Cherpan Lalau Pendiau Anang beguai manjung sebedau mumpung;Anang beguai nyangkah sebedau bedengah

Tusun Ketiga

MEDA baka nya, Juak enggai ngetu lama. Udah iya nyeling-nyeling, enggai tentu malik bendar, ngagai Tekuyung, iya ngebuka diri nyemerai. Deras bendar, semina sekejap aja kilap tisik iya bisi dipeda, alai iya lesap. Iku iya, laban ke bechura chelum berada, endang lalu enda dipeda kilap, empa peneras iya. Lebuh sebentar iya ngejuka tulang, tekenyit iya disapa Tekuyung ari mua.

          “Hallo, Punggal! Raya ga pengelubah nuan nyemerai, lalu enda tegelihka aku!” ku nyawa orang nyapa. Malik Juak, peda iya Tekuyung baru ga, engkabit teguh-teguh ba batang.

          Beruntu baru ga Juak nyemerai. Sekali nya, deras agi. Batang, reba, pun kayu, rau, kerangan enggau batu semiup-semiup kena pansa iya. Apin lama bekau nya, dinga iya bisi orang ngensung, dulu ari iya. Malik iya, peda Tekuyung baru ga udah duduk jangah-jangah atas batang. Tekuyung nyau enda agi empikil ba batang.

          “Apuu, mati mih ngelaban orang ngeneras Tekuyung tu dih!” ku putap Juak alam ati. Iya ukai semina lelak, nyau ikak. Utai ke belir-lir, tang ukai ga nya insak, nyau pansut-sepansut ari selepak singap. Ketupka iya ngeli ngenying kirik-kirik, lalu bekebu baru ga iya nyemerai. Iya pan baru dipeda kah merebau ti ke adan endur beputar ba nanga Sungai Patah Selayan, dinga iya kalau-kalau nyawa Tekuyung bedindang. Ringat meda Tekuyung udah datai dia, Juak lalu nguji nikal ke ulu ke baru.

          “Eh! Eh, Punggal Juak, anang beakal-akal baka nya. Mesti ditu beputar. Enti nuan beputar dia, menang pan nuan lagi, dikira enda asi mih!” ku kangau Tekuyung sesetengah ngeleseka Juak. Juak, ka-pan-enda, mesti nuntung ba kah merebau di ili sebedau iya beputar pulai baru ke ulu.

NYEMERAI MAI RINSA

          Ngejangka kah merebau ke ba nanga Sungai Patah Selayan nya, Juak nyemerai munuh diri, tang endang nyau mai rinsa amat-amat. Sepemanjai sungai nya, kenyau ari nanga, alah datai ngagai Lubuk Mumban, endur adan pelepas enggau penamat, penuduk Juak seduai Tekuyung masih enda berubah. Juak selalu dudi; Tekuyung selalu dulu takar ke nuntung ba adan. Iya mih Juak nuntung ba adan penamat ba jul batu da kaki Lubuk Mumban, iya pan nyau ulau banta, jengap-jengap ka luput. Iya lalu ngedu dulu ke tebing, ngiga seput. Nyau bekerenjui ai mata iya runtu ati kelalu pedis sereta lebu ketegal alah berumpak nyemerai ngelaban Tekuyung, ke endang dijangka iya alah laban iya. Lebuh seput nyau lantang agi disintak enggau dikesuh, nya baru Juak bejaku. Ku iya:

          “Akai-rai, Punggal,” ku Juak, “ngelamatu ngumbai tak nadai orang tegar agi ari aku nyemerai. Tu baru aku nemu diri nadai tunga-tunga lebuh belaban enggau nuan. Nadai mih peneras aku dibandingka enggau pengelaju nuan, telah agi enti dipebandingka enggau pengelaju sida gayau, sida genali, sida semah.” Lalu digilik-gilikka iya pala, nesalka jaku enggau ulah diri ke tak bechakap ke ulu bechakap ke ili, ngiga orang dilaban berumpak nyemerai ngelama-lamatu.

          “Nya mih, Punggal. Keba lalau orang ke tuai ngasuh kitai selalu ngimpun mulut sereta cheremat pendiau. Nyaa nuan ngelama-lamatu tak dulu kalau-kalau manjung, tang mih dengah apin dipumpung. Nyadi aku, dengah tu udah dipumpung, nya alai aruh lah tau manjung. Manjung lah aku tu…Uuuuuuu-hui!!!” ku Tekuyung. Jaku lalu disulur iya enggau panjung.

          Berengkah ari sehari nya, udah bekau iya alah berumpak nyemerai ngelaban Tekuyung, Juak badu kelelalu muji diri munyi selama. Penyumbung iya mega nyau jauh kurang ari selama. Nya baru iya nemu ngasaika empas jaku ajar tuai ti ngumbai Penyumbung mai penyundung.

          “Nya lah munyi pengujung ensera ‘Lumba Juak Seduai Tekuyung’

          Dalam penemu kita, nama sekeda ari ajar ti bisi teselit dalam ensera nya tadi?” tanya Pengajar Edward.

                    Sekeda bala sida penulis sekelas ke jampat agi berunding lalu bela nirika jari, deka meri saut.

                    “Uji nuan Philip,” ku pengajar sambil nunjuk ngagai Philip Linggir “meri sebengkah ajar ti bisi diundan ensera nya tadi.”

                   Philip bediri sereta lalu meri saut. Ku iya, “Terima kasih, pengajar. Dalam penemu aku siti ari ajar ti manah, iya nya ensera nya tadi ngajar enda ngasuh kitai teperasa lebuh kitai meda penungu orang, laban orang ke tungu kadang-kadang nya orang ke ngembuan mayuh penemu ke menyana, mayuh pengelandik enggqau penau tauka penegar, penyikar enggau pengering dikena ngereja pengawa.”

                    “Very good!” ku puji pengajar. Iya ngilas sebentar ngagai jam-tangan ti betanggam ba dekuan iya. “Laban awak jam kitai tu nyau suntuk, aku minta siku da agi meri penemu diri. Okay, uji nuan Seblen. Nama ajar, dalam penemu nuan?”

                    Seblen Sindoi bediri sereta lalu meri penemu diri. “Dalam penemu aku, sebengkah da agi ajar ti ulih serenih kitai ari tiu leka ensera nya tadi, iya nya siku-siku mensia mudah tepipi dalam pendiau enggau pengidup ketegal tekebur bejaku, sumbung ulah sereta begah perangai iya-empu.”

                     “Manah, Seblen,” puji pengajar. “Lalu sebengkah agi jaku sempama ti tau dikena kitai ngerara siku mensia ke berulah baka Ikan Juak nya tadi, iya nya Anang beguai manjung di pala wung; anang beguai ngangau di kaki rantau,” ku simpul penemu diberi Pengajar Edward Enggu sebedau iya nyurutka diri ari bilik Kelas Form 1A pagi nya.

Oleh PINSIL SARATOK