BISA BAKA SUMPAH CHUIK SEDUAI EMPITU

Tusun Ketiga

HARI tawas, Chuik pen dani. Kusuk mata, iya bekemas deka nurun ngabas bubu. Ransing ati iya nurun, nyadang bubu bulih mayuh agi ari selama. Iya ngira ai kembai laban hari ujan semalam-malam nya. Keselalu, lebuh ai jerua besai baka nya, ikan galak mayuh mudik. Bubu selalu bulih mayuh. Datai iya ba tampun bubu, Chuik lalu terejun ke ai. Bebendar amat iya nanggung bubu laban bubu nya berat kena teruju ai ke bah. Tekenyit iya meda bubu tak puang. Siku ikan pen nadai dalam nyin. Peda engkilat bubu tak mengkang lenga-lenga enda betambit. Tambit iya manah-manah engkilat bubu, lalu ditan iya baru ba tampun.  Lalu bejalai ke ulu ke agi ga Chuik, napatka bubu ke kedua. Diabas iya bubu nya, peda baka bubu ke keterubah tadi ga, nadai utai ulih. Engkilat bubu mega enda betambit. Lalu nyau iya nanggung bubu ti ketiga. Bubu ti ketiga pen sama baka dua mata ke udah, bela nadai utai ulih. Tang mih engkilat bubu nya mega enda betambit.

“Enda patut aku ilap, nejuka engkilat bubu enda betambit baka tu,” ku ati Chuik. Diperatika iya tubuh bubu, nadai ga rinsang apa-indah. “Ka ngumbai bubu tu dikachau bala ringin, bubu tu tak nadai ga rusak apa-nama. Anang-anang bisi orang enda manah ati, ngereja bubu tu.” Chuik pulai puang. Siku ikan pen nadai mih dibai pulai. Lebu iya pulai.

Bubu Chuik ke puang nyelambang baka nya nyau beturut-turut hari. Engkilat bubu seruran ditemu iya tebuka. Tak baka ti selalu bisi bekau orang nanggung bubu nya. Ai masih keruh berari. Bekau selalu masih basah-basah tiap-tiap pagi, tang ‘orang’ ke enchuri ngabas bubu nya lalu enda kena peda Chuik empu.

TERUAN BELINDUNG BA BANDIR

Kepuas-puas ti baka nya, Chuik nyau berasai bisi sangka-sangka ka Empitu ke enchuri ngabas bubu iya.

“Tentu pengawa Empitu tu. Nadai orang bukai nemu aku bisi bebubu ngagai ulu Sungai Layar Daun, kelimpah ari iya. Manah engkilun enggau iya tu,” ku ati Chuik.

Pagi nya, agi dini hari dalam Chuik endang udah nurun engkilun. Datai iya enda berapa jauh ari tampun bubu iya ti keterubah, Chuik lalu teruan belindung ba bandir keranji. Diibun iya dia. Apin angat burit iya ke udah duduk ngibun, maya agi karau-karau hari, peda kayap-kayap Empitu datai, berema agak. Iya mih Empitu nyauka meraka urat keranji ke melintang arung jalai, Chuik lalu negah.

“Tumu amat ga nuan, Punggal! Ka kini ke nuan bejalai nyungkap ambun baka tu?”

Empitu tedadang. Iya enda nyadang Chuik tak bisi dia. “Ehhhh, ka-ka-ka ngelabuh bu-bu-buah,” saut Empitu, kat-kat.

“Buah apa ke bisi dilabuh nuan maya tu taun?” tanya Chuik.

Minggu tu kitai terus macha tampung Cherpan Lalau Pengidup tu ba Tusun Ketiga, iya nya tusun ti kepenudi ke nyerita pasal laya Jelu Chuik enggau Burung Empitu ke bebubu dikena ngulihka pemakai diri-empu enggau diri sebilik.

Bekau ditegah Chuik, Empitu nyau bisi penangi ati deka enchuri ngabas bubu Chuik.

Kira-kira sebul peti bekau nya, meda bubu iya lalu enda tentu bulih, enda baka bubu Chuik, dia bini Empitu pansut jaku kutuk.

“Enda nya kebuah aku enda ngasuh nuan jai jari enggau utai orang. Ninga aku ngerara, aku dikumbai nuan jai mulut. Nya, diatu nyau bubu nuan-empu enggai agi bulih. Endaka nya penyial, ketegal kitai enda manah akal ngidupka diri,” ku bini iya.

“Ti aku enda enchuri, sapa agi? Kita ukai ka! Mina ka makai aja!” Semina nya saut Empitu. Ati iya ke gatal deka enchuri ngabas bubu Chuik nyau ngungkat baru.

“Tang enchuri sekali tu, mesti ngena akal, baru enda ulih tekan Chuik,” ku pikir Empitu.

Pagi siti ke nangkanka nya, Empitu dani tumu baru. Kukuk manuk sekali, iya endang udah besikap deka nurun. Lebuh ditanya bini penunga iya ke ngenumu nya nurun, Empitu madahka diri deka ngelabuh buah engkuang. Iya lalu nurun, napatka tampun bubu Chuik. Lalu abas iya bubu Chuik, udah semata, semata. Ditanggung iya bubu. Dibuka iya engkilat. Dituang iya ikan ke dalam ma. Engkilat bubu dilakka iya enda ditambit. Bubu diperemika iya baru ngagai tampun. Niki ke tebing, Empitu lalu belanda-landa, nabanka ma penuh laban ikan.

Datai iya ba pelimpang jalai ke ngagai tampun bubu iya-empu, Empitu lalu ngelalaika ma sarang ikan. Ma nya diparukka iya ke dalam madang resam. Udah marukka ma, Empitu lalu ngalika diri ngimbai pumpun buluh di tisau jalai.

Nyau tinggi-tinggi hari, dinga iya suit-suit kensung Chuik ke mansang ngabas bubu. Empitu enda bemunyi. Chuik lalu niti jalai bubu iya-empu, nguluka sungai.

Hari pan nyau tinggi-setinggi. Sekali, Empitu ninga nyawa Chuik datai ari ulu. Nyumpah. Mutap. Besampu. Tak nadai enda macham leka sumpah Chuik, nyumpah orang ke ngabas bubu enggau enchuri ikan iya. Perut orang nya deka diperuti. Leka mata orang nya deka dikebuk. Jari deka diketak. Rekung orang nya deka dijirat ngena temeran. Pia ga iya nyumpah orang nya tulah, sial, ansal! Nyumpah sepenginggar nyawa iya.

Betampung…

Oleh PINSIL SARATOK