Cherpan: Karam Di Darat

JANTAN UMBAT

“BAKA tu aya, Tuai Rumah. Kami enda ulih lama. Kami deka ngeripot di opis jampat. Nya alai kami deka mupuk. Tambah mega kami deka ngabas Siba seduai Jugi,” ku Tuan Bomba.

“Pia mih. Pengari kami bisi mih kin lagi. Diatu kami nganti penatai bantu ari Opis Pengelantang Mensia Mayuh,” ku Tuai Rumah.

Van Bomba mupuk. Enda lama udah nya, van nya nadai agi dipeda. Sida serumah endang tadi udah lama cherayan-cherayan mulaika diri ngagai ujung bilik tapak rumah diri meresa amau enggau kerimpak perengka ke udah diempa api. Sinu meda. Sida bela nganti bantu ari Opis Pengelantang Mensia Mayuh.  Beras enggau pemakai semua udah nyadi abus. Sida sebuat bela ngintu sereta merindang ati diri ke bechampur sinu, tusah sereta irau. Sepemanjai umur tu dalam mimpi pan nadai mih kala dituntung penusah baka tu. Nadai sekali terundingka penusah karam di darat tu tau nyadi ba sida. Ngelama tu semina seruran ninga penusah tu nyadi ba menua bukai, ba orang bukai.

Tuai Rumah Jang nukung. Petara aja nemu asai penusah ati iya. Iya bisi lantang mimit lebuh nganggapka semua tu penguji besai. Nyangka bisi utai manah tau nyadi udah lempus penguji tu kini. Iya amat-amat nyerahka pengidup sida serumah, sida sekaban ngagai Petara ti pemadu bekuasa. Iya amat-amat nyuaka pala, nyurungka patung, ngagai Petara madahka ma ke dibai sida balat berat; madahka sida pengabis aus lalu minta sapi tengkani Petara sambil minta Iya ngampun dosa sida semua awakka ulih neruska pengidup ti tetap penuh enggau penekul sereta penanggul udah tu ila. Tuai Rumah tak nemukul ba teluk palan arau; nyau tetinduk-tinduk.

Tuai Rumah Jang ensugau, ka-ka ngigau lebuh ninga orang begau lebuh lori orang ari Opis Pengelantang Mensia Mayuh datai. Sida komiti rumah panjai kisuh ngatur barang ke diterima awakka diberi ngagai sida serumah. Penatai lori nya ngelantangka ati sida sebuat. Mujur sida jampat mutarka nya. Enti sida laun bisi enda berasap dapur arau sida.

Udah nya orang begau baru. Sida berebut nanya berita tudah Siba dibai Jugi. Sida berasai lapang di dada nemu Siba enda balat betu laban api nya semina nganguska baju iya. Nasit, betu nya enda balat. Taja pia, iya agi ditanka di sepital. Jugi nusui seduai iya Siba bisi digusung Tuan Bomba. Jaku seduai udah direkod pemesai nya.

NYURUKKA DAIE, NYUAKA JARI

 Lemai nya sida sebuat ngenduh ba dunju arau digaga beguai ba tapak bilik diri empu. Malam tegayam ditambahka tapak rumah ke uram-uram. Lemai nya mega tudah Jugi enda tantika Siba pansut ari sepital, betemu enggau Tuai Rumah enggau Sapit Tuai Rumah berandau dalam penerang lampu kelita.

“Nyadi aku tu bisi pejalai laban ati tu balat enda nyamai; udu tusah. Aku tu nyurukka daie, nyuaka jari, nyurukka siku nyuaka bau, nyurungka pala, nyuaka tapa ngagai kita ke tuai enggau kitai serumah. Aku minta ampun kenyau ari punjung pala datai ke tapa kaki laban penyalah diri. Nya alai, apa-apa tunggu ti patut dilabuhka ba aku, aku besedia deka ngisi. Enti tunggu nya tak kelalu berat, tak sebarang daya enggau kira mih aku ngisi, ukai baka kita enda nemu aku dih. Amat tak enda disadang-sadang penusah kitai bepuncha ari pengilap enggau pemalui aku,” ku tudah tuai enggau sabak-sabak.

Tuai Rumah enggau sapit iya tak nyau sedu asai. Tak nadai kala ninga bansa tunggu ba penusah baka tu.

“Bah kati ku Igat?” ku Tuai Rumah nguing ngagai Sapit iya.

“Nadai tak nemu aku. Nyau buban bulu pala tu nadai kala nyadi utai baka tu,” ku Igat. Lama sida tiga bela enda bemunyi.

“Pia ku tu Ugi. Nadai jalai aku ngukum nuan laban ukai baka nuan tak sengaja. Pengabis ila nuan tak ngampun ba mua mayuh maya kitai udah sampal bisi ila. Asai ba aku, nuan minta ampun lalu nunggu diri empu ngena chara lama. Nuan nyendiaka besi sebilah ke kering semengat kitai ke udah liar. Nambahka nya nuan nyendiaka manuk dua iku nyadi babi tuduh dikena ngenselan tanah rumah lalu nyadi chara ngampun ngagai aki ini kitai ke ngentak rumah tu kelia laban sida iya menya apin Kristian. Ke bala kitai, ila kitai minta padri datai nyembiangka kitai.

Nyadi nuan baka nya ga Ugi, anang tak kelalu balat tusah ga  laban kitai mensia idup tu sapa ke enda salah tang kitai beampun-ampun pangan diri.awakka runding kitai enda pechah. Kitai nerima penusah tu nyadi ke pelajar kitai. Kitai udah benasit nadai bebadi nyawa.  Anggap penusah kitai ke karam di darat tu siti penguji besai ti tau ngelancham runding kitai awakka tajam, kering sereta juring ngidupka diri, munyi ku sempama, Seagi-agi bekulit, seagi-agi bedaki. Enti bisi utai ke jai ngachau ngeregau, tentu bisi ga utai manah deka nyenuah datai nyengenda nyerupa ke dudi hari ila lalu ngasuh pengidup kitai menyana agi lalu kitai gerai nyamai, gayu guru nguan menua”.

Oleh JANTAN UMBAT