Anang ngerichau sebarang leka lagu

JENNIFER Jack enggau bala artis bukai benung macha nama orang menang ba siti bagi di AMD 2016 suba.

MAYUH bala peninga mengkang enda puas ati ninga leka tauka lirik dalam sekeda lagu artis rekoding ti agi mayuh endar sebarang embal.

Bisi mega nya seneka ati ngaga. Leka lagu bakanya patut digaga manah agi awakka nyamai, ngena sereta nyemetak didinga.

Asal iya setimbal, munyi ti ngena aja, laban mayuh peninga nadai entu bedulika reti enggau pengena leka lagu nya. Mayuh ga lagu ngena jaku tauka leka diambi ari jaku Melayu tajapan endang bisi jaku nya empu dalam jaku Iban. Ambika banding leka tauka lirik baka ‘syurga’ patut iya ‘serega’, ‘dunia’ patut iya ‘dunya’, jaku ‘cinta’ nadai dalam jaku Iban tang tau ngena ‘penyayau’ tauka ‘pengerindu’. Nadai mega jaku kitai Iban baka ‘paling’ tang bisi dikena sekeda penanyi dalam leka lagu sida. Mayuh agi leka bukai dikena awakka setimbal lalu kena ngenyukupka sada lagu siti-siti.

Laban nadai orang tauka kuasa nyemetak ditaga kena meresa, napis lalu nentu leka lagu nya betul, nya alai lebuh lagu nya dirikot sereta dipasang ba radio tauka dimain peninga, dia deh sekeda leka lagu nya berupai enda ngena, enda betul dikena sereta enda manah reti tauka ngemai reti ti negatif.

RANDAU ENGGAU PENANYI

Dulu ari tu Sada Sarawak bisi berandau enggau penanyi ke begelar Mama Rock, iya nya Rosiana Urai, ke mega tukay studio rekoding Urai Productions di Sibu.

Urai madah, bisi sekeda lagu Iban baru diatu ngemai reti ti numbas iya pengena, iya nya tau dikumbai kitai ‘negatif’ taja pan jaku dikena nya nadai salah.

“Ambika banding, bisi leka lagu ti madah indu nya enggai pulai puang, enggai pulai nadai utai ulih. Reti nya bisi negatif, laban indu nya enda tau enda bulih utai…lalu nama utai nya, kitai empu nemu nyagam reti nya,” ku Urai bejaku enggau penulis sereta madah diri, taja pan ukai bansa Iban, tang mereti bendar pasal jaku Iban.

“Leka lagu kitai enda patut nyilup reti ti enda manah, laban taja pan leka jaku nya setimbal, tang ukai reti semua jaku nya ngena magang, lalu kami penanyi kala mega dikempelin tauka dibantah ulih bala peninga laban ngena leka lagu ti ngemai reti ti enda manah, iya nya reti ti negatif,” ku Mama Rock ke lama udah tebilang enggau mayuh lagu, nyengkaum Lauk Kitai, Agi Bisi Tedai Pengerindu sereta enggau mayuh lagu bukai kelimpah ari ke nyapu menang semua kategori lagu Orang Ulu ba semekih Dayak Music Awards (Dama) 2008 ba Hotel Crowne Plaza Riverside, enggau Anugerah Muzik Dayak (AMD) 2010 di BCCK suba.

Iya mega bisi dikangau merindang bala mayuh ba pengerami renggat penudi AMD 2012 di Unimas. Taun 2016 ba pengerami ke sebaka Urai nadai dipeda enggau. Nya meh taun penudi AMD diatur.

“Kekadang ukai salah penanyi tang penyalah tauka penyaru orang ke ngaga leka lagu nya, laban komposer lirik ke ngaga lagu, ukai penanyi. Bala kami penanyi mina belagu aja,” ku Urai taja pan madah iya empu mayuh ngaga leka lagu ka iya empu enggau sekeda penanyi bukai, kelebih agi penanyi Orang Ulu.

Penanyi veteran Datin Senorita Linang  mega setuju enggau penemu Urai lebuh dirandau sereta ditanya penulis apin lama.

SETUJU MUTARKA CHELAK RUMPAK

Ketuai Gerempung Artis enggau Pemusik Dayak (DAMA) Datuk Snowdan Lawan ke mega nyadi Penulung Menteri Lumba enggau Main mega sama setuju enggau penemu seduai nya tadi.

“Leka lagu ti enda manah reti tauka negatif tau ngemaruhka lagu Iban. Bala penanyi patut nyeliahka diri ari ngena leka ti bakanya. Mayuh jaku ti manah patut dikena ari ti ngena leka negatif, leka mai reti kurang meruan,” ku Snowdan lebuh ditanya Sada Sarawak senentang penemu iya dulu ari tu.

