Cherpan Lalau Pendiau Bisi Padi Bisi Beras, Bisi Budi Bisi Balas

TUSUN KETIGA

BUJANG anak mensia gining-gining malik ke puchuk medang. Perening iya beamat-amat ngagai puchuk medang, peda iya sarang burung. Lalu dipeda iya siku Burung Puna enda engkebut enda inggut. Burung Puna ngerenut meram telu.

“Hah! Puna nyin!” ku ati bujang. “Lagi asai!!” Lalu ditepuka iya laja ke dalam sumpit. Iya belatur manah-manah, betati deka nyelinting burung puna.

Tepedaka iya ke kinding-kinding megai sumpit, benung belatur deka ngiching Burung Puna, tak enggau penunggang ati Kesa lalu muai diri ari puchuk manding ke ngimbai nya. Iya labuh betul-betul ninggang daun rutan ke betipas enggau pending anak bujang mensia. Kesa lalu ngerayap, nyemakka diri ngagai pending anak bujang. Benung anak bujang nya numpilka pugu sumpit nya ngagai mulut sereta deka ngesuhka laja nuju Burung Puna, Kesa lalu labuh ngeli ngetup sereta manching pending iya. Tekenyit laban pemedis ketup Kesa, bujang nya lalu engkakai enggau nyawa inggar.

“Akaaiii!!” ku iya engkakai. Jam iya engkakai pedis, Kesa endang udah ningkilka diri ari pending iya, lalu muai diri ke tanah. Lalu beguai-guai ngerarika diri, napatka sarang sementara iya ke di puchuk manding. Nyadi Burung Puna, semadi nyau tekenyit ninga nyawa anak bujang nya ke engkakai, baru iya nemu diri ke deka dibedil bujang nya enggau sumpit.

Nyau nemu diri ke nyadi saran bujang nya ke nyumpit, Burung Puna terebai ke bukai, ninggalka sarang enggau telu-telu dulu. Iya lalu inggap ba legit kayu melapi ke enda berapa jauh ari nya. Iya ngira diri selamat inggap ba puchuk melapi nya, laban kayu nya lebat daun. Bujang nya enda tepedaka iya.

Ensepi pejalai diri enda mujur, bujang anak mensia lalu nyurutka diri ke pendai. Datai dia, iya lalu ngerendam diri mandi. Udah puas mandi, baru iya pulai. Iya pulai lebu, nadai utai ulih.

Lebuh bujang nya udah dipeda Burung Puna gendai-gendai bejalai pulai, nyan sumpit, nya baru iya terebai ari puchuk melapi, pulai baru ngagai sarang iya ke di puchuk medang.

PUNA NGELALUKA KESA

Ari puchuk manding, Kesa beratika pendiau Puna. Nyau dipeda iya entap pendiau Puna merembam telu iya ba sarang, nya baru Kesa mupuk ngerayap kia, mansang ngelawa Puna.

Sereta meda Kesa sukur-sukur datai, Puna lalu ngelaluka iya. Meda iya enda kala bejalai kia, Puna lalu nanya, nyangka bisi kebuah ke berat.

“Ka ngenataika pengaga ati diri ngagai nuan aku tu, Unggal Puna,” ku Kesa, “laban nuan udah nyelamatka aku ari penusah. Enti enda ketegal pementas ati nuan ke udah muai ke aku sepatah ranggas alai aku belatuh, nyangka udah dikelaungka nama tudah aku tu. Enda mati lemas, mati dipetangkapka bala ikan ga,” ku Kesa bejaku sambil tuchum.

“Endai aku pan baka nya mih, Madi,” saut Puna sambil ngatur penuduk diri atas telu ke diperembam iya. “Tentu udah nyadi niang tudah aku tu enti enda ketegal pemerani nuan ke ngetup pending anak mensia ke deka nyumpit aku tadi.”

“Nya mih, Unggal, sigi amat pantun tuai bejaku: “Bisi padi bisi beras, bisi budi bisi balas,” ku Kesa Tunggal. Iya lalu madahka diri deka pulai ngagai Puna. “Ke tu, Unggal, kada enda keterubah enggau kepenudi tua betemu, laban aku tu nyau berunding deka ngiga jalai pulai ke menua diri. Aku tu lama bendar udah belelang majau menua.” Kesa lalu kekitut ngerayap pulai, ngejangka sarang Burung Puna.

Kira-kira sebul peti lepas nya, telu dua igi ke diperam Puna pen nyau netas. Maya anak iya nyau ulih terebai, sida menyanak pen lalu bekebu ga terebai kebukai ngiga pengidup. Buah kara ke ulu enggau ke ili nyau udah bisi mansau, bisi alai beridup.

                  Ensera tu disimpul penulis enggau dua bengkah ajar ti bisi teselit dia:

                    Kesatu, ensera tu ngayanka ngagai kitai iya nya kitai mensia mesti idup beraban bansa, enda ulih tak idup tubuh sebatang aja baka kayu kara, laban pengidup kitai endang besandar ba pangan diri itah enda baka pendiau buluh enggau tebing. Enti nadai tebing, tentu nadai alai buluh tumbuh. Tebing pan baka nya ga, enti nadai buluh tumbuh ba iya (tebing), iya ka tusur kena tumpu ai enggau pangka umbak.

         Kedua, ensera tu ngajar kitai patut selalu idup betulung-tulung entara siku enggau siku enda milih maya senang tauka tusah.

         Lalu bala pemacha tentu tepikirka mayuh agi ajar ti bisi teselit dalam ensera tu, ke tau pulaika bekal mensia dalam pengidup ti senang enggau pendiau ti lantang.

Oleh PINSIL SARATOK