Cherpan: Hari Apai Sedunya

Tusun Ke-1

20 HARI BULAN JUN nya hari ti pemadu dikerinduka orang di serata dunya. Din-dia lalu dini-dini orang ngirumka pesan ngagai pangan diri “Happy Father’s Day”, “Selamat Hari Bapa”, ‘Selamat Hari Apai’ ngena nama-nama jaku sida empu. Bemacham-macham chara orang ngenataika jaku pesan diri. Bisi nya ngirumka gambar ba Facebook; bisi nya gambar ngayanka pasang melaki bini nunga kuih ti mandangka diri ngintu hari ti amat bereti nya, sekeda semina ngayanka gambar diri begulai enggau apai seduai indai sereta bala diri sebilik ti ngerami hari nya enggau gambar apai nerekun gupung bungai diberi bini enggau bala anak. Kelimpah ari ngirum enggau chara nya, bisi mega ngirumka video lagu  ti nyeritaka tanggung pengawa siku apai. Bisi mega nengekebang jaku bebuah, sajak enggau poetry ti dibacha bala sida DJ di radio.

            Tudah Igat enda enggau orang bepesan taja pan iya nerima mayuh pesan nuju iya. Iya ukai enda rindu; ukai kepapas lalu ukai mega chemuru tauka ngembuan ati ti deka mantah mejah orang. Iya tak temati kutu ngenang diri ke nadai agi apai lalu ngenang ini orang nya mega ke sama nadai agi apai. Seduai iya enggau ini orang nya semina tak nerekun dalam ati pengingat pasal apai  diri ke nadai agi dipeda.

SELAMAT HARI APAI

Semina pengingat pasal sida ke meruan lekat di tungkul ati.  Ari empat iku anak seduai, semina siku ke nyadi apai lalu tiga iku menantu nyadi apai. Seduai iya bedau bisi uchu nyadi apai. Taja iya tak diau, dalam ati iya tak beketengut asai pengingat ti seruran nagih minta dilua, minta ditusui enggau minta dikenang ba orang.

            Ba ati Igat bisi dua iti pengingat. Keterubah nya pengingat iya maya agi ngaling apai indai maya agi mit sebedau numbuhka ruang bilik ke diri empu. Pengingat nya pasal kaul iya enggau apai iya maya iya agi mit lebuh iya mansang besai ba baruh jaga apai indai.  Siti da pengingat nya pasal pejalai pengidup diri empu bejalaika tanggung pangawa nyadi apai, iya nya nyadi tuai bilik penaik ke tau disebut lantang.

            Pengingat ke seruran nyengenda nya pasal iya ke enggau apai iya ngiga ikan; sekali nyala ngerambang lalu siti maya enggau apai iya ngerejang lubang ikan. Pengingat nya meruan terang ba tirai runding iya baka ke bisi ditulis.  Pengingat nya enda berubah kenyau ari menya datai ke diatu; meruan segar, nadai betukar ditelan jeman.

Lemai hari siti Igat ngemudika apai iya maya nyala ngerambang. Seduai iya ngili sungai sida ari ili pendai sida. Hari maya nya udah nyauka lemai urung pukul 4.00 pia. Mata panas endang udah lindung puchuk kayu tang apin petang. Laban seduai iya ngili ai, perau nyamai dikemudi. Lebuh datai ba kaki rantau ba pala lubuk, apai Igat segenil awakka perau diasuh mindah lubah. Pengawa nyekat perau ngena sengayuh berasai berat sepi Igat tang iya tak mupuk ngereja enggau naka tulang iya ke agi mit. Igat meda apai iya bediri dedegi ngena kaki sepiak, iya nya kaki kanan iya. Kaki kiba iya disingkaka iya laban nya alai iya manggaika kukun jala ba pah iya. Jam nya apai Igat ngenduk begadai lalu nyapai sigi batu mipis ti udah diengkah ba luan perau. Apai igat ngangkatka tubuh iya lalu ngedang belakang iya sekejap sambil lengan kiba iya ti megai batu nya tadi lalu diayunka iya ke mua. Jam nya lalu diempalungka apai Igat batu nya ti nyau talu-talu sebedau iya temepur labuh ba puak lubuk. Sepenyempat batu nya labuh di ai, apai iya lalu segenil baru ngasuh ngayuhka perau semak agi ngagai chebuk batu nya. Kira udah semanah iya, apai Igat lalu ngayun sereta nibarka jala. Jala nya ngerembai lalu semerap  ngaga rampa segala ba atas ai.

Jala nya lalu tengelam laban iya bisi tating digaga ari gelung bangkang ti udah disanggit ba kaki jala. Apai Igat ngepaika jari iya baru awakka perau betan dia.

Apai Igat lalu nyerungkung ba luan perau sambil ngangkatka jala ti udah dikukun iya. Jala ti udah ngeruyung nya lalu diangkat iya ari ai lalu diengkah jejampat ba ruang perau.

Kilap beberapa iku ikan udah diperekuh jala ngasuh ati Igat gaga.  Ikan nya diulihka apai Igat lalu dipeleku iya ba pegu lalu ditepu iya ke dalam raga ba ruang perau.

Betampung…

Oleh JANTAN UMBAT