Cherpan Lalau Pendiau Bisi Padi Bisi Beras, Bisi Budi Bisi Balas

TUSUN KESATU

BUP diksionari Jaku Iban ti dichelak Opis Yayasan Tun Jugah ti dikumbai Bup Sereba Reti Jaku Iban meri dua bengkah penerang ke lekajaku budi. Reti budi ti kesatu ‘penelap ati; pengerah jari, pementas perangai.” Reti iya ti kedua ‘penyai enggau tipu; pujuk enggau kelakar.’ Cherpan Lalau Pendiau sekali tu diulah bepelasarka reti budi nya ti kesatu, iya penelap ati, pengerah jari enggau pementas perangai.

Baikka nya dalam leka jaku dalam tauka dindang, dia lekajaku budi lebat bendar dikena kitai Iban, mega bansa bukai ke diau di sekayu dunya tu. Ke banding dalam jaku dalam, dia lekajaku budi diselitka baka tu: Bisi padi bisi beras, bisi budi bisi balas tauka Bisi ubi bisi batas, bisi budi bisi balas. Ku perumpamaan Melayu nyebut: Orang berbudi kita berbahasa, orang memberi kita merasa.

Dalam dindang lekajaku budi tu diselit baka tu dalam dua rentayan dindang chunto tu:

“Pisang mas dibai belayar,

Mansau sigi di atas peti;

Utang mas ulih dibayar,

Utang budi dibai mati.”

“Sayau Santubong gunung beringgit,

Tampak sekeliling, terang dipandang;

Kita kaya bebudi ringgit,

Kami miskin bebudi tulang.”

Aram mih kitai terus merindang diri macha sambil kitai nyerenih ajar tauka lalau pendiau ti diselit dalam siti ensera tuai kitai Iban ke disempamaka kitai “Idup mensia bepukuka budi, besandar-sandar sempama aur enggau tebing.”

Kenu ku tusui sida ke tuai ke anda ensera, bisi siti cherita ke nyadi jeman dulu di Pulau Borneo, menua ke dipangkang raban bansa Iban ke mayuh pandai beensera enggau becherita.  Orang ke ngulah cherita dalam ensera tu nya siku Kesa Tunggal enggai siku Burung Puna.

BAKA KESA NGETANKA BUAH

Kenu ku ensera, bisi siku Kesa Tunggal ke belelang menaun, ninggalka menua diri. Iya ngiga lelemu dikena nanka sebarang kayu buah awakka lebuh iya bebuah, buah iya enda ulih ambi anak mensia; laban dalam perati sida kesa, kitai mensia tu rangka amat makai buah. Ketegal nya, sekeda kitai mensia tu sanggup ngenchuri buah orang enti nadai enggi diri-empu. Ari nya, ketegal Kesa Tunggal nya ti lalu enda bulih lelemu pengetan buah, dia raban kesa suah besarang ba puchuk kayu buah seraya sida ke lalu nyaga buah nya diperambika anak mensia. Beratika ulah kesa ke ngetanka buah bansa nya, dia betumbuh jaku dalam Iban ke nyebut “Baka kesa ngetanka buah.”

Keleju-leju ke belelang lalu lelemu pen nadai ga udah bulih, iya lalu tepejuh ngagai Pulau Borneo. Datai di Pulau Borneo, Kesa Tunggal lalu ngentapka diri diau besarang ba puchuk kayu kelampu, muak ke ulu pendai anak mensia. Besenentang enggau kelampu ke alai iya besarang ba tebing seberai nyin, bisi sepun kayu medang. Kelama-lama ke udah diau dia, dia iya beratika bisi siku Burung Puna diau besarang ba puchuk medang nya.

“Isa mih enti baka tu.  Enda mih aku diau kediri, idup nengali. Bisi Burung Puna enggau besemak diau. Tang diau tu enda tau ragak enggaika Burung Puna nemu aku ditu. Enda alah ga iya nyerang kitu,” pia ku runding Kesa Tunggal.

Lengkaka cherita Kesa enda lama iga ngambi ke sesempa semansau pinang. Lalu tusui tukang ensera cherita pasal orang ke empu pendai. Abis kayu api di para, dia apai enggau anak bujang iya bebai ngambi kayu. Kayu api enda tau pungkang di para Iban enggaika nadai dikena berapi.

“Pagi tu ngambi kayu tua, Dom,” pia ku Apai madah ngagai anak bujang iya. “Tinggal ka mimit agi kayu kitai di para, enggaika indai nuan suntuk kayu dikena berapi. Kemas duku. Kemas kapak. Aram nurun tua.”

“Aku tu semai nuan, Pai!” saut anak bujang.

Seduai menyanak lalu nurun, betangkin duku, besan kapak. Seduai nepat kelampu sekayu ke ari ulu pendai sida. Betul-betul ga kelampu sekayu ti deka ditebang seduai menyanak ke kayu api nya, iya nya kelampu ke alai Kesa besarang.

“Nyin tebang tua Dom, kayu kelampu nyin,” ku bai Apai.

Betampung…

Oleh PINSIL SARATOK