CHERPAN LALAU PENDIAU- Danji Bubut Seduai Ruai,Mulut Pulut Tang Ati Ngerangai

Tusun Ketiga  

 “SEBARANG ku atur diri mih, Menyadi, amat ga bulu aku dilinsu, diukir nuan ngemanah enggi nuan ke diaduka aku. Ti ulih, adu manahka agi mih, Menyadi, mansi belayan aku ke jauh mit ari nuan,” pinta Bubut.

Ruai enda ngasuh Bubut irau ati, “Laban jamah aku, Madi, munyi ku aku tadi, gerinti manah, alah mih pengaruh pemalit jamah ke dikembuan aku tu nyau kabau pemisa.” Sigi pendiau Ruai, lebuh bejaku suah agi ke ngelangkung tauka muji diri-empu.

Ruai pan berengkah ga ngelinsu bulu Bubut. Bubut nat. Pia jari Ruai kajal-kajal gawa, pia ga ati iya ada berengkah bebali kurang meras. Ati iya nyau jangan-jua ngelinsu tauka ngukir bulu Bubut manah laban, enti linsu sereta ukir bulu Bubut sebaka pemanah enggau enggi iya, tauka dilinsu iya lebih manah ari enggi iya-empu, Bubut nyangka nyau ulih mutung luan iya lebuh sama ngeliu sida ke dara-dara, laban Bubut rumpas agi gamal sereta bisi agi kelis. Betumbuh iya gawa enggai bebendar. Semina tak kule-kule aja.

Sebulih-bulih ngalih nya, hari nyau bisi beribut serunyut landai. Tudah Bubut ke natka jari Ruai ke ngelinsu sereta ngukir bulu iya, enda berasai nyau lentuk-lentuk ngantuk. Jam nya, enda mukai-mukai, tak semerap kenu punggu enteli labuh.

“Mati tua! Nya anak mensia! Rari tua!” ku Ruai merakka nyawa. Tudah Bubut pen ngereduas angkat. Ditanggung Ruai sarang, lalu disimburka iya ai pelinsu ngagai tubuh Bubut. Lalu ditempalung iya ke bukai sarang pelinsu.

“Nama penyadi aku digaga nuan baka tu!” ku Bubut.

“Penyadi nuan mega nuan!” ku Ruai. Iya lalu angkat terebai nepat puchuk emperawan di puak kampung puang din, ke ngujungka iya badu pulai kia ke agi, ketegal silamka penyalah diri.

Nama kenu bulu tudah Bubut, nadai penyadi-nyadi. Nadai meruan linsu. Semina linsu chelum enggau banda tuai aja ke bisi. Linsu ke dua bansa nya lalu terus nyadi linsu bulu Bubut datai ke seharitu.

Tudah Bubut ukai enda takut, tang ka berumban rari enggai nyadi, laban bulu iya agi bekerambit basah.

“Mati-mati ga! Dini nya ulih diketakutka mati ti anak mensia tak datai kitu, ka munuh,” ku ati Bubut. Dia mih tudah bubut kusil-kusil bekendaska bulu sebarang alai. Lebuh bulu iya nyau rangkai agi, Bubut mupuk bejalai-jalai sebelah-belah punjung bukit nya, deka nengkilaka pengawa anak mensia ke kia ke. Anak mensia lalu nadai dipeda. Kepuas-puas iya ke gilau-gilau, baru iya tepedaka siti punggu enteli masih kua-kua tepanggai ba rampu lalis.

“Kada enda serap punggu nya ke labuh, ke dikumbai perut peruti Ruai tadi serap anak mensia!” ku ati Bubut. Betumbuh pelaba iya ngumbai diri-empu udah kena akal Ruai. “Tang enda ibuh iya bengat kempang beduan aku ngenyadi nya! Ila asai, ti maya iya enggau semua peturun iya mati, enda aku nanka semengat sida ba pun Titi Rawan! Kapa sida enda lanjur mati! Bisi penulah nuan ila, Ruai!. Ajih-ajihka nuan-empu enggau suku juru nuan mayuh agi kita mati kena sintak panjuk anak mensia ari ke mati sakit!” ku sumpah bubut. Ati iya lalu belabuh bedengki enggau ruai, laban ensepi diri udah kena keduan Ruai ke mungkir danji baka nya.

PANGAN NGIDUP, PANGAN MEGA MUNUH

“Amat pesan tuai,” ku ati Bubut, “pangan ngidup, pangan mega munuh!”

Lebuh bulu iya udah chukup rangkai, Bubut lalu engkebapka sayap. Iya lalu terebai nepat puchuk kayu arau, ba temuda ke enda jauh ari dandang umai anak mensia. Iya nyau bisi pemalu ke linsu bulu diri ke enda berapa manah sereta nyarak, lalu ngasaika lebih sedap diau kediri ari ke diau beselalut enggau bala mayuh. Kenyau ari sehari nya, alah datai ke seharitu, Bubut lalu selalu dipeda kitai runggu sereta bependiau magi diri, enggai tentu diau beraban besai baka burung bukai.

                      Antara ajar ti ulih disimpul ari ensera tu: kesatu, ensera tu ngajar kitai awakka nemu nuntun sekat diri-empu lebuh kitai bepangan tauka bebakih enggau orang, laban pangan ke ngembuan penemu kepapas tau ngemedis enggau ngerusak kitai; kedua, ensera tu ngajar kitai mesti ngamatka leka semaya kitai enggau orang, laban sekali kitai udah ditemu orang mungkir semaya tauka bulaka jaku diri-empu, orang tau enda bechayaka kitai seumur idup; lalu ketiga, budi ke manah dibalas ngena pemanah, lalu penyai mega anang tak terus dibalas ngena penyai, laban jaku ke dalam Injil pen bisi mega mesan mensia: “Besembiang mega ke munsuh nuan.

          Nambahka nya, kaban pujangga, filosofer enggau mensia ke begeliga untak mayuh udah ngeluaka jaku rukun pendiau ti bekena enggau danji. Sekeda ari jaku rukun pendiau nya nyebut:

  • Mensia nadai bebida ari pangan lebuh ngeluaka danji, ke bebida nya baka ni jalai siku-siku nguta sereta ngamatka danji diri;
  • Sekali-kali anang nanji maya senang lantang, anang nimbal jaku orang lebuh ati tusah, enggau anang ngaga pemutus penemu lebuh nuan ringat;
  • Nuan dipuji orang beati mulia lebuh nuan ngamatka danji, ukai lebuh nuan ngeluaka seribu danji;
  • Lelaki tulin, lati sereta beati betul berani iya nya lelaki pungka laki ke ngamatka danji, ngimpun mulut sereta nyadi terabai indu nembiak lebuh dituntung penusah enggau pengachau; enggau
  • Anang bechayaka orang ke semina bejaku kutap-kutap tang enda kala ngereja, laban iya mudah mungkir danji semudah iya ke ngeluaka danji.

Oleh JANANG ENSIRING