Cherpan Lalau Pendiau

Tusun Kedua

UDAH nya lalu disemburka iya ngagai mua tudah Tekuyung. Tak bengit-bengit mua tudah Tekuyung dikepiaka Juak.

“Umbas mih mantaika tundi kasar baka nya, Punggal! Anang tak nyau datai ngagai pangan diri ringat,” ku Tekuyung sambil merening tajam ngagai Juak. “Lalu mansutka jaku pen baka nya mih, Punggal, anang kelalu tekebur tak dulu ari Petara munyi nya! Pengeraja enda ibuh dulu dicherita; pengering enda ibuh dulu diselaing; dengah enda ibuh dulu dipadah. Ga ila mansang ditemu, mansang dipeda!” ku Tekuyung.

             Seduai lalu besemaya belaban nyemerai berengkah ari pagi, ba hari siti ke ngilah nya. Adan ke dipesetujuka seduai, berengkah ba Lubuk Mumban, iya nya lubuk ke alai seduai besemaya nya, ke ili ngagai nanga Sungai Patah Selayan nya, nikal baru ke ulu ngagai Lubuk Mumban, lalu tamat dia.

             Juak angkat ari nya lalu ngujika diri nyemerai, matih seput diri ngambika tan lebuh nyau belaban enggau Tekuyung hari siti.

             Pulai Juak, Tekuyung lalu ngangauka bakih iya Kenyulung. Ninga kangau, Kenyulung pen mansang kia. Tekuyung lalu nusui diri ke udah besemaya deka ngelaban Juak belumba nyemerai. Adan pelepas enggau adan penamat mega lalu dipadahka Tekuyung ngagai Kenyulung.

             “Ke bendar, kebuah aku ke ngangauka nuan laban pinta tulung. Aku ngasuh nuan nyemerai berengkah ari Lubuk Mumban tu terus kili kin ngagai nanga Sungai Patah Selayan. Semua teluk jenguk, lupak silak, tebing perening, rantau keranau. Tesau nuan semua kaban belayan aku ke diau kili-ili kin nyentuk ke nanga, lalu padahka sehari-hari pagila asuh sida sedia magang ngemataka Juak, laban aku udah besemaya belumba nyemerai ngelaban iya berengkah ba Lubuk Mumban tu lalu kili kin ngagai nanga Sungai Patah Selayan tu, nikal ke ulu tu baru, lalu tamat ba Lubuk Mumban tu ditu. Lebuh sida meda Juak nyemerai mansang kili enggau nikal kulu tu baru, asuh sida empikil jenuh ba batang, lalu naka ulih ngaga gamal diri sebaka enggau gamal aku. Pinta tulung beamat-amat tu, Menyadi,” ku Tekuyung nganu Kenyulung. Kebuah iya andalka Kenyulung manggum leka pesan iya nya, laban Tekuyung nemu siku nya pas berampas bejalai kulu kili.

             “Barang iya mih,” ku Kenyulung, “semadi tak nuan, enti orang bukai minta tulung ngereja pengawa nyabung orang baka tu, nyau nyebut diri-empu enda.” Lalu nyemerai Kenyulung ke ili-ili nyentuk ke nanga Sungai Patah Selayan nya, nyadung leka pesan Tekuyung nya ngagai semua kaban belayan Tekuyung ke diau dalam ai ti kena teresa seduai ke belaban nyemerai hari siti.

LUBAH BAKA TEKUYUNG

             Awal pagi hari siti ke nangkanka nya, Juak seduai Tekuyung lalu belepas. Adan seduai ba jul batu anchau da kaki Lubuk Mumban. Ninggalka adan pelepas, Juak agi nyemerai main-main, laban iya endang nyadang Tekuyung enda tetitihka iya. Kebas-kebas Juak nyemerai ngejangka adan. Enda lama, iya nyau nadai agi dipeda kilap. Iya udah di ili. Tekuyung masih enda engkebut, semadi nyau ulih nyerenih bendar-bendar baru bisi dipeda beginsut mimit. Sapa ke enda nemu pengelubah Tekuyung, keba selalu disempamaka: ‘lubah baka tekuyung.’

             Juak semampai nyemerai tang masih ngantung tulang, laban ba runding iya, nadai kebuah iya nyemerai bebunuh tulang ngelaban orang ke suma nginsit baka Tekuyung nya. Ensepi diri nyau udah pama ga penyauh di ili, malik iya ke belakang, peda iya nadai ga Tekuyung ayan.

             “Nih, dini iya bengat tetitihka aku,” ku ati Juak. Iya lalu ngalap. Udah ngalap, merening iya ke mua, peda iya endang udah dingking-dingking Tekuyung empikil ba batang. Tekuyung tak agi suman pendiau, bedau baka ke apin nyemerai. Tekenyit bendar ati Juak laban, dikira iya, enda patut Tekuyung udah ngelih iya.

             “Banggar endar Tekuyung tu kau!” Nyau baban ati Juak, tang mai ati iya lantang mimit, enti iya udah bebendar agi nyemerai, Tekuyung tentu enda nemu riap iya. Sereta dijengkuka iya tubuh muak ke iku iya, Juak lalu merejuk, bekebu nyemerai, meraka reba, melunggang batang, melunggar lansar.

Nyadi Tekuyung, pengelubah iya tak nadai endur nyema, enti mina ditilik enggau mata suman, enda ditenggau ngena terupung, endang nadai meda iya nginsit kitai. Tang mih lebuh Juak belengah kedua kali, ketiga kali, keempat kali, abis pengelelak-lelak, pengikak-ngikak, peda Tekuyung endang udah lingas-lingas empikil ba batang. Gamal iya tak agi suman, apin bisi puri. Tak baka ke apin nyemerai.

BETAMPUNG…

Oleh PINSIL SARATOK