Cherpan:Agi Bekulit Agi Bedaki

TUSUN KESATU

ATUN duduk chechanguk kediri-diri ba mua pintu ujung bilik. Utai bekelingi dia benung nadai bemunyi. Orang ke setak ke setak  sekumbang ke udah kena Atur Mindah Betagang Diteritka (PKPD) tu endang nadai bemunyi.  Orang bela ngintu diri, diau di bilik diri nadai ngulu pangan diri.

“Nadai utai diketusahka. Enda gawa din, ditu mih ngidupka diri,” ku iya ngesuhka seput iya sambil nikauka repik kayu ti dipegai iya enda berasai. Iya tak bisi pansa ketawa ngeraba. Pengingat iya terebai ngagai endur iya ke bekuli. Tak didinga iya jaku tauke iya nelai pending iya lebuh orang ke dikumbai iya boss nya nyuaka duit gaji iya ke penudi.

“Tu Atung, duit gaji nuan. Aku nadai agi mai bala bekereja sekumbang menua ti bejalaika PKPD. Nuan pulai lumah lulu. Enti bisi manah ila, aku kangau nuan baru,” ku Ahling.

“Satu hal agi Atung, aku minta ampun. Aku enda ulih mayar sewa lumah tu agi. Atun chali tempat lain,” ku tambah tauke nya.

TEMATI KUTU

Jaku tauke nya asai ke ngentung dada Atun. Tusah amat ati iya. Lama iya temati kutu berundingka diri ke diketuka gawa.

Pulai ke menua, lembau amat asai ati. Mayuh utai dirunding. Balat bingung ati iya. Dini endur diau? Bisi enselit runding jai iya. Jalai nya nyamai sereta muntang. Diperatika iya tali nilun mesai tunjuk anak bagas dikena iya betanchangka utai. Jeling iya lungga tajam iya di bilik dapur iya ba rumah ti enda tau alai diau agi nya. Ingat iya ke siti butul agi berisi lalu iya nyembur rumput ba belakang rumah. Eh, anang palui, ku munyi telai mansa pending iya. 

Jam nya iya tegepang ari pengingat iya. Leka jaku “Anang palui” enda ngetu didinga Atun. Enda lama udah nya datai pengingat siti da agi.

“Lapa nuan enda nemu adat enda tau mindah diatu” ku seregah Tuan Polis ke tak  ngegap iya.

“Orang nadai tau mindah meraka garis sitak menua, nemu nuan?” ku tampung Tuan polis.

Dada Atun ketap-ketap. Ati iya deka nimbal tang iya enda nyadi. Tuju iya deka minta kasih, ukai deka ngelaya polis.

 “Nemu aku tuan tang minta ampun tuan. Uji tuan mending dulu cherita aku,” ku Atun. Pegu iya berasai lembut. Asai ti deka melilai. Iya ngasaika ai bisi ngisi mata iya. Iya kesap-kesap.

“Nama cherita nuan. Tusi,” ku tuan polis setengah nerengak.

“Minta ampun aku. Aku tu udah lenyau pengawa. Aku nadai agi alai diau. Nyau segau-segau mih aku tu. Enti aku enda pulai ke menua nyadi orang nadai berumah bejalai aku. Enti enda ulih aku..” Ayat nya enda enda apus. Iya nyau lemas laban  ai mata iya nelusur kuyu iya. Tak nyabak tuai. Ukai utai dikelulu iya. Jam nya iya ingatka berita madahka siku bangkai orang bisi ditemu melepung ari baru Jematan Gantung Satok.

Tuan polis nya merening Atun ari punjung pala datai ke tapa kaki.  Atun ngasaika tubuh iya tang begantung ba angin. Asai ke enda bediri ba geladak agi iya.

BETAMPUNG…

Oleh JANTAN UMBAT