Bujang Berani Iban Dua (Kanang anak Langkau)

PENGINGAT 2010… Pengeluar bup jaku Iban enggau staf SMK Sibu Jaya begambar nyadika pengingat begulai enggau Kanang.

TUSUN Ke-32

AGI IDUP AGI NGELABAN

“Agi idup agi ngelaban…..!! Aram titihka aku…serang…!!” ku Sarjan Kanang meradakka nyawa iya.

Iya angkat ari endur iya ti belindung tadi lalu malas timbak munsuh. Munyi ujan nyala peluru munsuh mansa babas enggau kayu. Enda lama udah sepi iya berasai amai dada iya tama peluru leka senapang.

“Kenyau ari taun 1962, lapan belas taun udah betimbak enggau munsuh, baru sekali tu mih tubuh anak Iban tu bedarah kena peluru. Engka asai tu mih munsuh ditimbak aku ngelama tu,” ku Kanang bejaku dalam ati.

Taja udah kena timbak munsuh, Sarjan Kanang majak belanda-landa nuju munsuh sambil ngachitka senapang M16 iya nuju musuh. Enda lama udah nya, sepi asai ke dientung orang ngena utai tajam kulit perut iya. Iya pan tejula lalu bebelat tesungkur ke tanah.

“Apuu…., kena timbak baru anak Iban tu, nih. Lagi asai kita munsuh. Aku tu sedadu ti enda takut mati,” ku iya mutap baru meransang ati diri. Iya angkat baru lalu meradakka nyawa iya.

“Serang musuh nyin! Gagai sida…! Anang bedulika aku ditu. Nemu aku nyaga diri. Anang undur ngapa ari menalan.!  Agi idup agi ngelabannnnn…!” ku Kanang.

Ninga nyawa peransang Sarjan Kanang, nembiak iya di belakang pan majak datai-sedatai malas timbak munsuh. Ati sida makin ransing deka bebalaska tuai kayau sida nya.

NADAI BERASAI PEDIS TAJA BAKAL

Maya nya Sarjan Kanang baru nemu diri bakal taja iya nadai berasai pedis. Iya semina ngasaika diri enda ulih nginsit agi. Taja pia, iya agi ulih megai senapang lalu nganti munsuh: engka bisi datai semak iya. Maya nya datai seiku orang tuai ti kala betemu enggau iya dalam mimpi. Mua iya burak, ragum iya panjai sereta burak apus. Iya ngena selampai chelum. Tubuh iya bau rengut minyak angi. Sarjan Kanang kala ninga rita pasal orang nya. Kenu ku orang, iya mega kaban munsuh ti benung betempuh enggau sida nya. Orang tuai nya datai semak lalu merening mua iya. 

“Sapa nuan tu kebendar, pak cik? Nuan diau dalam kampung tu datai ke 60 taun, nadai guna sekali-kali. Nadai reti amat-amat,” ku Sarjan Kanang.

Orang tuai nya malik lalu semina tuchum-tuchum aja. Pedis amai ati Sarjan Kanang lalu ngachitka M16 iya nuju dada orang tuai nya. Nemban betul kena dada orang tuai nya peluru-peluru temaga nya tang mimit enda mih tubuh iya ruji, anang ke telih. Meda baka nya Sarjan Kanang pan nikauka seigi bom ngagai orang tuai nya, tang mimit nadai mih tubuh orang tuai nya engkebut, anang ke ruji. Udah nya, disintak iya duku iya ari sarung. 

Pak cik nganti dia nuan. Aku deka mumpung pala nuan,” ku Sarjan Kanang.

“Nuan Iban tauka Melayu?” Orang tuai nya tuchum-tuchum lelegup malik ngagai Sarjan Kanang.

“Aku Iban. Enti dek berani, nganti aku dia, aku deka mumpung pala dek,” ku Sarjan Kanang meradakka nyawa enggau ati ti ringat.

TESUNGKURKA TANAH

Maya nya mega iya tepedaka seiku munsuh (komunis) ti suah ditimbak iya tang enda kala tama peluru tubuh munsuh nya, anang ke mati. Orang tuai nya malik ngagai Sarjan Kanang baru lalu tuchum-tuchum sambil nempap bau lelaki ke enggau iya nya. Udah nya seduai pan sama ngejang ari endur nya. Muras sereta gidan amai ati Sarjan Kanang meda seduai nya. Iya angkat lalu mantaika duku deka ngagai seduai nya. Lebuh ti angkat nya mih iya tesungkur ke tanah baru. Asai ke bisi utai pansut ari perut iya. Nya baru iya nemu diri balat amat bakal. Darah bujang berani nya teberubus pansut ari perut iya. Maya nya iya mega ninga Kopral Nasir nyerauh baru madahka diri pedis. Sarjan Kanang enda ulih nginsit lalu malut abi telih ba dada enggau perut iya, ambika darah enda pansut ari abi telih nya. Makin lama, makin kerabur sereta bebintang-bintang utai dipeda iya. Serata tubuh iya pedis sereta makin lemi-selemi.  

“Hahhh…, apin kala anak Iban tu telih ngemedis tu. Huh…, tat aja mih…! Enda patut bujang berani Iban tu mati ba jari munsuh sekali tu…! Orang tuai nya tadi amat segenda datai ngayanka diri ba aku tauka semina baka ke dalam mimpi?” ku Kanang kekimut mulut iya bejaku kediri dalam ati.

Abi timbak peluru munsuh ba tubuh iya makin pedis-sepedis asai sepi iya. Sendat asai seput di dada. Mata iya makin enda ulih enchelak. Maya nya letup senapang munsuh nadai didinga agi. Renjer Rajan datai lalu nguji deka nyelamatka iya, tang semina ai mata aja ti labuh bekeberai. Sinu. Udah nya nyau mayuh-semayuh nembiak Sarjan Kanang datai ngelingi iya. Beterutu naya ai mata sida meda sarjan pelatun sida nya balat amai bakal. Tuai pelatun Leftenan Muda Johnson pan berumban minta bantu ari Markas Tek.

