Temegah ngemeran tusut, dama Iban

SIDA dalam gambar tu semua diri petunggal tauka diri menyadi magang. Ari penemu betusut meh sida nemu sapa pangan diri lalu dunya IT baru diatu ngujungka sida ulih begempuru ba siti endur ba siti pengerami.

KITAI bansa Iban endang udah lama balat dipuji bansa bukai, kelebih agi bala social anthropologist ari menua tasik. Sida tu meh raban ti mansik asal penatai enggau mayuh gambar utai bukai besangkut paut enggau adat asal siti-siti bansa mensia di sebengkah-sebengkah menua di dunya tu.

Uji sebut nama Prof. Derek Freeman, Eric Jensen, Prof. Emeritus Dr. Clifford Sather, Prof. Emeritus Vinson H. Sutlive Jr., Haddon and Start, Ling Roth, Michael Heppell enggau mayuh penulis sereta pemansik bukai, jarang bala akademik enggau mayuh bala ketuai kitai Iban ti apin tauka enda kala macha bup enggau utai tulis sida tu.

Kitai Iban empu pan bisi ga udah nulis pasal socio-politic enggau socio-culture kitai bansa empu. Sida tu nyengkaum (Dr.) Benedict Sandin, Dr. James Jemut Masing (Tan Sri Datuk Amar), Datin Amar Margaret Linggi, Dr. Peter Mulok Kedit, Dr. Dusit Jaul, Dr. Robert Menua Saleh, Janang Ensiring, Jantan Umbat, Janet Rata Noel enggau sekeda bala bukai.

Siti ari pengelandik kitai Iban kelia nya dalam pengawa betusut.

Pengelandik sida betusut, taja pan nadai ditulis baka rebak baru diatu, nya siti utai tau bendar ngalitka ati. Semua penemu tu dalam pala enggau runding sida magang. Semua datai ari pengingat, datai ari apal magang. Tu meh pengelebih sida rambau nya.

Pengawa betusut tu balat bendar dikemeranka mensia mayuh ba menua Batang Krian enggau Batang Saribas kenyau ari terubah kitai Iban udah selampur nguan dua bengkah batang sungai nya enggau pati-pati seduai.

PENGAWA BETUSUT KURANG

Nyadi ba menua Batang Rajang, Batang Kemena sereta enggau Batang Baram bisi ga betusut tang naka ti ditemu penulis, pengawa nya nadai tentu dikemeranka sida baka di Krian enggau Saribas. Kebuah iya kurang, laban beduduk ari penemu pasal pengawa betusut nya bisi kurang tauka nadai terus bebanding enggau kandang menua Saribas enggau Krian. 

Ba menua Batang Krian diatu pan nyau majak kurang orang ti landik betusut. Pengabis dudi ninggalka dunya injau tu orang landik betusut ba menua kami, nya niang Mathew Banyin Nyaru, ari Kedap, pegai Saratok. Maya iya agi idup suba penulis suah bendar berandau enggau iya laban keran deka nemu pasal mayuh bengkah pekara nyengkaum pengawa betusut.

Banyin ukai mina landik betusut, tang mega landik bebiau, begeliga, ngansah sereta bejaku ba pengerami kitai Iban, mina iya enda landik benyawa baka berenung, nimang jalung tauka penemu benyawa bukai.

“Mayuh kitai Iban enggai tauka malu enti orang betusut, laban takutka ditemu orang baruh pendiau aki ini kelia, nyengkaum sekeda ke nyadi ulun orang. Nya alai enti lebuh maya bisi pengerami belaki bebini, iya nya atur melah pinang, sekeda apai indai mayuh madah enda nemu tusut, tang kebendar,  sida engka bisi utai kenangi. Tu nyengkaum enggaika pemaruh pendiau aki ini sida ditemu orang, baka sekeda ke kala nyadi ulun orang dulu menya,” ku Banyin, ke mega madah penemu betusut tau mega  kena ngiga kaban belayan.

Enda nya bula, tang mayuh agi orang ke madah enda nemu betusut nya endang amat enda nemu, ukai tegal bisi utai kenangi tauka bisi utai dikemalu sereta bisi utai deka dilalai.  Kebuah pia, penemu betusut tu jarang dikembuan.

Suba di Batang Melupa, kelimpah ari niang Banyin, bisi Ipit Mansur di Munggu Embawang ke nemu betusut. Nyadi tusut Banyin tu dipelajar iya ari niang Ngelambai Rembuyan seduai niang Magat ti sama landik betusut.

PENGAWA BETUSUT JARANG DIKEREJA

Sida ari menua Rimbas ke landik betusut dulu suba nya niang Pengulu Henry Ganja ari Ulu Bayur. Niang Pengulu menya suah endar betangkup enggau Banyin enti bala orang Melupa tauka Batang Krian bisi betampil enggau bala ari Rimbas. Sekali dalam taun 1984 lebuh bisi orang dua iku jadi melaki bini di Sibu alai Banyin enggau Ganja sama diambi betusut.

Nyinuk endar bala sida Batang Rajang ninga seduai betusut, laban pengawa betusut jarang dikereja orang menua nya.  Maya nya agi idup bala sida niang YB Joseph Kudi, niang Datuk Temenggong Sandah, niang Senator Joseph Unting ke sama bela bisi datai ba pengerami nya kelimpah ari mayuh orang bukai, ke tebal agi bala agi menua Saratok, Debak enggau Betong.

