Cherpan: Pemati Adat

TUSUN KEEMPAT

ANANG telah diatu laban penyakit covid, pengidup amat-amat balat bebali. Laban ti enda tau begulu bebala mayuh, pengawa rabat enda ulih diatur baka menya. Diatu mayuh pangan diri ninggal enda disah lalu enda digulu. Mindah balat disekat enggaika penyakit nya berampit.  Gawai balat bendar tebunsa laban sekat tu. Ni bansa gawai ti enda rami, ti enda digulu bala mayuh.? Ama iya nadai digulu orang mayuh, nya ukai gawai.

Siti da bansa pengawa raban bansa Iban ti balat bendar tanggul laban sekat ketegal covid, iya nya pengerami baka melah pinang tauka gawai tikah. Nya mega nadai ulih dikereja. Semua bansa pengerami nadai ulih dikereja. Tu ti ngujungka mayuh adat mati. Covid tu munuh adat.

Lebuh adat mati, mayuh chara idup bukai pan nitih mati. Pengawa kaban belayan begusung pangan diri enda ulih dikereja agi. Orang enda ulih ngabas apai indai ke sakit tauka datai lebuh maya sida ninggalka dunya. Diri serumah nyau baka ke enda diau di rumah panjai. Enti kelia enti pangan lama udah enda datai nemuai, orang begelumu ngulu penatai iya. Orang berandau sampai jauh malam. Jang ingat maya iya agi biak menya, enti iya datai ke rumah panjai, bala nembiak, tuai besai begelumu ba ruai iya. Lebuh ke bisi mai utai, pemakai nya disadung lalu makai begulai. Diatu, jauh ke ulih makai begulai, bejaku, betanya, besapa dih nyau nadai. Ruai rumah panjai nyau nadai diguna baka kelia agi. Ari nya gamal bala ke diau di rumah panjai nyau baka ke enda beserakup. Kaul enggau pangan diri nyau beserekang. Baka ke kejika pangan diri.

NYABUNG NADAI DIKEREJA

Kelimpah ari pengawa begelumu di rumah panjai ti enda ulih diatur agi nya pengawa dikena ngelantangka ati baka main bul enggau main bukai pan  nyau tanggul. Pengawa ke dikerinduka mayuh orang baka nyabung pan nadai dikereja. Pengabis iya pengawa ti pemadu manah baka beduruk maya pengawa umai  sekalika nya nugal tauka ngetau tau nyadika chara penyakit nya berampit. Pengawa nemuai ngagai menua bukai pan nyau enda ulih agi dikereja. Tu balat ngerugika menua.

Siti pekara ti balat ngerusak kelebih agi nembiak nya sekula enggau palan pelajar tinggi ke nyau tutup. Sekula ke tutup nya ngasuh nembiak sekula enggai nyadi enda belajar ngena chara ngena internet. Tu ukai pekara ke mudah laban bedau semua endur bisi kena bungkur line internet. Nambahka semua penanggul tu, pengidup merinsa laban mayuh orang lenyau pengawa.

Puas ke duduk dugau-dugau nadai orang enggau berandau, Jang nyau tinduk duduk. Iya balat nesalka pengawa ti dikarapka pengidup nyamai lebuh taun 2020 ti lama dipelandikka orang ngelama tu. Lebuh 2020 datai, nemu nya mai pemerinsa enda jena-jena. Mayuh adat nyau mati. Penyakit Covid-19 ti ngasuh orang idup ngena chara baru enda mesti iya pengidup nyamai. Enti enda diintu manah-manah pengidup chara baru tu tau ngemunaska adat raban bansa. Enti nya nyadi, abis mih rambai jaku bejalai betungkatka adat, tinduk bepanggalka pengingat. Tu deka mai pengerugi besai ngagai orang rebak baru lalu tau ngeruntuhka bansa enggau menua.

Penatai Jang seduai bini iya ngagai rumah panjai sekali tu baka ke ngagai langkau umai. Asai ke datai nyadi temuai ba rumah diri.  Penyakit covid tu amat-amat mai pemati ngagai adat raban bansa ti selama tu dikegaga enggau dipebasa. Sayau mih lanting kitai bansa.

AMBIS…

Oleh JANTAN UMBAT