bukai munyi dalam cherita entudi tu. Pelaba penulis bisi bala pemacha kala bepansa enggau ensera laya sida tu.

PUN CHERITA

Cherita tu berengkah ari daun Terentang gugur ti ngujungka Enterekup lalu nutung. Nyadi ninga Enterekup nutung, angkat deh lalu ngajat ga jelu Pelanduk laban ti sigi manchal. Lebuh iya ngajat, dia deh jelu mit sereta lunchik kaki nya lalu tindikka mata anak Ringin.

Ulah tu ngujungka mata anak Ringin lalu buta. Naka iya pengeringat meh tudah Ringin meda anak diri buta tegal dindik Pelanduk mata iya. Dia Ringin lalu deka nunggu Pelanduk.

Iya lalu bejalai ngagai madang Buan ti alai Pelanduk belangkau. Lebuh Ringin nyenguk lebuh datai ba langkau Pelanduk, iya lalu ditanya orang empu rumah nya.

“Nama pejalai nuan unggal Ringin?” ku Pelanduk.

“Eh nadai pejalai bukai; tadi nuan ngajat lalu ngindik mata anak aku ti ngujungka mata tudah anak nya lalu buta. Nya kebuah aku datai ditu laban deka nunggu nuan.”

“Kati ku aku enda ngajat, Enterekup ga nutung. Nya alai manah nuan nunggu Enterekup,” ku iya madah ngagai Ringin.

Meda baka nya, bejalai ga tudah Ringin nuju endur Enterekup inggap. Lebuh Ringin datai dia, Enterekup lalu nanya iya.

“Nama pejalai nuan deh wai Ringin?” ku Enterekup nanya.

“Nadai pejalai bukai; tadi nuan nutung, nya alai Pelanduk lalu ngaja. Lebuh iya ngajat Pelanduk lalu ngindik mata anak aku ti ngujungka tudah anak nya lalu buta. Nya kebuah aku datai ditu laban deka nunggu nuan.”
“Oh enggai nyadi aku kena tunggu ulih nuan. Aku ti nutung nya ketegal daun Terentang gugur. Nya alai aku enggau ditunggu nuan. Manah nuan ngusung daun Terentang lalu nunggu iya laban iya ngepunka pengawa ti ngujungka penusah tu,” ku Enterekup.

Akai rai lalu enda ga tudah Ringin bulih deka nunggu Enterekup. Iya lalu mupuk bejalai nuju pun Terentang ba munggu siti. Lebuh Ringin datai dia, Terentang lalu nanya iya.

“Nama main nuan Ringin?” ku Terentang nanya.

“Nadai main bukai,” ku Ringin. “Tadi daun nuan labuh gugur. Meda daun nuan labuh, dia Enterekup lalu nutung. Ninga tutung nya, Pelanduk lalu ngajat. Lebuh iya ngajat, Pelanduk lalu ngindik mata anak aku ti lalu ngujungka mata tudah anak aku buta. Nya kebuah aku datai ditu laban deka nunggu nuan.”

“Kati daun aku enda labuh, batang aku ga diempa Sampuk. Nya alai enggai aku ditunggu nuan. Patut nuan nunggu Sampuk,” ku Terentang.

Ninga nya, mansang ga tudah Ringin ngagai rumah sereta pendiau Sampuk. Meda Ringin datai dia, Sampuk lalu nanya. “Nama pejalai nuan Ringin?” ku Sampuk.

“Nadai penemuai bukai,” ku Ringin. “Tadi nuan makai batang Terentang. Udah nya daun Terentang lalu labuh gugur. Meda bakanya Enterekup lalu nutung; Pelanduk lalu ngajat. Lebuh iya ngajat, Pelanduk lalu ngindik mata anak aku. Nyadi nya ngujungka mata tudah anak aku lalu buta. Nya meh penemuai aku kitu laban deka nunggu nuan. “

Nyadi ku Sampuk nyaut: “Kati ku aku enda makai daun Terentang, aku ga merinsa ati. Diau aku di tanah diempa Jugam. Nurun aku ke ai diempa Ikan. Nya alai enda patut aku ditunggu nuan. Lebih manah nuan nunggu Ikan.”

Enda ga tudah Ringin nyadi nunggu Sampuk.

NGIGA IKAN

Berindik aku jaku Sampuk munyi nya tadi, Ringin lalu beguai-guai bejalai ngiga Ikan ti diau dalam ai. Datai ba tebing ai, Ikan lalu nanya pejalai Ringin.