Berita pasal Sarjan Kanang ti bakal ba menalan perang jampat ngelekai ba sebelah kem sida. Commanding Officer  Lt. Kol. C. A. Loone tusah amai ati. Tusah diganti sarjan baka Kanang nya. Gaga amai bala munsuh meda iya enda ulih ngasu sida agi, ku ati iya.

DISELAMATKA NGENA HELIKOPTER

Enda lama udah nya, sebuah helikopter sedadu pan datai ngulurka bantu. Dr. Rajban datai lalu berumban ngubat Sarjan Kanang. Taja balat bendar bakal lalu sintak seput iya nyau lubah-selubah, tang kedap iya agi manah pejalai. Reti nya tungkul ati iya agi kuat ngepam darah. Maya ditarit ngena tali ke dalam helikopter, iya udah enda nemu utai agi. Iya semina nemu diri enda ulih enggau bala iya nyidi bekau munsuh agi lalu bebalas sereta bedengah munsuh agi. Nya ti ngasuh ati iya gidan amai sereta ringat. Apin kala iya ensepi pemedis asai nya, sekumbang ti nyadi sedadu ngetanka menua enggau bansa.

‘Enda mudah lesi bebadi ba jari munsuh bujang berani iban, enda mudah danjan ba menalan tuai kayau iban’.

Di Kem Sulvaline, Ipoh, Perak, Batalion 8 Rejimen Renjer Malaysia baka ke ngulit, enda tentu kemerah baka ke ngelama tu bala sida iya. Tusah ati sida ukai jejena. Merinsa mensena asai ati sida ditinggang penusah ti jarang amai nyadi ba kem sida ngelama tu. Sarjan Kanang, bujang berani ti amai dikesayauka sida, ti selalu nguluka sida ngayau munsuh, udah tengelam padam seput di dada, taja penyuan dalam agi meruan, apin danjan, empai telempai ba pintu sebayan.

HELEN NERIMA BERITA ENDA MANAH

Penatai Josephine hari nya dipelabaka Helen endang baka selama. Engka iya deka mai berita pasal aktiviti BAKAT, pia ku ati Helen. Baru datai ba mua pintu rumah iya, Helen meda mua Josphine enda baka selama.

“Lapa mua nuan puchat, Josephine?” tanya Helen.

 “Nadai dih. Baka selama mih aku tu,” ku saut Josphine maya ti ngusung Helen laban deka madahka iya pasal penusah ti ninggang Sarjan Kanang.

Berat asai mulut iya deka ngenataika berita ti enda manah nya ngagai bakih iya nya. Enda dipadah salah, dipadah lagi salah. Kada Helen ulih nerima berita ti dibai aku tu lagi, pia ati ku Josephine. Udah bepikir dua tiga kali, iya nadai chara bukai.

“Helen…, la…la…ki..” Tusah amai asai mulut Josphine deka nyebut jaku nya. Mulut kekimut tang enda pansut leka sada. Helen alit ati meda ulah Josphine baka nya. Tegenung enda lama iya meratika mua Josephine, lalu nanya.

 “Lapa nuan, Josephine? Nama utai deka dipadahka nuan?” ku Helen.

 Josephine makin kesal ati. Taja pia iya iya enda tau enda meranika diri ngenatika berita ti enda manah nya.

“Laki nuan bakal, wai,” ku Josephine.

“Balat wai?” ku Helen nyaut.

“Enda. Telih mimit aja. Sabar mih, wai,” ku saut Josephine. 

Asai ke mesai sintung pala Helen. Kesal amai ati iya. Asai ke diambi mimpi ninga berita nya. Asai ke enda pechaya, tang enda patut ga Josephine nundi iya baka nya. Bebelas-belas taun laki iya udah betempuh enggau munsuh, baru sekali tu nasit iya jai.

“Kada enda ngemulaka aku Josephine? Kena iya ngenyamaika ati aku. Kada enda mati laki aku nya?” ku Helen bejaku dalam ati diri.

Lemi tulang asai tubuh iya. Makin lama makin petang utai dipeda iya. Luput. Helen pan dibai bala bakih iya ke klinik platun lalu diperubat. Iya ngeleda gerai baka selama. Maya helikopter ti mai Sarjan Kanang terengkah ba padang kem, Helen enda dibai sida meda laki iya, enggaika iya enda tan ati meda tubuh laki iya ti bebalut enggau darah. Lebuh iya ninga bunyi helikopter datai, ati iya kesal baru lalu luput baru.

            (Betampung ba Tusun Ke-33  minggu nyin ila)

Cherita pasal Bujang Berani Iban jeman Raja Brooke di Sarawak dilekaka aku naka tu dulu. Sekumbang ke nganti pansik sida ti bukai aku mai pemacha ngenang pasal cherita pasal bujang berani Iban (Iban Warriors) jeman British, sepengudah menua Sarawak ti dipegai Koloni British. Betuah, asai ke udah diatur Patara mih tudah diri, laban sebedau tu aku endang ngembuan juluk ati deka betemu enggau “Pahlawan Negara” tu. Nya alai, cherita pasal Kanang Anak Langkau tu endang asil ari pansik aku empu maya ti betemu mua lalu berandau enggau Kanang empu maya iya dikangau nyadi “Tokoh Kemerdekaan” ba pengerami “Hari Merdeka” di Sibu (SMK Sibu Jaya) 31 Ogos 2010. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whtssp tu: 013 8325146  

Oleh Harry Usup Umbar