CHERPAN LALAU PENDIAU Besai Batang Ubi: Mit Chabi Padi

Tusun Ketiga

 “OOO, agi gerah!” ku Pelanduk sambil ketawa ringik-ringik.

“Manah!” ku Tekura sambil nganggut-nganggutka pala. “Uji alit baru lubang bur nya ngena abuk kayu ngambika iya enda regian dipeda.”

Pelanduk lalu melali lubang bur ngena abuk kayu bekau bur. Lalu tudung iya ngena daun mati. Nadai berupai mimit sentang lubang bur.

Tekura lalu ngajar Pelanduk pasal langkah ke patut dibantaika iya lebuh beruji pagi siti.

“Lebuh beruji pagila, nuan mesti minta diri kepenudi bendar ngambi gintir. Lebuh Raja ngangauka nama nuan, nuan lalu mansang ke mua, Sambi. Datai di mua, nuan mesti muka sembah, nyembah Raja Besai. Abis sembah, anang guai dulu belabuh. Nuan mesti mantaika puchau…”

“Nadai aku tu nemu puchau. Sambi, tak mayuh penumbuh,” timbal Pelanduk, nyelepak jaku ajar Tekura.

“Eh, ukai pedis nyebut puchau ‘berangan balut’!” tampung Tekura. “Dinga nuan puchau tu dih:

Hai, gerasi langit, gerasi bukit, gerasi tanah, gerasi tasik!

Datai kitu nulung, mandung aku.

Asuh darah aku nyadi kah

Urat aku nyadi kawat

Tulang kaki aku nyadi besi

Poooo!!!

Jam muchau, nuan mesti murus-murus lengan enggau betis. Apus leka puchau, lalu tempap nuan dada diri tiga kali. Lepas nya, baru nuan belangkah. Engkechit. Terus nerajang bandir.”

Nagun-nagun pala Pelanduk, ngauka ajar Tekura. Udah lubang bur sikap, udah ajar Tekura sikap, baru Pelanduk seduai Tekura bejalai baru ninggalka midan penguji. Seduai lesap ke dalam babas. Pelanduk limpang ngiga buah enggau sekeda leka kayu ke empa. Tekura pen baka nya mega, berampas ngeriting daun riang ke empa.

Tawas hari siti, bala jelu, nyengkaum sida ke deka enggau beruji, pen nyau natai-menatai ba pun keladan. Babas bekeserap, kayu bekeguyat laban bala jelu ke ngemayuh-mayuh nya begempuru dia. Lalu bala burung enggau bala ular enggau semua jelu ke bisi nemu rita, mega bisi datai, laban keran deka nemu bagi jelu ke nyulut gagah ari semua jelu.

Iya mih mata panas nyauka tengan tinggi, bala jelu lalu bediri magang, nabi penatai Raja Seliman. Raja nya beempuka tanggung pengawa ke nyiri jelu ke pemadu gagah ba pengujung pekit nya. Iya lalu duduk ba tempangan penyau, endang penuduk iya sehari dulu ari nya.

Udah semua jelu diau jenuh, Raja Seliman merintah pekit berengkah. Pelanduk dulu dipinta iya mungas menalan.

“Pelanduk, nuan mungas menalan. Bantaika pengagah nuan!” perintah Raja Seliman, ke benyawa rap-rap. Datai ke tanah nyau berasai begegar laban rap nyawa iya.

“Enda ulih aku mungkal kelang, Raja Besai,” saut Pelanduk tekala nya.

“Lapa??” tanya Raja, nerengak.

“Ketegal ari mimpi, Raja Besai. Ba kenyap aku dimalam, Apai madahka, semua pejuru kami Pelanduk mali dulu dalam semua bansa pekit. Dudi bendar, tau!”

Raja Seliman murus-murus gumis aja, tang enda pansut jaku. Lepas nya, baru iya ngangauka Sawa pansut ke midan. Sawa enda beleman, lalu pansut ke midan.

