Cherpan: MANDI DARAH

Tusun Kesatu  

RAMPA menua di rumah panjai sida di Rian Mipau Umbang kenyau ari tumu pagi tadi udah chapuh riuh. Dini-dini alai orang bisi pengawa. Munyi tabuh enda ngetu betalu-talu. Raban sida ke betabuh nya majak nebah bebendai enggau tawak munyi ke begawai. Munyi tabuh nya nyau rentak-rentak ragak. Nya ukai tabuh ajat laban nadai didinga munyi terachat pankung engkerumung. Rentak tabuh nya endang setipak enggau rentak ngiring orang bejalai; maya ngiring orang mayuh maya bisi nikika pengabang. Tabuh nya suah dikena ngiring raban orang mai indu lebuh pengerami ngambi indu. Ke sekali tu iya ditebah dikena ngiring Johnny seduai Jane tauka JJ munyi jaku tundi pangan seduai iya. pansut ari bilik, niti ruai sepemanjai rumah lalu terus ngagai pendai.

Ba bilik lumur 16 Johnny benung begari masukka ngepan asal Iban. Dipasukka iya sirat dua kali melit punggung beiku rerundu engkabung jumbal burit. Dipasukka iya gagung kulit rimau dan ti engkeman di tandan bau nukang. Pala iya nyau repa; ditangkupka labung diselit enggau lelaga bulu tajai enggau burung kenyalang. Buah lengan iya tanggam rangki cheli-cheli udu engkeman. Betis iya rasuk engkerimuk diselat unus alus digaga ari runut aping pengerang. Enda naka nya, Johnny nangkin sebilah nyabur chudur, sentagai iya dilagu enggau kekambu bulu burung. Johnny naka penyigat orang bujang ngena ngepan Iban nadai ketimpang.

Di bilik lumur 13 orang benung ngias Jane. Indu dara biak nya pan masukka ngepan penganta raban bansa Iban. Iya masukka kain karap ti betatingka duit seling ti bemunyi sering-sering sereta bekilap-kilap.

NGIPAK RARAS TUBUH

Kain nya diasuh rapit ba punggung ari baruh pusat ngena lampit pirak bepala besai ke berak-berak dipeda nangkup urung pala kanda. Merundai ari bingkai lampit nya berapa tangkai nyawir ti ditusuk berapa kepin duit seling ringgit. Rawai ti nyegai atas kerigai sereta nanggam perut puang Jane ngasuh raras tubuh iya ngipak amai baka ke ditampas. Engkerung pun rekung Jane dirasukka marik empang ti ngelamun janga bau nukang iya sereta merundai lalu nutup engkapan buah dada iya. Pala Jane linga-linga pasuk panga sugu tinggi ti ngerembai baka bulu burung ruai. Nyadi antin Jane dipasukka lilap lalu merundai ari sugu tinggi nurun nengah belakang rekung nya sanggit marik ti disebut tali ujan. Pun lengan ari sepiak-sepiak Jane ditanggam tiga bentuk simpai lalu buah lengan Jane diumba enggau tumpa ti ngeraran nyentuk ke dekuan. Jari kanan Jane ngenggam gerempung tali tiga igi buah pauh lalu jari kiba iya minching selambar perecha. Ngenyukupka ngepan ari punjung pala ngagai tapa kaki nya kerunchung ti dipasukka ba kedua piak kaki urung buku ali. Wow!. Naka pemajik ga dara tu ke bengepan genap macham nadai ketimpang. Amat-amat baka kumang chukup padan nipak orang bujang tadi.

Diatu orang di ruai udah belabuh rachuh lebuh kedua-dua lelaki enggau indu pansut ke ruai udah bekau lama besikap. Aki Jang ke udah beumur lalu buk iya udah selampur buban endang udah lama besedia deka ngenuluka bala. Aki Jang udah dipanahka nyadi tuai pemela adat laban iya endang tebangkar nemu adat. Iya pan udah sikap bepasuk ngepan. Iya nangkin sebilah pedang sereta ngandar sepuchuk  sumpit tapang lalu bepampaika selambar pua kumbu. Nangkanka Aki Jang nya, Aki Abup ke udah bengepan mega. Iya minching sebilah beliung lajung meruan enggau peredah iya sereta minching sepuchuk sangkuh. Ini Endat ke ditemu sida serumah dia tuai bulu nangkanka Aki Jang enggau Aki Abup. Iya minching sesingkap pinggai ti udah diengkah sebentuk rangki enggau dua tiga igi kelam. Ini Endat bepampaika selambar kain kebat. Entudika sida tiga nya Johnny seduai Jane.  Jane udu ribat; udah ga minching buah pauh enggau perecha, iya diatu mega minching siti tanggui seraung. Tanggui nya dibinching laban iya ti ngena sugu tinggi. Di belakang Johnny seduai Jane nya raban sida ti betabuh. Sida nya mih ke lama udah enda ngetu-ngetu mangkung bebendai, nebah ketebung enggau malu tawak.

Raban sida tu lalu bejalai niti rumah, nurun tangga puting setak lalu nuju palan pengawa nya deka dikereja, iya nya di pendai. Di pendai, udah digagaka siti tanju arau.  Senisi-nisi jalai ke pendai nya udah diujakka turus baka suar alai ngitang menira enggau tambai dikena ngelagu rampa menua dia.

Datai raban sida ba tanju nya, Johnny seduai Jane diasuh bediri dedegi nunga siku babi enggau turu piring ti udah disendiaka dia. Aki Jang lalu disuaka orang siku manuk sabung dikena iya miau piring enggau babi.

“Nyadi aku tu miau manuk, miau pituk tu ngangauka Petara awakka meda nengkilaka pengawa kami baka ke pagi tu. Ke pagi tu kami begelumu begempuru ditu laban kami tu bepinta ngagai Petara awakka ngintu seduai ti deka besapat di ai tu  laban seduai tu jadi salah tipak salah serak.

Betampung…

Oleh JANTAN UMBAT