Bujang Berani Iban Dua (Kanang Anak Langkau)

MERI INFORAMASYEN… Sekeda ari nembiak sekula SMK Sibu Jaya ti betuah sempat berandau enggau Kanang.

NYIDI MUNSUH DALAM KAMPUNG

GAYA hari maya nya manah sereta panas. Raban Tinjau Khas enggau Kompeni C mansang majakka pejalai diri tunga ke utara.

Renjer Lai Chun Min nyadi peninjau keterubah dulu bejalai di mua ari semua orang ukai.

Raban sida nya bejalai sebaris urung tiga meter jauh ari pangan diri.

Enda lama udah nya Renjer Lai meri tanda ngetu lalu ngasuh tuai raban sida LtM Wong Ang Peng ke mua.

Tuai raban Kompeni C Kaptan Othman Hamid mega diasuh ke mua. Renjer Lai ngerara tiga lumpung buluh setengah kaki pemanjai diengkah berintai ba atas menasan nya.

Tanda nya baka ti baru digaga hari nya mega. Agi baru bendar.

Tanda nya nunjuka bala komunis udah nemu bala sedadu Perintah Malaysia bisi ba kandang menua nya lalu meri tangkan ngagai bala raban komunis ti bukai awakka sida bejimat-jimat bejalai di kandang menua nya.

BETEMPUH ENGGAU MUNSUH

Kaptan Othman Hamid pan berumban ngasuh Renjer Lai mansang ke mua agi lalu ngasuh iya besedia betemu enggau munsuh.

Enda lama udah nya dinga beteratat munyi letup senapang.

Bala kaban Tinjau Khas ti bukai pan datai mantu Renjer Lai betempuh enda lama enggau munsuh nya.

Udah nadai didinga agi letup senapang munsuh, bala renjer pan nyerungkai endur nya lalu tetemuka dua iti beg ma munsuh enggau sepasang kasut.

Sarjan Kanang enggau bala iya ba Platun Risik Gempur 8 Renjer ti bukai di belakang mega bepechah nyekat pejalai pengerari munsuh.

Bala munsuh udah rari tunga ke utara. Taja pia sida enda ngagai musuh nya tang majakka pejalai diri ngiga kem munsuh.

Ripot pasal sedadu Malaysia ti betimbak enggau munsuh nya dipadahka ngagai Markas Tek.

Enda lama udah nya dinga berauh munyi letup meriam ba kandang endur P/P 7948 enggau P/P 8149. Kompeni D diasuh mansang tama ba endur P/P QY Kompeni A ngerungkai kandang menua Sungai Menilik
enggau tunga ke kandang menua sebelah Timur.

“Puuui…! Bangka munsuh buyan! Lapa rari enti bangat berani deka ngelaban Perintah Malaysia, dih?!”, ku Sarjan Kanang ringat nyepi diri empai bedengah munsuh nya tadi.

MAJAKKA PEJALAI NYIDI MUNSUH

Sida pan majakka pejalai diri ngiga kem munsuh nya. Urung pukul 1255 ngalih hari kena 29 Mei 1979 bala Renjer nya pan ngasaika diri udah ba kandang menua kem munsuh lalu besedia napi munsuh.

Sida tetemuka sebuah tembawai kem munsuh ba endur QY 804495 ti ulih muat antara 30 ngagiai 40 iku orang. Kem nya urung enam tauka tujuh bulan udah dilekaka bala munsuh dia.

Informasyen pasal kem munsuh nya ditaburka ngagai Markas Tek.

Udah nya raban renjer penyerang pan majakka pejalai sida ngena chara beraban.

Platun Risik Gempur mega besedia mansang nyidi bekau munsuh. Sarjan Kanang diasuh nyadi peninjau keterubah lalu dientudika Renjer Michael nyadi peninjau kedua.