“Ingat!” ku Raja Seliman. “Tuju pekit tu iya nya ningkar, tauka ningkil, tauka, ngebuska bandir keladan nya. Kita semina tau numbit, tauka nerajang, tauka numpu bandir nya ngena kaki, tauka, ngentung ngena pala.”

RAJA SELIMAN NGANGAUKA REMAUNG

Sawa besedia. Tubuh iya dulu diterikika iya. Nama agi dih, ngenying besenggal-senggal bingkul isi Sawa, baka buah petai peku. Baru iya ngatur sengkilung. Iya ngesaika diri ari sengkilung. Baru pala iya ngua enggau naka penguat, ngentung bandir keladan. Bedegum bandir kena entung, tang nadai puri mimit. Ga semuti ngasuh utai peda tudah Sawa bechut-lut. Nyauka bulih setengah batang ruku tudah Sawa tak nejui jenuh, natka pemedis pala. Udah nya, baru iya dapat mupuk ngelantar pulai ke tisau midan. Enda alah mih nya, ku ati Sawa.

Nangkanka Sawa, Raja Seliman ngangauka Remaung. Ada merejuk Remaung ke mua. Iya lalu mantaika ikas pengering diri numbit bandir keladan. Nyau segum-segum bandir nya ditumbit Remaung, nadai ga nya puri. Kulit kayu nya ke bisi rajai ukai ketegal kena laban tumbit, tang nyau dikeramak Remaung, alai iya mantupka pemedis ati diri ke enda tetingkarka bandir.

Badak nangkanka Remaung. Tumbit Badak ukai main penguat, nyau pechah magang kulit kayu keladan seengkapan tumbit iya ke terengkah. Tang enda ga tetingkilka bandir kayu nya.

“Uji aku ga, Tuan Raja,” pinta Chemaru, ke luntap-luntap mansang ke tengah midan.

“Ujika dia mih!” saut Raja Seliman. Iya masih duduk jangah-jangah ba tempangan penyau.

Lalu angkat belambai Chemaru, terus nerajang bandir keladan. Terajang iya kuat agi ari enggi Badak. Kulit keladan bisi pechah, lalu daun keladan bepuluh lambar pen bisi mega gugur ke tanah. End alah ga bandir keladan nya ditingkarka Chemaru

“Bah, Gajah, gintir nuan tu!” ku kangau Raja.

Tak lalu ditebahka Gajah nyawa. Nama kenu, nyau munyi nyawa terumpit ke beratus iti bereta disepu, empa penginggar nyawa gajah. Pansut iya ke tengah midan. Biauka iya belalai dikena mansutka isin. Lalu entakka iya kaki. Nyau berenyang asai tanah dientak Gajah. Nya baru Gajah beruntu belanda surut. Tak lalu ditumbit iya bandir ngena kaki belakang. Tumbit. Tumbit. Tumbit! Bandir ngenying degum-degum. Kulit kayu teperanchit kia-kia. Daun keladan mayuh gugur. Rangkang enggau sekeda dan keladan ke jelan pemesai patah, ruyak, lalu beketepak labuh ke tanah. Nyadi bandir keladan dianti tingkar, enda ga nya tingkar.

“Nah, Punggal!” ku Chemaru nganu Badak, “enti tua tu udah enda ulih ningkarka bandir nya, orang bukai pen, enda mih nya alah! Ti agi tulang makai asi, bisi pen belebih, mimit aja mih ari pangan, Punggal!”

“Sigi pia, aa!” saut Badak sesetengah demuh.

Tak lama Gajah nyeling Chemaru, ninga sindir siku nya. Bisi-bisi ati iya deka bejamah, nyau ngerunding Raja Seliman ke bisi dia.

“Naka ulih aku mih nya, Raja Besai,” ku Gajah, lalu meremi nyembah Raja.

Betampung …

Oleh PINSIL SARATOK