Bujang Berani Iban Dua

MERUAN DI ATI… Kanang agi bujang biak enggau nyentuk ke bepangkat PW1 endang seruran dikenang perintah Sarawak-Malaysia.

Tusun Ke-24

KANANG ANAK LANGKAU

PENGAWA nangkal getah nya enda lama iga dikereja Kanang. Iya mega kala nyadi tukang sumai (cook) Mr. Ford, iya nya bansa British ti empu kompeni sereta kontrak ngulihka arang batu. Enda lama udah nya, meda Kanang pandai masang perau beinjin sepit, Mr. Ford pan ngasuh Kanang enggau iya ngangkut arang batu ke pasar Kanowit. Udah Kontrak Mr. Ford enda besambung Kanang pan ngetu ngawa ngangkut arang batu. Taja pia, Mr. Ford agi meri iya duit datai ke beratus-ratus ringgit. Nya mih ke belanja Kanang. Manah amai ati bansa British nya, ku iya. Udah nya, iya pan pulai baru ngagai pengawa mai penumpang perau injin sepit iya.

Maya pagi bulan March 1962 perau beinjin sepit Kanang sarat laban dua puluh iku nembiak ti baru angkat bujang, agi nembiak baka iya mega. Kini ke bala nembiak tu? Agi sekula sida tu, kini? Kanang nanya diri empu dalam ati. Udah bala bujang nya angkat ari perau lalu niki ke tebing, Kanang pan nanchangka perau iya lalu nitihka sida nya. Udah nya sida pan bebaris ba tengah laman sebuah sekula. Kanang meda pia aja lalu nyingkang jejampat nuju sepun kayu ti rinda, deka ngerarika diri ari panchar mata panas ti benung niki dada langit maya nya, kenu ku ati tudah diri. Iya nyandih ba pun kayu nya seraya muput diri ngena daun pingan.

Enda lama udah nya, seiku lelaki ngena pekayan seraris sedadu British datai semak-sesemak lalu nanya iya ngena jaku Iban munyi sebut orang English.

DIPUJUK NYADI SEDADU

“Lapa nuan enda enggau sida bebaris din?” ku sedadu nya nanya kanang.
“Enggai aku, tuan,” pia ku saut Kanang.

“Nuan enggai nyadi sedadu?” tanya lelaki nya baru. Kanang sengian sambil bepikir. Tentu iya tu kepala sedadu British. Besai pangkat sedadu tu.

“Nuan enggai enggau nyadi Iban Tracker?” ku kepala sedadu British nya.
“Aku mai sida nya ti deka nyadi sedadu. Ukai aku ti deka nyadi sedadu,” saut Kanang.

Maya nya iya nadai ati deka enggau bala sida nya nyadi sedadu Iban Tracker.

“Enti nuan tu deka nyadi Iban Tracker manah amai. Kami begunaka orang Iban ti kering baka nuan tu,” ku kepala sedadu British nya ke majak bejaku munyi ti ngansak iya. Kanang merening mua lelaki nya lalu nimbal.

“Aku baru tujuh belas taun. Empai chukup umur,” ku Kanang.

“Alai mih enggau sida nyin bebaris. Uji dulu mih, baru nemu,” ku sedadu British nya ke majak ngansak iya.

Lembau asai ati Kanang nitihka asuh lelaki nya. Enda lama udah nya, iya pan angkat begadai-gadai nuju orang ti benung

bebaris nya. Enda tentu nemu tuju orang ti bebaris nya mih iya. Nitih aja asuh lelaki nya tadi mih iya. Serah aja ngagai Petara mih. Nama utai deka nyadi udah tu, pia ku ati tudah diri. Lebuh nya, iya teingatka selambar keretas ti diberi Mr. Ford ke iya suba. Engka nya mih seiti surat ti bisi nyukung iya ngiga kereja perintah.

