Bujang Berani Iban Dua ASAL SARAWAK RANGERS

IBAN TRACKERS … Genap platun sedadu British di Malaya seruran bisi Bujang Berani Iban.

Tusun Ke-43  

SEBEDAU ngenang lebih lenak agi pasal Bujang Berani Iban di Malaya, jeman British aram kitai ngelansa dulu pasal penumbuh Sarawak Rangers enggau Iban Trackers ti tumbuh bepun ari Bujang Berani Iban dalam Sarawak Rangers, Sarawak Kingdom tu nya raban sedadu Sarawak ti ditumbuhka Raja Charles Brooke @ Charles Anthony Johnson Brooke taun 1862.

Asal sida nya endang Bujang Berani Iban penyaga Kubu Raja Brooke ti ngembuan tanggung pengawa nyaga pasar Kuching taun 1846. Tuai Sarawak Rangers ti keterubah iya nya William Henry Rodway. Raban sedadu tu endang dilatih lebih-lebih agi ba pengawa sedadu ti ngembuan pengelandik beperang dalam babas kampong jerung. Kelimpah ari pengawa sedadu sida tu mega ngembuan tanggung pengawa baka polis lalu disikap ngena senyata senapang, meriam sereta duku nyabur / ilang enggau pedang. Kelimpah ari nyaga antara menua, Sarawak Rangers tu mega diasuh ngayau munsuh ti angkat ngelaban Perintah Sarawak.

Dalam kandang taun 1930 Sarawak Rangers diketuka dulu tang diambi gawa baru maya Perang Dunya II  kena nyaga menua Sarawak ti  dialahka Jipun taun 1942. Taja pia, Sarawak Rangers diketuka baru maya Sarawak dipegai sedadu Jipun. Udah  Raja Charles Vyner Brooke  badu nyadi nyadi Raja Sarawak 1946, Sarawak Rangers  dibali nyadi sedadu Koloni British lalu majak tebilang maya beperang  ngelaban sedadu komunis di  Malaya (Darurat Malaya) enggau  sedadu Indonesia (Konfrontasi Borneo).

BUJANG BERANI IBAN DI MALAYA

Enam minggu udah ‘Darurat Malaya’ kena 16 Jun 1948,  seraban 49 iku  Iban Trackers  dianjung ke Malaya nitihka pinta Perintah Malaya. Sida tu diasuh nyaup  sedadu menua British Commonwealth ngelaban raban sedadu komunis dalam kampung maya nya. Maya nya mih Sir Malcom John MacDonald (Commissioner-General British For South East Asia) numbuhka sedadu Iban Trackers ti betuaika  Penghulu Jinggut Anak Penghulu Atan. Maya nya Jinggut baru beumur 17 taun.  Maya nya Malcolm MacDonald ngasuh Penghulu Jinggut  ngiga 300 iku tang iya semina bulih 49 iku aja, majoriti sida nya beumur tiga puluh taun ke atas. Taja pia, maya udah tembu belatih pasal pengawa perang sedadu, Jinggut mujur mai urung 200 iku Iban ti agi biak-biak umur. Sida nya nyengkaum Awang Anak Rawing ti tebilang bulih midul George Cross ari Skrang enggau Mujah Anak Kulih ari Katibas ti bulih midul Queen Perintah British. Kelimpah ari nya mayuh mih sida bukai ti deka dikenang kitai dalam sejarah Bujang Berani Iban ditu ila.

MAYA SARAWAK RANGERS DITUMBUHKA

Kayau Iban Trackers jeman nya mujur amai munuh  sereta muntanka serang sedadu Parti Komunis Malaya. Berindik ari nya IbanTrackers pan dibali nyadi sedadu  Sarawak Rangers lalu nyadi raban sedadu Perintah Koloni British Malaya ti  diuluka   Lt. Col. C.J Baird ti mega nyadi Commanding Officer keterubah kena 1 Januari 1953. Taja udah bali nyadi dua pelatun sedadu Sarawak Rangers pengawa sida nya endang agi sebaka lebuh sida ti nyadi Iban Trackers suba; semina nama aja ti bebida. Jeman nya lebih 1,168 iku Iban Trackers @ Sarawak Rangers berambunka nya  beperang ngelaban  Komunis Malaya: 10 iku ari sida nya mati berani lalu 15 iku bakal.

Kena  31 March 1960, Sarawak Rangers (Unit Malaya) diketuka dulu tang  kena 1 April 1960 diubah nyadi  Sarawak Rangers baru lalu nyadi sebagi ari Sedadu British ti ulih ngayau munsuh di serata dunya. Taja pia sedadu Sarawak Rangers tu diketuka baru maya Sarawak enggau nengeri bukai numbuhka Malaysia kena 16 September 1963 lalu nyadi 1st Battalion, Malaysian Rangers. Semina 100 iku aja Sarawak Rangers nampung pengawa sedadu sida tang sida ti bukai pulai ke menua diri empu di  Sarawak.