Empa pengelandik seduai nya ke betusut indu enggau lelaki ke melah pinang malam nya kena 8 Disember, 1984 dipetusutka ari sepiak-sepiak. Ari apai indu enggau apai lelaki seduai mina empat kali petunggal, lalu ari indai indu enggau indai lelaki, seduai sembilan kali petunggal. Bala mayuh chukup andal ati merati pengelandik seduai ngait tawing nya ngena jalai tusut.

Nya alai lengka senentang nya, enti bala Iban dulu kelia deka belelang, sida mesti enda tau enda nemu mimit tusut diri empu.

Kebuah pia, laban enti sida nemu betusut, sida mudah agi bulih kaban, lalu mudah agi ngentap diri ba siti-siti alai, laban bisi kaban belayan endur diau.

Nyadi kemaya hari tu, taja pan pengawa ngintu tusut nya nyau udah dibuai ukai tegal enda rindu, tang laban nyau udah nadai agi orang ke mengkang ngembuan tusut, nadai ga kebuah kitai tau nejuka penemu nya tebuai pia aja. Ukai nya mina tegal laban enggai enda nemu sapa aki ini, tang laban kitai ke idup tu enda tau enda nemu kaul kitai enggau bala kitai Iban ari ai bukai ke bisi tali darah.

Ngena awak tu, kitai tau meda penyauh kitai ngempit tauka ngejang ari pangan diri ari kita meda tusut di sebilik ari antu, ngagai Singalang Burung, ngagai tubuh balari anak diri ke diatu, baka ke entudi tu.

Patu Pejuru Ulup Selampur Banan bebini ngambi Dayang Bangi ti Betanggi Ayung Langit, Kumang Bisi Pemandang Tukang Tau Tilit, beranak ka Abu, berumah di Munggu Tinggang Guntur. Iya bebini ngambi Dayang Saur Landik Ngukur Mata Isau Pengundur Bala Nyerang beranak ka Nising Berumah di Tinting Pandang Lambur. Iya bebini ngambi Dayang Linja Penyaga Pua Bali Berandau Penyandik Leka Balang Berang beranak ka Bedang Bungkuk Belakang Pemandang Batang Tiang Bediri Taja Rembi-rembi Kena Pandang Leka Balang Beranggung ke bebini ngambi Bandai Rampai Punggai Sebangki Sandi Kaki Tangga Jejabung beranakka Aki Lang Buban Ngembuan Leka Mudan Seperugan Ringka Gantung, lalu bebini ngambi Tanga Tali Bediri di Kaki Tiang Sandung lalu beranak ka Orang Tuai Bejuluk Lumpung Tigai Nadai Begapung, Aki Lang Singalang Burung Bejuluk Pandung Renggang Sundang Surung ke bebini ngambi Indai Kechendai Lawai Pantak Jirak Dara Sentaba Balun Kupak Sandik Anak Tunggang Jejabung.

PETURUN SINGALANG BURUNG

Angkat dek tak renga pedera enda nyamai tabin tebirin lembau makai meh Indai Kechendai tu lalu dipelianka Jaban Betawaika Gendai, pindahka nama ngagai Endu Sudan Berinjan Bangkung Endi Diu Tiung Menyelung.

Nya baru iya nyera pelangka dada, ngandut di perut ngandung di punggung lalu beranakka Endu Dara Tinchin Temaga Endu Cherebuk Mangkuk China belaki ngambi Ketupung. Tinggal Ketupung ke belelang ke Punggang Remang Nyerapung ngiga gerunung siung kena ngelapak padung paya berimban, tinggal Ketupung bekubuka Punggang Remang Biru ngiga baju beludu chelum ngelepu entilan sawan iya belaki ngambi Menggin @ Ming beranakka Surung – bisi mega disebut Sera – Gunting bebini ngambi Surung Ngiang beranakka Entali Bunga Ngambi Aka Dara Lantau Sekumbang @ Surung Kempat bebini diambi Ranjau lalu beranakka Riduh ngambi Ali – bisi sekeda tusut madahka Riduh diambi Bada) beranakka Gupi ke belaki diambi Bujang Belang Pinggang beranakka Beragai ngambi Chundau beranakka Beti ngambi Duri beranakka Talak ngambi Pandak beranakka Jawat ke belaki ngambi Gedur beranak ka Gendup lalu ngambi Ujur beranakka Dunju ngambi Indit beranakka Mara ngambi Tumi lalu beranakka Dap ngambi Jenun beranakka Tapa ngambi Ingkat beranakka Sarung ngambi Tatal beranakka tujuh iku menyadi iya nya Medang, Janang, Galau, Nain, Radin, Ayai engga Anggat (mati bujang).

Sapa ti bisi kaban belayan kena sebut ulih nampung tusut tu. Penulis ngerapaska tusun tusut naka tu aja laban apin datai ba tubuh sida aki ini, apai indai diri.

Taja jalai tusut nya enggau bisi enda sebaka, kitai patut sama temegah ati nyadi peturun Singalang Burung ti nyadi petara bumai ba pengarap lama kitai Iban.

Bala nembiak rebak baru diatu tebal agi enda nemu aki ini diri empu, anangka nemu dalam agi penatai diri empu. Tu nyadi siti vicious circle laban bala anak sida dudi ila pan sama ngembuan pengurang ti sama lalu ngujungka kitai Iban enda nemu asal diri empu. Beduduk ari enda nemu sapa dama aki ini diri empu, apai indai pan lagu ngaga dama anak sida sebarang nama ti ukai nama ethnic Iban. Baka ni orang ngelala kitai bansa Iban enti nama kitai udah bebali nyadi dama ribai? Nya alai anang enda ngangkatka dama aki ini nyadika kelaie kitai bansa Iban.