CHERPAN LALAU PENDIAU BISA BAKA SUMPAH CHUIK SEDUAI EMPITU “Idup ukai ketegal sampi; mati ukai ketegal sumpah’

Tusun Kedua

“NADAI nya bengat dikelayaka, Punggal. Kitai ga sama begigaka pengidup,” saut Chuik. “Enti kitai ke besaruk pendiau baka tu belaya, nama dih pengelantang idup!”

“Nya mih, enggai nadai jaku. Manah belaya dulu ari belaya dudi.”

Empitu seduai Chuik lalu beserara, sama mai ati ke ka serut-serut udah ke buya besengkiul jaku. Empitu ke ili; Chuik ke ulu. Sama-sama penapat tulang bepantap sereta berangkutka daun lemayung, daun jemak, anak raras. Lalu diri seduai ke tampun. Tembu nirika tampun, seduai lalu nan bubu. Sama-sama tiga mata siku bubu ke ditanka seduai ba Sungai Layar Daun.  Chuik dulu tembu lalu dulu mega pulai. Empitu, laban kurang sikar gawa ba ai, dudi agi tembu nampun enggau nan bubu, lalu dudi agi ga iya pulai.

Udah bubu tembu tampun enggau tan, Empitu lalu kayap-kayap bejalai ke ulu-ulu, limpang meresa endur tampun bubu Chuik. Tampun bubu Chuik ke tiga mata nya lalu ditemu iya alai magang. Semata ba baruh pun engkuang. Semata ba ulai berimbai enggau jerangku tuga tebelian. Lalu semata di baruh pun ubah bungkang. Buah ubah nya benung mansau, lalu buah ke udah labuh ngenying temera atas ai.

“Hah, udah temu aku magang tampun bubu di Sambi!” ku ati Empitu. Iya lalu berumban pulai nangika jelu tauka burung bukai bisi tepedaka ulah iya ke beperesaka endur tampun bubu Chuik.

Langgang dua hari bekau nya, maya ai nyau dikira seduai udah ngetu regu, Empitu seduai Chuik nurun ngabas bubu. Diabas seduai bubu, udah semata, semata. Genap mata bubu sama ke ngemulih nya ikan. Sungai Layar Daun, sebaka enggau Sungai Mirah Mata, endang sungai tebilang mayuh ikan di menua nya. Ari nya, sapa ke turun kia, nadai kala enda berat belakang, pulai ngema ikan. Nangkan nya, beturut

hari bubu diabas, beturut hari ga bulih ikan ngemayuh-mayuh nya. Kekadang kerepat ikan ti bekeremit nyau dibuai sengapa ari alam bubu. Nyau enda alah bai.

Nyau kepuas-puas ke bebubu, bubu seduai nyau kurang pemulih, nyangka ketegal ikan nyau leju makai umpan ke sebansa: enggi Empitu telu lalu enggi Chuik entemuni anak iya. Empitu kurang peneleba beratika kebuah bubu iya ke nyau enggai tentu bulih baka nya. Nya alai, iya agi majak beumpanka telu sida empitu empu. Nyadi Chuik nemu berunding datai dia. Ari nya, iya lalu ngiga leka getah anak mensia ke umpan bubu. Sekumbang ke udah beumpanka leka getah, bejarit bulih baru baka ke dulu mih bubu Chuik.

Sekali kenu Empitu seduai Chuik betemu maya sama ngabas bubu. Empitu nanyaka pemulih iya bebubu.

“Bulih, Punggal,” saut Chuik, “nyau ulih milih bagi ikan ke dikedeka. Mina ikan ke besai-besai. Ikan ke mit-mit aku lepaska baru, sayau masau.”

“Aku meda ma nuan, Punggal” pinta Empitu, maut agak Chuik lalu nilik ke dalam. “Apu! Raya ga pemulih nuan!. Aku nadai utai ulih. Peda nuan raga aku dih, murit pan enda mih laban ikan. Nya pan enti ikan menyana. Muti keparat sida kejungau, kekar enggau empelekung. Ka dama tak muai, enggaika nadai ke temu bala bini anak di rumah.”

BISI UTAI DIRUNDING

Keleju-leju, ngiga akal kenu Empitu, meda bubu iya enda ngemulih bubu Chuik. Bisi iya bulih pijar runding.

Malam siti, semalam-malam nya hari ujan lebat. “Nyaru ikan!!” ku ati Empitu. Mata iya lalu tepenggar, enggai tinduk. Ati iya bisi utai dirunding. Iya mih maya kukuk manuk kedua kali, iya lalu ensugau angkat ari peninduk. Betangkin duduk, berema agak, lalu angkat deka nurun.

“Kini ke nuan ngenumu tu, retuai?” tanya bini iya.

“Nyenguk bubu.”

“Iga ga ngenumu tu. Hari baru dini hari dalam,” ku bini iya.

“Kati ku enda nurun tumu, kumbai nuan semak-semak endur ke bebubu. Nyin di tisi langit bejembur din, nyeh!” ku Empitu nengir bini iya. Empitu begegas nurun. Iya beruntu bejalai. Datai ba sungai ke endur bebubu, Empitu enda napatka bubu iya-empu. Iya napatka bubu Chuik. Ditanggung iya bubu, udah semata, semata. Iya mih bubu tiga mata abis diabas iya, ma iya pen penuh ga laban ikan. Ditan iya baru bubu ba tampun. Iya lalu pulai berumban-rumban,  mai ikan nya. Iya pulai ngelaung nengah jalai bukai, enda nengah jalai iya ke mansang tadi, nangi betemu enggau Chuik di rantu jalai. Bubu iya-empu lalu ditejuka iya enda diabas.

 “Buah-buah ubah dulu dia, dih!!” saut Empitu. Saut nya ulih iya nempa, semadi nadai terundingka saut bukai. Mua iya muche-uche. “Ehhh, bedau nyadi aku ngelabuh buah diatu. Be-be-beguai, beguai.” Lalu sebabat kaki Empitu deka nikal.

Meda pendiau Empitu tak liar baka nya baka pendiau sengayan ke takutka api ti ku sempama, Chuik lalu ngangauka iya.

“Anang guai mupuk, Punggal. Aku bisi jaku enggau nuan,” ku Chuik.

“Nama hal dih?” tanya Empitu. Mua iya tak kesal dipeda.

“Ukai nuan ke selalu enchuri ngabas bubu aku?”

“Ukai! Enda kala, enda kala. Tu ngenuai umur apin kala aku enchuri..…” Enda teapuska jaku diri, alai Empitu lalu berumban mupuk, sesetengah rari.

Ninga saut Empitu tak kalat-kalat munyi nya, Chuik lalu sangka amat-amat ka Empitu, ke selalu enchuri ngabas bubu iya.

Bekau nya, bejarit amat bubu Chuik bulih. Seruran ruyun-ruyun raga dikena iya mai ikan. Ke ulih bubu iya mayuh bansa ikan ulu baka sida buing, sida bangah, sida enseluai, sida udun, sida kekar, sida gerama enggau sida keli.

Oleh PINSIL SARATOK