Ujung bulan Ogos 1948  seraban 55 iku Iban datai baru lalu  dalam bulan Oktober 1948  nambah ngagai 170 iku udah tembu belatih di Kem Segenting, Port Dickson. Udah ambis kontrak tiga bulan semua raban sida tu dianjung pulai ke Kuching. 

Tengan bulan Disember 1948, semua sida tu diasuh pulai baru ke Sarawak, semina  29 iku sida tu diasuh nyambung kontrak atas peminta  sedadu British Guards Brigade. Taja pia, bulan April 1949  seraban 40 iku Iban Trackers tu dipinta Perintah British Malaya nyambung kontrak enam bulan agi.    

Kena 12 March 1951 nya mih nasit ti enda manah keterubah ba Iban Trackers tegal  pemarai Jaweng Anak Jugah  ari Ulu Gaat, Kapit. Maya nya Jaweng nginau munsuh begulai enggau A Troop 42 Commando Royal Marines kena timbak sedadu Perintah British Malaya tegal ti saru sangka sida sedadu Komunis Malaya. 

Taun nya mega, Tracker Awang Anak Rawing ari Skrang  bulih midul berani George Cross  tegal ti nyelamatka  Private Huge sari No.10 Platon, D Company, 1st  Battalion The Worcestershire Regiment. Maya nya semina seiku Awang aja ti Iban Tracker dalam seraban 25 iku sedadu dalam 10 Pelatun nya. 

Kena 13 November 1952, Tracker Menggong Anak Panggit dipadu nyadi Pemangku Lans Kopral ti lalu nyadi Komander No 2  Pelatun Iban nyadi tuai kayau nyerang kem munsuh sepengudah Komander Pelatun Lieutenant R. R.G Bald ari 1st  Battalion The Cameronians (Scottish Rifles) mati lebuh kayau nya. Kena Perintah Malaya ngingatka pemerani iya Menggong diberi Midul George.

Bulan Disember 1952 Iban Trackers betambah ngagai 301 iku ti gawa enggau sedadu British di Malaya. Maya taun nya mega Iban Trackers betambah baru ngagai  1,168 iku ke makin chakah agi beperang ngelaban munsuh di Malaya. Bala sida tu dipasuk ke dalam mayuh bengkah unit sedadu di Malaya. Ari pemayuh  Iban Trackers nya semina lapan iku parai berani, lima iku bakal sereta 10 lenyau enda temu tunga.

Enti nitihka kayau berani sida, mayuh Iban Trackers ti bukai patut diberi midul berani. Kebuah sekeda sida tu enda diberi laban nitihka undang-undang sedadu,  Iban Trackers maya nya agi dikumbai rayat selama (Civilian), apin digelar sedadu (Army).

SEJARAH SARAWAK RANGERS/IBAN TRACKERS

Ngena simpul jaku pandak, sejarah Sarawak Rangers engga Iban Trackers endang baka tu:

1862 Sarawak Rangers
1932 Sarawak Rangers dipasuk ngagai  Raban Polis (Sarawak Constabulary)
1941 Sarawak Rangers nyadi raban sedadu  kediri.
1942 Sarawak Rangers dialahka sedadu Jipun lalu diketuka dulu.

1948 Iban trackers ti keterubah betuaika Penghulu Jinggut ditumbuhka Sir Malcolm John MacDonald  lalu dianjung ngayau ngelaban Komunis Malaya.
1953 Sarawak Rangers dibali ari Iban trackers.
1960 Sarawak Rangers nyadi Special Tracker Team
1963 Sarawak Rangers bebali nyadi  Rangers Malaysia lalu pindah ari  Koloni British  Sarawak  nyadi  Angkatan Tentera Malaysia (ATM) .
1965  Ranger Malaysia

                     (Betampung ba Tusun Ke-44  minggu nyin ila)

Nya mih lansa sejarah Bujang Berani Iban ti begelar Bujang Malaya endang bepun ari Sarawak Rangers / Iban Trackers,  “World’s  Best  Fighters,” ku Sir Gerald Templer, 1952. Sekeda artikel ti ditulis bansa bukai bisi limpang mimit lalu kekadang enda datai ba menalan.    

Taja pia, artikel tu ukai ga tau nyadi kereban akademik ba sekula, semina tau nyadi kenang jerita tuai Iban. Enti nganti bansa bukai sigi enda, enti ukai kitai empu sapa; enti enda diatu kemaya?  Enti ‘diizin’ Petara cherita tu deka ditulis baru ba bup Bujang Berani Iban, Edisyen Kedua. Sebedau nya, manah amat enti bala pemacha ulih meri komen ‘kritikan’ ambika ulih diadu baru. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatsapp tu: 013 8325146.

Oleh HARRY USUP UMBAR