Berujanka Ai Mata Maya Gawai

JANTAN UMBAT

Tusun Ke-2

“NYANGKA bisi pengaya; reta tengkira deka diulih ngisi bilik penaik kami,” ku iya belantangka ati diri. Bini iya ketawa ngeraba ninga utai ke enda patut-patut disebut laki iya. Iya ke bendar, ati Jang balat enda nyamaika utai nya. Sema jaku, dalam mimpi pan utai nya nyadi enda mih nya manah. Enti orang kelia lalu diintu orang. Abis nadai dibiau enggau manuk dikena ngmpun tauka nunduk awakka utai ti bisa tau tabar lar. Awakka utai tajam tau tumpul kudul. Tu nama daya apa kira? Enti menua nadai betagang mindah, udah seduai bini iya pulai jampat nengkira minta ampun tauka nyukul utai ti nyadi nya. Enti enda ngintu enggau paderi abis nadai sembiang diri empu.

Jang lalu beratika kalender lalu berundingka hari bulan ti manah deka minta peremisi sereta minta peremit ari polis awakka ulih pulai ke menua. Ba Jang nya pekara berat. Nya bekaul enggau pengidup; besangkut paut enggau pemujur ruang bilik. Ati Jang majak irau.

Lebuh datai ke balai, deka betemu enggau polis, Jang baka ke nganjung paung empa jani.  Baka buyah ke nabakka diri ke api, baka manuk ngerejah taji. Betemu enggau polis nganjungka diri dikeleseka.

“Ni bukti bilik nuan bah? Tu ukai musim pengujan. Kebuah nya enda masuk akal,” ku Tuan Polis.

“Anang guai dulu Tuan. Anang munyi nya. Hal ujan tu enda semesti iya bemusin. Ditu ujan di endur bukai tau nadai. Ba endur bukai ujan ditu tau rangkai. Tambah mega nya utai ti nyelai nyadi. Nya kebuah deka meresa kin,” ku Jang nguji mujuk Tuan Polis ti dijangka Jang endang nadai deka mendingka jaku Jang.  Polis nya enda meretika utai ti nyelai nyadi.

“Ni gambar ke bukti?”

“Menyadi aku ke ngibun rumah nadai nemu ngambar; tambah mega iya nadai kamera,”

“Lapa enda ngasuh orang bukai ngambar,”

Jang enda nyaut.

“Minta tulung Tuan ngena budibicara Tuan,”

“Ni ulih nulung sebarang. Tu maya nadai ulih mindah. Penyakit Covid benung berampit. Kebuah nya bodoh,” ku Tuan Polis. Tak nadai basa sekali-kali

TUAN POLIS BEJALAIKA ADAT

Jang ngetupka ngeli iya. Ku ati iya tuan polis nya sumbung. Baka robot. Nadai feeling. Gaji iya setaun enda chukup kena ngaga rumah aku nya,” ku runtun ati ringat sereta malu Jang ke ngasaika Tuan Polis nya nadai diplomasi sekali lalu ngeleseka iya baka ke enggau nembiak mit. Nyangka Tuan Polis nya ngira Jang deka nipu. Dalam ati Jang sekumbang iya nyadi tuai orang maya iya agi gawa perintah suba, iya enda kala nipu. Jam ati ke pedis, nyau macham-macham utai tama ngagai runding. Pengawa polis nya nulung orang enggau jalai ke patut. Tuan nya ngira kuasa ke ba iya nya kuasa aki iya. Isa ga iya enda ulih meri permit tang terangka enggau siru pama agi ga ati. Udah ga ati tusah ditambahka agi enggau jaku kasar tuan polis.

Pulai ke rumah ati Jang chukup tusah. Iya duduk nukung. Udah ati iya chelap, bisi nesal ga ati iya ke jaku diri tang kati ku enggau ku iya. Tuan polis bejalaika adat lalu ni ulih sebarang meri peremit. Jang enda nesalka diri ke enda bulih permit amat ga enda dikeleseka.

Jam nya mih maya Jang nerima berita siti ga madahka ipar lelaki iya ti bebini nguai ke orang di Bagi Ketujuh benung raya sakit lalu dipelabaka enda nyadi kitai. Tiga hari udah nya datai berita ipar iya nya udah nadai. Ati Jang enggau bini iya luluh. Minta permit ke Saratok dih enda bulih, anangka tu ngagai Song. Iya enggau sabak-sabak berundingka jalai kin. Bulih pan permit sapa ke dribe motor? Sida anak niang ulih kin tang enda ga ulih mai ngelui ari tiga iku orang. Ke pengujung, Jang seduai bini iya tak mati kutu; enda mih seduai iya melaki bini ulih kin. Seduai iya enggau bala anak iya tak diau enggau sabak enggau insak. Sida semina ninga berita ari telipon enggau video call dikena nemu utai ke nyadi di Song. Kasih amat ipar. Taja pia, Jang bisi lantang mimit ga ati laban ipar bukai iya ulih kin lalu bejakuka pasal adat pemati ti dibai ipar iya ke ninggal nya.  Iya diperadatka laban nya enda dikereja sida di menua nyin tang sida din besetuju nitihka adat ari penatai asal iya, iya nya ari Saratok.

Kira-kira seminggu udah niang ipar Jang udah di tanah, datai berita ti balat ngenyit sereta ngesalka ati mega. Siku anak buah Jang, iya nya siku anak indu menyadi lelaki ke biak ari bini Jang ke bekereja di sebuah kompeni luar di Kuching udah ditaban ngagai Sepital Besai di Kuching laban pedis perut kenu. Bala ke diau di Kuching semua begau berundingka diri ke udah ditinggalka niang Apai Sanu di Song, diatu sebengkah ga penusah nyadi ti ngasuh perut engkual. Anak buah nya dipasukka ba ward laban penyakit iya nasit jampat ditemu. Udah diperesa lutur, ditemu anak buah nya bisi utai tumbuh ba sarang anak. Ati bala tusah berundingka penyakit baka nya ti nyadi ba iya ti agi rumpas. Utai tumbuh nya mesti di buai ku lutur, nya alai iya nganti hari agi alai deka beputung. Ati bala balat tusah. Sepital kemaya tu ukai tau alai ngabas orang ke sakit. Dua hari udah nya,  anak buah nya lalu beputung. Penyakit nya mujur dibuai. Puji Tuhan iya diasuh pansut ari sepital ngenatka diri di rumah.

BETAMPUNG…