Berujanka Ai Mata Maya Gawai

Tusun Ke-3

BA minggu kedua, udah aki Song iya ditumbak tauka ba minggu nangkanka anak buah ke beputung di Sepital Besai, enda nemu kebuah tak enda ngetu-ngetu mih sida Jang kena tuntung penusah. Ke sekali tu sida Jang nerima kangau talipaun ti madahka siti berita pasal anak indu petunggal bini Jang ti dikangauka bala Bibi tak kena sakit lalu ditaban ngagai Sepital Sarikei. Bibi sempat ngeregister diri di sepital, tang udah nya iya lalu luput. Udah diperersa, iya ditemu kena stroke. Bibi ke nyadi pengajar graduate ba sebuah sekula primari di pelilih menua Saratok lalu dipasukka ba ICU.  Berita nya sekali agi balat ngasuh bala teguran. Tak enda arap bala ka Bibi ke baru beumur 39 taun tau tak kena stroke.  Kati iya nadai beperesa pengerai?  Kati iya nadai makai ubat tinggi darah? Tanda tanya baka nya enselit ba runding kaban belayan iya.

Bibi tak lalu enda nemu kitai sepengudah iya ke luput lalu dipasukka ba Unit ICU.  Iya tak lalu garing-garing nadai nemu nyaut tauka bejaku enggau kitai. Iya tak bepanggai penuh ba injin penampung seput ku laki iya, Boy nusui.  Berita enda manah tu ngasuh Jang seduai bini iya enggau anak seduai ke balat bendar rapat enggau Bibi laban sida iya serambau lalu udu bebakih maya sida begulai agi mit. Udah tiga malam di sepital, Bibi ngesuhka seput iya ke penudi ba sepital nya. Iya nadai sempat berandau enggau laki iya tauka bejaku enggau anak lelaki iya ke beumur enam taun. Bibi tak mupuk nadai jaku, nadai pesan.

Bagi sida Jang, datai baru penanggul sida deka minta permit awakka ulih pulai ke menua maya rabat. Gambar Tuan Polis ke ngeleseka Jang asai ke bisi nyeremang Jang. Enti Jang kin, tentu iya deka dikeleseka baru laban diatu nadai udah sempat orang beambika gambar tauka bulih surat pemati ti tau nyadi bukti ti deka dipinta Tuan Polis ba Balai siti nya.  Puas ke betanya kia-kia, bisi kaban ngasuh Jang ngagai Balai Poli siti da ke mega enda jauh ari nya. Jang mutuska runding ngelaungka Tuan Polis nya. Jang enda napatka balai ke suba tang ngagai balai ke siti da.

Ke sekali tu Tuan Polis nya ukai robot lalu bisi ati sereta nemu asai ati orang ke kena tuntung penusah. Iya nadai mayuh kelikuh semina iya ngelalau sida Jang enda tau mai orang bukai ke nadai disebut nama dalam permit nya lalu sida Jang dilalau enda tau ngetu sebarang alai di serantu jalai kelimpah ari seruran  nyaga  SOP. Jang sekali tu muji pemanah basa Tuan Polis siku nya lalu beterima kasih amat ke iya. Nya baru polis berjiwa rakyat lalu berkidmat untuk masyarakat ku ati Jang. Peremit pan lalu ulih. Ati berasai lantang mimit laban siti gigi tangga penanggul udah ulih diperaka.

PULAI MAI ATI SINU

Cherita pasal rabat amat ngenyinuka ati.  Hal ngelanggar SOP nadai nyadi isu laban rumah panjai nya chukup dijaga sida RELA. Nambahka nya bala ke datai chukup disembur enggau ubat sanitizer lalu bala ke begelumu enda lebih ari pemayuh mensia ke ngelanggar SOP sereta nitihka takah ke patut ari pangan diri.  Lebuh pengawa rabat udah tembu, tudah Bibi udah dianjung sida Jang menyanak mulaika diri ke mengeri enggau ati ti pemadu sinu. Sapa enda sinuka pengajar mati biak ninggalka anak ke agi mit lalu ninggalka pengawa enggau bilik penaik; ninggalka laki iya ke deka mikul tanggung pengawa ngintu anak seduai. Nambahka nya, Bibi ninggalka indai iya ke tumu balu ditinggalka niang apai iya suba ke mega mati biak. Kelimpah ari ngenang pemati Bibi, Jang seduai bini iya seruran diregau  penusah bilik tinduk seduai ti kena bah nyelai nadai temu penatai ai. Ba jaku pengarap lama nya burung. Diatu baka ke bisi ayan udah empa burung nya. Seduai enda ngegetu besampi dalam ati awakka  ayu jai nya tau ngetu tau badu.

Di serantu jalai, Jang tekenyit nerima kangau talipau ari tuai kompeni alai iya gawa madahka Jang mesti kena swab sereta lalu ngerantin diri 14 hari sebedau nurun gawa. Tu ngenyukupka pemayuh jelekah ti nyadi ba Jang. Udah diswab, Jang dilekatka gelik SDMC ba dekuan kanan iya ke tanda iya enda tau pansut ari rumah dalam timpuh ti ditetapka.  Lebuh Jang ngenang nyangka nya mih  sangking ulu ti dipadahka bilik tinduk tau tak laban bah.

Baka ke enda tembu naka nya, siti da utai ti nyelai lalu amat ngalitka ati nangkanka utai bukai ke nyadi. Ba lemai 28/5/21 datai berita madahka siku sida di rumah sida Jang di menua udah dipasukka ba Sepital Saratok laban ditemu positif Covid-19. Ari nya ayan ba kacha tv maya berita lemai, rumah sida nya sebuah ari sekeda rumah panjai ti deka kena adat bekurung belabuh ari 29 Mei 2021.  Amat-amat nyelai. Ukai nya aja, iya ke kena Covid-19 nya tukang ke ngaga rumah Jang di menua suba.

Utai ti nyadi nya udu nyelai tang amat nyadi. Jang seduai bini iya besampi minta sida sebilik dilindung diserayung Jesus awakka sida ngetu dituntung penusah. Seduai iya enggau pengabis baruh ati minta Petara Allah Taala nyaga ngemataka sida sebilik awakka diseliahka ari  sebarang penguji ti ngenusah. Nambahka nya seduai minta Jesus ngesuhka roh kudus iya awakka kuasa sitan ti ngasuh bilik penaik seduai iya tau kena banjir rari mindah misah. Seduai iya minta Jesus ngunjurka jari kudus iya murus nguntus sida sebilik awakka  muai ngesaika penusah ti ngachau ngeregau sida sebilik. Tulung sukung mih sida sebilik awakka sida ke agi meruan berujanka ai mata  maya Hari Gawai taun tu tau pulai lantang  baka selama. Besampika Tuan Jesus begulai lalu diau enggau sida belama-lama iya. Amen.

AMBIS …

Oleh JANTAN UMBAT