Besai Batang Ubi; Mit Chabi Padi

GAMBAR pengiyas

PINSIL SARATOK

Tusun Kesatu

SITI jaku dalam Iban nyebut: “Iya ke besai belandikka penegar; iya ke keredi nyabung pemintar.” Jaku dalam tu mai reti iya iya ke besai gamal nguna penegar tulang sereta pengering rekung dikena iya ngepam orang ke sama-sama besai gamal baka iya, tauka tudah ke mit agi gamal ari iya; tudah ke mit gamal ke keredi nyabung pemintar runding enggau pemesai akal iya dikena iya ngalahka orang ke belandikka pengagah tulang, pengering rekung enggau kuasa iya. Sebengkah agi jaku dalam Iban nelah: “Besai batang ubi; mit chabi padi.” Reti jaku dalam tu iya nya besai gamal ngapa tang nadai pengering, lalu dibanding enggau orang ke mit gamal tang bisi pengering enggau pemintar.

Kenu ku leka ensera tuai dulu, sekali dalam musin kemarau, mayuh bendar bala jelu begempuru ba emperan siti ba kaki Bukit Merebung Bungai. Bukit nya sigi bukit ke tebilang kena pansa leka ensera ke ditusui orang ke tuai dulu. Kebuah jelu ke begempuru dia, laban deka ngulu sebengkah pengerami ti alai sekeda bala jelu berujika pengering.

Jelu ke bisi nguang kia ukai anchi pemayuh-mayuh. Jauh mayuh ari beluh di Rantau Kepayang, banyak ari lemetak di Tinting Banjang, banyau ari likau genggam meranggang. Ni ke besai, ni ke mit. Ni ke indu, ni ke lelaki.

Ni tuai, ni ke biak. Ni ke bujang, ni ke dara. Bisi bala jelu ke dia, baka sida rimau, sida badak, sida gajah, sida chemaru enggau sida mayas, datai ketegal deka enggau berujika pengagah. Tang kemayuh agi jelu ke begulu dia, baka sida nyumbuh, sida kijang, sida babi, sida landak, sida angkis, sida tengiling, sida kera, sida rasung enggau sida batih, ketegal deka meda bala jelu ke beruji ngambika nemu bagi jelu ke nyulut pengagah ari semua jelu ke diau dalam kampung luar nya, rambau nya.

BERUJI PENGAGAH

Huh! Ukai anchi-anchi penyapuh, pengeriuh bala jelu ke dia. Lebuh semua jelu udah terenah datai, dia Raja Seliman (singa), lalu nyebut bagi sida ke udah masukka nama enggau beruji pengagah. Iya ke dulu bendar ngemasukka diri nya Gajah. Ditangkanka Chemaru. Udah nya Badak. Udah nya Rimau. Bansa ular, semuti Sawa berani enggau. Udah Raja Seliman nyebut nama sida jelu nya tadi, iya lalu bejaku baru, nentuka nyangka agi bisi sida bukai ke deka enggau beruji tang mih apin ngantung nama. “Kati agi bisi ari kitai mayuh tu, iya ke ngasaika diri gagah, tang apin ngantung nama?” Lebuh nya Tekura ke duduk ba selepak bandir meranti tepedaka bindu ke udah setengah dilamun daun kayu ba selepak bandir meranti ke sepiak iya.

“Tentu nya bindu anak mensia ke enda ingat dibai iya pulai lebuh beban ditu suba,” ku ati Tekura. Iya lalu nyigul Pelanduk.

Tekenyit kena sigul, Pelanduk lalu nengir. “Lapa iya tu tak sebarang sigul!” Lalu dipelutka iya mata ngagai Tekura.

“Alai Sambi, nuan nguji!” sadang Tekura.

“Bah, lapa nuan-empu enda dih!”
Tekura enda terus nimbal Pelanduk. Tak pansut mih jaku iya, lalu ditujuka iya ngagai Raja Seliman.

“Hemmm!!” ku Tekura dulu nerakan. “Bisi, Raja! Tu iya, Pelanduk! Iya tu bisi ati deka enggau beruji, tang mih iya malu madahka diri deka!”
Ninga nya, bala jelu lalu chapuh ketawa sambil merening ngagai Pelanduk.

Sida ukai semina ketawa tang mih nyau ngelenyai, betatika iya ke ngelusing nya belayan, berani-rani deka enggau beruji ngelaban jelu ke besai, ke endang ditemu gagah.

Pelanduk empu nyau temati-kutu berundingka diri empu ke tak disuika Tekura bansa nya. Disanggup enggai nyadi, enda disanggup pen lebih agi ga enggai nyadi, laban enggaika dikumbai nyau ngelanyaika atur Raja. Nya mih tak sereba salah: ditelan parai apai, dilua parai indai.

“Nuan tak macham-macham, Sambi….!” ku Pelanduk nganu Tekura. Pelanduk lalu bejaku ngagai Raja Seliman. Ku iya, “Ka pan enda, Raja Besai, ga udah kena pilih. Nguji ngapa mih tu! Tang ti alah, ukai nya baka ke ditunu dih!” Mua Pelanduk muche-uche ngapa. Bala jelu merening ngagai iya magang-magang, betatika gamal iya ke ka mesai buah tekang tak berani deka nyatup orang besai, orang kering baka bala sida Gajah, sida Badak.
“Hum, tak keruan enda iya! Tak enda ngipak-ngipak!” ku ati sida.

Raja Seliman empu pen nyau ketawa alam ati, ngerundingka pengemit gamal Pelanduk, tak besai amat chakap ati. Mit pan gamal enti tak kala udah dipeda empa, isa ga agi, ku ati Raja Seliman. Ke tu, ku ati Raja, tak enda kala ninga rita ingkat ke laut. Raja lalu bejaku. Ku iya:
“Nya mih, minta semua kita ke deka enggau beruji nya mansang ke mua kia ke,” ku atur Raja.

Dulu Rimau angkat, lalu engkechit, mansang ke mua. Iya ga endang jelu lanchat. Ke mua ga Badak. Lalu ditangkanka Chemaru. Lalu ngasur ke mua ga Sawa. Mansang ga Gajah. Nyau bigap-bigap pejalai Gajah sambil miau-miauka belalai iya. Kepenudi bendar, baru tudah Pelanduk junuk-junuk mansang ke mua. Sereta Pelanduk masuk, bala jelu – mit besai, indu lelaki, tuai biak – lalu nebah nyawa belaluka iya. Sida nyemaleka iya. Pelanduk enda ibuhka diri ke disemaleka, laban runding iya antara sedar enggau enda. Iya tembu layap berundingka chara iya ulih mantaika pengering diri ngagai semua jelu.

Betampung…