Kelimpah ari nya Snowdan mega bisi ditanya senentang penemu iya bekaul enggau pengawa nyelak tiru tauka ‘chelak tiru’ dalam industri musik Dayak, kelebih agi musik Iban.

“Agi mayuh bendar orang ke ngaga salin VCD tauka CD ari original nadai pemendar laban sida keran deka ngulihka untung ngena chara ke jampat ngagai sida empu aja.

“Pekara tu ukai semina ngemai pengerusak ngagai industri tang nadai ulih ngenataika untung ti chukup ngagai bala penanyi ke ngelamatu udah bebendar ngemansangka diri,” ku Snowdan.

“Ngambika industri musik Dayak terus maju sereta nguntungka artis mayuh, pengawa nyelak rumpak patut diketuka diatu,” ku Snowdan ti mega Kaban Kunsil Nengeri Balai Ringin (ADUN).

Sebedau tu Sada Sarawak kala mantai ripot pasal sekeda bala artis Iban ke sama sepenemu enggau Snowdan dalam pekara nyelak rumpak tu.

Penanyi enggau tukay studio rekoding lagu Iban Jennarino Jeraki bisi betemu enggau Sada Sarawak dulu ari tu, megamadah pengawa nyelak tiru VCD album lagu Iban siti penanggul besai dalam dagang industri musik Iban. Pengawa orang ke mina ngerunding diri empu deka ngambi untung jampat nya balat bendar ngerusak dagang nyual album VCD lagu Iban.

Jennarino ke begulai enggau indai tuai iya Jenny Tan (JT) sama ngempu Golden Pearl Recording Studio (GPRS) di Kuching ditu madah sida sigi enggau naka ulih deka ngemunaska ulah orang ke bakanya, tang nadai tentu jalai laban ukai siku dua aja.

“Diatu dagang kami berupai bendar surut bebanding enggau dua tiga taun ke udah. Enti suba, kami senang aja nyual siti album ngagai lima enam ribu, diatu ngagai tiga ribu siti album pan pedis,” ku iya lebuh betemu enggau Sada Sarawak dulu ari tu.

Kelimpah ari Jennarino seduai Jenny, Sada Sarawak mega bisi berandau enggau Lemambang Lemai ari Era Music Production ke sama setuju enggau penemu nya tadi.

Lemambang Lemai ke tebilang laban lagu Babe, madah ulah nyelak rumpak endang siti pengawa jenayah ke patut ditangkap sereta didawa ba kut.

CHELAK RUMPAK MERI PENGERUGI

Penemu tu mega disetuju siku agi penanyi enggau tukay studio rekoding ari Sibu, iya nya Cikgu Lembat Imban ti dikelala agi enggau nama Embat Lala, iya nya orang ti ngempu Panggau Buluh Pengerindu (PBP) Studio Productions. 

Iya ngarapka ketuai DAMA Snowdan enggau bala komiti enggau naka penyampat mutarka sekeda pekara ti nekul pemansang industri musik Dayak.

Kerekai musik kitai Dayak diatu ku Embat, sigi udah meraka garis menua ke Brunei, nyengkaum Semenanjung lalu anang nyebut agi, nyentukka Kalimantan laban bala Dayak di menua nya endang udah maju dalam industri musik sida kelimpah ari ke bisi lebih lapan juta bala raban bansa Dayak di Kalimantan Barat.

“Nya alai nadai kebuah bala artis kitai enda ulih idup senang lantang ari untung ulih sida ari musik enggau lagu sida enti penyakit riman nyelak tiru tu ulih diputarka,” ku Embat lebuh berandau enggau penulis apin lama.

Ungkupka penemu bala pemacha mayuh, DAMA udah mujur deregister dalam taun 2010 suba lalu udah ngatur empat iti AMD, iya nya dalam taun 2010, 2012, 2014 enggau taun 2016 suba. Patut dalam taun 2018 suba endang seiti agi AMD tang bisi penanggul mimit ngujungka iya enda nyadi. Lalu kenyau ari pun taun 2020 tu tadi tegal Kubit (Covid-19) pengawa nya lalu tejanggal, enda ulih diatur.

Bala artis kitai Dayak, kelebih agi bala kitai Iban endang dipinta sama masuk nyadi kaban DAMA ngambika bisi alai nyurukka diri maya ke begunaka sanding penemu enggau saup dalam karier musik sida.  Snowdan tu endang dikarapka nyadi ketuai ke landik matak jalai mensia mayuh ba gerempung nya lalu patut diberi sukung enggau kerejasama ari bala artis Dayak.

Oleh TELESA EMPERAN