“Nama utai dipadahka nuan Ringin?” ku Ikan nanya.
“Eh nadai utai bukai dipadah, semina aku deka betemu enggau nuan,” ku Ringin.

“Tadi nuan makai Sampuk, nya alai laban nuan makai iya, Sampuk lalu makai batang Terentang. Udah nya daun Terentang lalu gugur. Meda daun Terentang gugur Enterekup lalu nutung. Ninga Enterekup nutung, Pelanduk lalu ngajat. Lebuh iya ngajat dia deh Pelanduk lalu ngindik mata anak aku. Tegal nya mata tudah anak lalu buta. Nya alai aku datai ditu laban endang sigi deka nunggu nuan,” ku Ringin madah ngagai Ikan.

Ninga nya, Ikan lalu nyaut: “Kati ku aku enda makai Sampuk, aku ga nadai utai bukai dipakai. Mudik aku kulu tama bubu, undur aku kili tama ensenga. Belalai aku ba lubang batu disepit Gerama. Nya alai aku enda ngisi tunggu nuan; lebih manah nuan nunggu Gerama. Laban nya tentu Gerama ke nuduk sereta ngepunka laya tu.”

Nyadi lebu ga tudah Ringin ti deka nunggu Ikan.

Ninga jaku Ikan ti madah diri enggai disepit Gerama ba lubang batu, Ringin lalu terejun kea i ngiga Gerama. Datai iya ba lubang batu siti ke besai bendar, dia iya meda sepit Gerama rangang-rangang ngipa Ikan ke tama.

“Nama kebuah nuan ngiga aku deh Ringin?” ku Gerama nanya iya.

“Bisi kebuah meh aku ngiga nuan deh Gerama. Nuan nyepit Ikan, iya lalu makai Sampuk. Lebuh Sampuk nemu kaban diri udah diempa Ikan, sida lalu makai batang Terentang. Udah nya daun Terentang lalu gugur. Meda daun Terentang gugur Enterekup lalu nutung. Ninga tutung nya, dia deh Pelanduk lalu berengkah ngajat. Lebuh ti ngajat dia iya lalu ngindik mata anak aku. Tegal nya meh mata tudah anak aku lalu buta. Nya alai aku datai ditu endang sigi deka nunggu nuan,” ku Ringin.

“Enggau aku,” ku saut Gerama. “Enggai aku ngisi tunggu nuan.”
“Iya nama kebuah nuan enggai deh?” ku Ringin.

“Aku enggai laban laya tu ukai beduduk ari aku.”
“Ni tau ukai beduduk ari nuan. Nuan tentu nyepit Ikan,” pia ku Ringin ga.
“Oh nadai iya baka nya. Ukai aku ngepun. Laban ukai aku ngindik sereta lalu ngemutaka mata anak nuan.”

“Amat nuan ukai ngasuh buta, tang nuan meh ti nyepit Ikan.”

“Sigi enda sekali-kali aku ngisi tunggu nuan,” ku Gerama. “Laban nuan nyangka aku ngapa.

“Enti bakanya lalu besumpah nyadi munsuh meh tua ari diatu ngagai jemah ila. Semadi mata duku nyau nyendaun lalang ila baru tua badu belaya,” ku Ringin.

“Enggai nyadi bakanya. Orang ti munsi tubu, tua balut miang,” ku saut Gerama.

“Nadai tau enggai, laban nuan meh munsi tubu, nuan meh balut miang.”

TERUS BEMUNSUH

Nya alai berengkah ari nya sampai kemaya haritu, Ringin enggau Gerama endang mengkang bemunsuh.

Bala orang ba menggeri nyangka agi mayuh tanda tanya, tang bala nembiak ari menua ulu, kelebih agi bala ti suah nengah jalai babas endang suah mansa tai Ringin ti balat bebau; kebuah pia laban tai nya jumbuh kerubung Gerama ti udah dipakai sereta dikunyah Ringin lalu dikemira iya ba tisi jalai anak mensia. Nya kena iya madah ngagai dunya mensia, laya Ringin enggau Gerama agi mengkang terus dipejalaika.

Taja pan kitai mensia udah beperang, bekayau sereta belaban enggau pangan diri, kitai nemu bebaik enggau pangan lalu enda nyadi munsuh selama-lama iya ngagai ujung dunya. Kitai mengkang bisi mayuh pengelebih ari jelu.

Oleh TELESA EMPERAN