Seduai bejalai jauh dulu ari sida bukai.Mata tajam Sarjan Kanang seruran enda tetilap meratika menasan jalai munsuh. “Endang agi sebelah menua tu bala munsuh. Kelai bekau tu agi baru,” ku Kanang bejaku kediri dalam ati udah ti tepedaka ranggas enggau madang resam patah bekau indik mensia.

Enda lama udah nya, iya pan meri tanda ngetu sereta sengian ngagai bala renjer ti bukai di belakang iya. Ngena chara sengian mega iya ngangauka tuai pelatun sida ke mua lalu meratika bekau nya.

“Bekau nama tu dih, Sarjan?”ku tuai pelatun.“Bekau munsuh mih tu, tuan. Sida baru udah neresa kandang menua tu,” saut Kanang.

“Aram kitai nyidi bekau tu”, ku tuai pelatun. Ari endur nya bala Renjer Malaysia nya pan majakka pejalai diri nitih sereta nyidi bekau pejalai munsuh.

Maya nya hari pan udah jauh lemai. Sida pan bemalam ba kandang menua munsuh. Malam nya sida begintir-gintir nyadi jaga.

Maya pukul 7.00 pagi kena 30 Mei 1979, Kanang enggau semua bala iya dalam Platun Risik Gempur udah dani magang.

Udah ngirup sereta makai pagi, sida pan bekejang ari endur nya. Baka selama, Sarjan Kanang endang dipaduka bejalai dulu ari bala iya.

Seruran gidan sereta keketap asai ati iya maya tepedaka bekau munsuh.

Taja pia, iya mesti bejimat-jimat bejalai tunga ke Timur nguluka bala iya. Peti bom dipelabaka bisi ba endur nya. Senyata munsuh nya mih utai ti dikenakutka sida.

Ukai nya berupai dipeda bom munsuh nya.

KEM PUANG MUNSUH KETERUBAH

Enda mukai-mukai asai ati Sarjan Kanang tak lain asai. Kada enda bisi munsuh semak, ku iya bejaku dalam ati. Tekala nya iya pan madahka bala iya di belakang ngasuh sida sedia, engka bisi munsuh ba mua jalai sida.

Sarjan Kanang ngerayap bejimat-jimat mansang ke mua lalu tepedaka palan jaga munsuh.

Nya tentu kem munsuh. Iya pan nangkan bala iya di belakang ngasuh sida besedia belaban enggau munsuh.

Udah iya meresa semua endur nya, baru iya nemu kem nya puang. Ba kem nya bisi sepuluh buah palan jaga. Engka enda kurang ari 20 tauka 30 iku munsuh ulih diau ba kem nya, ba QY 812497.

KEM PUANG MUNSUH KEDUA

Bekejang sida ari endur nya sebuah agi kem lama munsuh ba endur QY 816496 ditemu sida.

Taja kem nya puang, Sarjan Kanang gaga sereta andal amai ati.

Tentu munsuh enda jauh ari nya. Enda sabar agi asai ati iya deka bedengah munsuh nya.

Enda jauh ari nya iya tetemuka sebuah agi palan lama munsuh ba QY 807506.

Enda jauh ari palan nya iya tetemuka sebatang menasan jalai mensia ti baru ditujah orang antara tiga enggau empat hari ti udah. Menasan nya udah lendat ditujah lebih ari dua puluh lima iku mensia, pia ku sagam ati Kanang.

Menasan nya betul-betul ba endur QY 827491. Gaya hari lemai nya manah sereta panas.

Makin jampat agi kebak tungkul ati Sarjan Kanang. Dalam peragam ati iya, bala munsuh makin semak. Makin gagit ati iya deka bedengah.

Nitihka jaku perintah ari Markas Tek, tumu pagi nya Sarjan Kanang enggau bala iya pan berengkah nyidi bekau munsuh nya baru. Taja bekau agi baru kem munsuh apin ga temu. Enda berasai hari pan apus. Sida pan ngiga endur likun lalu bemalam dia.