DITERIMA NYADI SEDADU

Kira-kira seminggu udah nya, Kanang nerima surat madahka iya pas interbiu nyadi sedadu. Kena 21 April 1962 nya ngepunka pengawa baru iya dalam raban Sarawak Rangers: nyadi Iban Trackers. Udah nya, Kanang sereta bala rekrut ti bukai diasuh ngeripot diri ba opis besai Sarawak Rangers laban deka dibai ngagai palan belatih di Sekolah Latihan Peperangan Hutan (Pusat Latihan Tentera Darat – PULADA) di Ulu Tiram, Johor. Ba palan nya mih iya dilatih bala pemelatih sedadu British. Dia mih iya bulih mayuh peneleba enggau pelajar ti baru-baru. Mayuh pekara ti empai kala disepi iya, semua nya ditelan memagang lalu nyadi pengaruh gembar tubuh, nyadi ubat gembar semengat. Kelimpah ari diajar megai senjata perang, Kanang mega diajar mayuh tukuh penemu baru. Asai ke pansut ari lubang gua. Baka pama ti baru pansut ari tachu. Pia ku Kanang bejaku, betelai belalai kediri dalam ati. Gaya chara latih sedadu ti chukup tinggi disiplin ulih nempa sereta ngeringka agi personaliti Kanang.

Peneleba iya maya ti ngasu beburu dalam babas enggau aki iya mayuh nulung iya besedia nyadi sedadu. Ba palan latih nya iya mega diajar talukka menua, Raja enggau bansa.

Udah tembu belatih sebulan,Kanang sereta sida ti bukai pan ninggalka Ulu Tiram, Johor lalu berengkah bejalaika pengawa nyadi sedadu. Maya nya sedadu Sarawak Rangers semina seiti kompeni aja.

Raban ti ulih ngasu bekau munsuh mega enda mayuh. Nya alai, raban ti sama pansut tama, pansut tama ke dalam babas. Maya nya arus jalai pengidup Kanang enda tentu diau jenuh. Semampai bejaga-jaga napi sebarang penguji.

NYADI RABAN IBAN TRACKER

Pengawa Kanang nyadi sedadu berengkah ari iya ti nyadi Iban Tracker, pengawa ti nyidi bekau munsuh ba raban 42 Komando Sedadu British 1962 ti bepengkalan enda jauh ari Selat Teberau.

Rambau nya menua Berunei benung charut beperang belaban enggau seraban rayat dia empu ti angkat ngelaban perintah. Sida nya betuaika Azahari.

Malam nya Kanang sereta bala sedadu ti bukai ngena kapal selam ari Johor ke Labuan. Datai di Labuan sida pan diasuh nepan perau perang nuju palan sedadu Britih di Berunei. Ari palan nya sida nyerang bala Azahari ngena chara ngenyit. Sida mujur ngalahka bala Azahri lalu nyelamatka
Berunai. Maya nya Limbang udah kena pegai bala Azahari ti angkat ngelaban perintah Berunei.

Ba taun 1963 nya mega menua Indonesia nyakap Malaysia. Maya nya menua Indonesia dipegai perintah Presiden Sukarno.

Presiden Sukarno enggau Presiden Macapagal ti megai menua Philipines seati sereta besaup mantah pengawa deka numbuh menua Malaysia ba taun 1963 nya. Agi bebungkur seiti pekara dalam ati Kanang maya
iya benung nyreta kus ba Sekolah Latihan Perang Hutan di Ulu
Tiram, Johor. Kenu ku berita, seraban sedadu komando Indonesia
udah mujur sangkai ba tebing tasik Kota Tinggi, Johor. Kanang sereta enam iku Iban Tracker diasuh nyidi bekau munsuh nya.

IBAN TRACKER NYIDI MUNSUH

Maya nya Kanang charut runding lalu minta diri pulai ngagi pelatun diri empu di Ipoh. Maya nya sida sigi deka diasuh pulai ngagai pelatun diri empu, sebedau nurun ke Singapura.

Sida pulai ke Ipoh ngena kerita api sehari setengah. Munyi ku jaku tuai, apin rangkai tanchut basah,iya pan nerima perintah bekejang ke Singapura.

Rejimen Infantri Singapura Kesatu (Ist Singapore Infantry Regiment) deka begunaka raban sedadu penyidi. Iban Tracker ti betuaika Kanang nya mih dipinta sedadu Malaysia maya nya.

Kanang enggau bala iya diasuh ngena bilun ke Singapura ari Ipoh, Perak. Datai ba Padang Bilun Changi di Singapura sida pan disambut Tuai Pemerintah sedadu Malaysia ba menua nya (bansa Melayu).

