Cherpan Lalau Pendiau Bisi Padi Bisi Beras, Bisi Budi Bisi Balas

TUSUN KEDUA

 “MANAH mih nya, Pai. Kelampu lumpak dibelah,” saut anak bujang.

Pagi nya Kesa tinduk ngandau. Iya nadai ninga randau anak mensia diri menyanak ke deka nebang kayu kelampu ke alai iya besarang.

Apai enggau anak lalu besurung nebang kayu kelampu. Datai ba pun kayu, seduai menyanak lalu mantap-memantap. Pantap seduai sama penguat, ga sama tulang bungas. Kapak seduai tajam amat, ga baru labuh ansah. Kena runtu gegar pantap seduai menyanak, tudah Kesa tekenyit sereta tejaga. Enda nemu nama utai ke nyadi, iya ensugau angkat. Tak enda semena-mena ga tudah Kesa, lalu labuh ari puchuk kelampu. Pengelabuh iya terus ninggang ai sungai.

Labuh tudah Kesa Tunggal betul-betul di benung lubuk. Ga endang ukai pendiau Kesa di ai, nya alai tudah tuai enda lah nemu nyemerai. Pia ga enda nemu nyemerai, pia ga ati takutka ai. Nyau baban tudah Kesa nangika diri lemas. Dudi mati lemas, dulu mati dipetangkapka sida ikan juak, ikan enseluai tauka sebarang ikan bukai, ku ati Kesa. Iya tembu tak dayuh-dayuh ngapa, nguji ngemelepungka tubuh diri.

Benung tudah Kesa kapul-kapul di benung lubuk, angkat meda dih Burung Puna ke benung meram telu ba serangan iya di puchuk medang. Kasih meda Kesa ke napi badi baka nya, Burung Puna lalu bedaya nyelamatka iya. Jampat-jampat Puna musil siti ranggas medang ngena patuk iya. Puting ranggas ke semesai batang ruku nya lalu dibuai iya ke ai sungai. Seninjik-ninjik, baka ke diajihka, ranggas nya labuh chun-chun di mua Kesa. Lebuh ranggas nya ke chemebuk labuh, tudah Kesa nyauka sempil di ujung seput.

LANTANG ASAI SEPUT

Iya ampir lemas. Iya semuti ke dapat bedayuh belubah-lubah ngerapat ranggas medang, lalu empikil dia. Dia Kesa belatuh. Nya baru seput iya bisi lantang agi. Baru mata iya terang agi meda penampak dunya. Malik iya ke puchuk medang, peda iya Burung Puna nya luga-luga nganggutka pala, getak-getak nguitka iku. Kesa ke bejaku ngena lingguk tubuh bansa nya endang dikena iya madah ngagai Kesa Tunggal iya nya sepatah ranggas kayu nya ulih dikena iya nyelamatka diri.

“Tentu puna nya ke nyelamatka aku. Tentu iya nya muai ranggas tu kitu ke,” ku ati Kesa.

Lalu belatuh Kesa ba ranggas medang nitihka bai ai. Iya mih Kesa datai ba sentang pendai anak mensia, kelampu ke ditebang anak mensia diri menyanak pen lalu semerum rebah, merembam pendai muak ke ari ulu.

“Kur semengat! Kur semengat!” ku tudah Kesa sambil bepurus dada. Iya besukurka diri ke enda bebadi kena perembam kayu kelampu ti merentum rebah ditebang seduai menyanak nya.

Apin lama bekau nya, ranggas medang ke alai Kesa belatuh lalu tepanggai ga ke tebing ke ari ili pendai anak mensia mimit, kena seging arus ai. Kesa sangkai dia. Iya mupuk ngerayap, niki ke tebing. Datai di tebing, iya lalu tetemuka ratai munti alai niki. Ditiki iya rantai munti, lalu nyemerai ngagai randau belum. Nengah randau belum, iya nyemerai ngagai puchuk kayu manding. Kayu manding nya setanah sereta agi besemak enggau pun medang ke alai Burung Puna besarang.

“Ditu mih aku dulu nyelap, nganti ke begiga ke bukai alai pindah,” ku ati Kesa. Iya lalu diau nyelap ba puchuk kayu manding. Ati iya nadai tentu tak penangika Burung Puna, laban iya sigi nyadang burung nya nelap ati.

Lengkaka dulu cherita pasal pendiau Kesa. Lagi baru kitai nampung ngambi ke selumpung malu tubai. Kitai sekali agi ngading cherita anak bujang orang ke empu pendai. Belanggang sehari bekau seduai meapai ke udah nebang kelampu ke kayu api, anak bujang lalu madahka diri deka nurun nyumpit ngagai indai iya.

“Aku deka bemain tunga ke seberai pendai kitai kia, Indai,” ku anak bujang. Dipegai iya kekuir sebatang sumpit tapang. Temilah sarang laja chendik-chendik ditangkin. Indai iya enda nyaut, semina tak malik ngilas ngagai anak.

Nurun ari rumah, datai di pendai, nembiak nya lalu ngelayang ke tanah seberai, nengah lansar ke ari ili pendai. Niki ke tebing ba tanah seberai, bujang nya bisi tepedaka burung bebidat. Lalu ka uji iya sumpit. Bedau sempat ngesuhka sumpit, alai bebidat chiput-chiput nyau terebai. Bejalai ga iya junuk-junuk, nyubuk. Iya tepedaka tupai, ke benung kusil-kusil mangkil buah dadak. Lalu dikedarka bujang nya sumpit, deka nyelinting. Tepedaka guyap anak raras ke kena tegu ujung sumpit, tupai lalu chagai-chagai melunchat rari besirat iku. Kena guyat tupai nya ke rari, Kesa ke benung ka lelap ka enda ngela tengah hari nya, lalu tejaga. Ditilik iya ke tanah, peda iya kayap-kayap anak bujang mensia ke nebang kelampu ba hari dulu bejalai, mai sumpit. Kesa lalu beratika ulah bujang nya.

Betampung…

Oleh PINSIL SARATOK