Tumu pagi kena 31 Mei 1979, Sarjan Kanang enggau bala iya pan majakka pejalai sida nyidi bekau munsuh. Baka selama Sarjan Kanang endang dulu ari sida bukai.

Ujung senapang M16 ba jari iya seruran dituju ke mua, sedia dikachit belama-lama. Nyau lama-kelama ke bejalai iya pan tetemuka sebatang menasan lalu tepedaka sebilah duku di- ujakka ba atas menasan nya. “Apuuu….! Nama reti utai tu? Malam tadi aku bemimpi meda duku aku patah. Hari tu aku tetemuka duku mega” ku kanang bejaku kediri dalam ati ke ngasuh.runding iya makin charut.

KEM PUANG MUNSUH KETIGA

Angkat ari endur nya sida pan majakka pejalai diri nyidi bekau munsuh.

Urung pukul 1.00 ngalih hari nya, sida tetemuka sebuah agi palan ba QY 828499.Palan nya ulih muat antara 20 enggau 25 iku mensia. Maya ti nyerungkai palan nya sida tetemuka tin tusu chap ‘Blue Cross’ ti udah puang, umbang buah empasa enggau dapur endur nunu buah empasa.

Udah ngaga ripot pasal utai ke ditemu sida nya ngagai Markas Tek, sida pan bejalai baru ari endur nya. Taja lelak amai, darah bujang berani Iban dalam tubuh Sarjan Kanang makin gesak,enda sabar agi deka bedengah.

BEKAU MUNSUH MAJAK MAYUH Ba endur bukai QY 816484 raban renjer ti betuaika PW II Gandat Anak Merdan mega tetemuka tembawai kem unsuh. Bepelasarka ripot pasal utai ke ditemu bala renjer nya, informasyen ari Markas Tek madahka munsuh ti dikayau sida nya benung ngerarika diri tunga ke kandang menua QY 8251 di sebelah Barat menua Sungai Piah tauka Sungai Belis tunga ke Dakoh.

Dipelabaka sida bala Nam Yat deka betemu enggau raban Rahim ari 7 Armed Work Force (AWF). Makin jauh pejalai kayau sida makin mayuh agi bekau munsuh ditemu sida. Enda alah beri ripot semua.

Sarjan Kanang sigi endang nemu di dalam ati iya. Sida makin semak-sesemak ari bala munsuh.Malam nya sida ngiga endur ti likun endur bemalam. Udah ngasuh bala iya nyadi jaga malam nya, Sarjan Kanang ngetu belelak. Maya nya iya tesiumka bau rengut asap kemenyan.
Iya pan teingatka cherita pasal siku orang tuai bansa Melayu ti selalu begulai enggau bala munsuh dalam babas nya.

Iya ninga cherita aja ari orang bukai, tang enda kala meda enggau mata iya empu. Tetenguk amai ati iya deka betemu enggau orang tuai nya.

(Betampung ba Tusun Ke-29 minggu nyin ila)

Cherita pasal Bujang Berani Iban jeman Raja Brooke di Sarawak dilekaka aku naka tu dulu. Sekumbang ke nganti pansik sida ti bukai aku mai pemacha ngenang pasal jerita bujang berani Iban (Iban Warriors) jeman British, sepengudah menua Sarawak ti dipegai Koloni British.

Betuah, asai ke udah diatur Patara mih tudah diri, laban sebedau tu aku endang ngembuan juluk ati deka betemu enggau ‘Pahlawan Negara’ tu. Nya alai, jerita pasal Kanang Anak Langkau tu endang asil ari pansik aku empu maya ti betemu mua lalu berandau enggau Kanang empu, maya iya dikangau nyadi ‘Tokoh Kemerdekaan’ ba pengerami ‘Hari Merdeka’ di Sibu (SMK Sibu Jaya) 31 Ogos 2010.

Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146

Oleh HARRY USUP UMBAR