Kepala sedadu Malaysia nya madah, seraban sedadu Indonesia udah tama ke Mersing, di Timur Johor. Kenu ku iya, bala munsuh nya landik amai sereta balat ngenusah sedadu Malaysia ba menua nya.

Satu pelatun ari batalion Regimen Singapura nya udah alah laban munsuh nya. Dinga berita nya Kanang ringat amai asai ati,geram sereta enda liat ati agi deka ngayau munsuh nya.

Asai ke deka nurun tekala nya ati,laban ti tetenguk amai deka beamuk enggau musnuh. Berani-rani sida nya tama sereta ngachau menua kitai dulu, ku Kanang bejaku kediri dalam ati.

Penerang pasal endur sereta gaya ulah munsuh ari Indonesia nya udah dipadahka magang ngagai Kanang enggau bala iya.

Sida numpang ba seiti pelatun batalion ti diuluka Leftenan Yap.

Ari Singapura pelatun nya dian-jung ngena bilun ke Mersing.

Maya sida di dalam helikopter snap link ti digaga ari kain endang ba tali sementing. Snap link nya digaga ari kain dikena sedadu nurun ngena tali ari helikopter. Beg ma ti penuh diisi bekal enggau pekayan sedia
belama di belakang, nganti diri ke nurun.

Pelatun nya diturunka ba endur ti udah disadang ba tisi kampung, dipelabaka likun.

Ari nya sida pan belabuh nyidi munsuh nya. Udah dua hari sida ngasu sereta nyidi bekau munsuh,empai ga betemu enggau munsuh. Kelimpah ari bala kera, burung enggau jelu ti bukai, nadai utai idup dipeda.

MUJUR TETEMUKA MUNSUH

Hari ketiga, pelatun nya bisi nerima penerang ari orang Melayu di menua nya. Ku sida,seraban lelaki ti bepekayan sedadu bisi ngerampas sereta nerumpak reta tengkira sida di menua nya. Berindik ari nya,kereja nyidi makin mudah. Pelatun nya pan berengkah nyidi ari menua nya tadi. Hari keterubah maya nya, apin ga sida tetemuka munsuh. Hari kedua, pukul 2.00 lemai, sida pan ngetu sereta belelak ba seiti endur. Tuai pelatun
merambu deka bepengkalan lalu bemalam ba seiti endur ti dipelabaka likun dalam kampung jerung.

Sebedau nya Kanang diasuh tuai pelatun ninjau sereta meresa kandang ngelingi endur nya. Ni nemu? Kada enda bala munsuh benung ngemata sereta meratika pengawa pelatun sida? Kanang mai dua iku Iban Tracker enggau iya. Kira-kira udah seratus meter ngejang ari endur sida ti deka
bepengkalan, Kanang tesiumka bau utai disumai. Bau asap utai nyamai.

Tentu munsuh nya ti benung manduk lauk tauka nyumai utai bukai, ku ati Kanang lalu ngasuh bala iya bejimat.

Sida tiga pan majakka pejalai diri bejimat-jimat neresa babas kampung jerung meratika sereta nyidi bekau munsuh nya. Sida tiga deka nentuka orang ti benung nyumai nya. Munsuh tauka ukai? Enda lama udah nya sida tiga pan datai semak pengkalan munsuh nya.

Amai benung nyumai bala komando Indonesia nya.

Kanang pan berumban mai bala iya dua iku nya nikal lalu ngaga ripot ngagai Leftenan Yap.

(Betampung ba Tusun Ke-26 minggu nyin ila) Cherita pasal Bujang Berita Iban jeman Raja Brooke di Sarawak dilekaka aku naka tu dulu. Sekumbang ke nganti pansik sida ti bukai aku mai pemacha ngenang pasal cherita pasal bujang berani Iban (Iban Warriors) jeman British, sepengudah menua Sarawak ti dipegai Koloni British.

Cherita pasa Kanang Anak Langkau tu endang asil ari pansik aku empu maya ti betemu mua enggau Kanang empu di Sibu taun 2010. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146.

Oleh HARRY USUP UMBAR