Bujang Berani Iban II • Bujang Malaya 21 iku dibai pulai

MINTA BEREKAT… Penatai semengat 21 iku Bujang Malaya disambut ngena piring nitihka agama Adat Iban.

PERANG diri semenua antara sedadu Parti Komunis  Malaya enggau  Perintah Malaya  nya disebut  “Malayan Emergency” @  Darurat Malaya nyau manggai dua belas taun (1948 – 1960). Kenyau ari penatai  Iban Tracker / Sarawak Rangers di Malaya taun 1949, sedadu Chin Peng makin lama makin alah  sereta  mayuh udah kena dengah Bujang Berani Iban begulai enggau sedadu British. Nya ti ngujungka Chin Peng nyurutka diri ngagai menua Selatan Thailand. Dalam taun 1960 Iya udah deka nyerahka diri tang Kepala Perintah Komunis China ti benama Deng Xiaoping ngasuh iya majak ngerembaika idealogi komunis di menua Asia Tenggara. Jeman 12 taun nya beribu-ribu sedadu komunis Chin Peng mati tang sida majak deka ngelaban nyentuk ke taun 1989.

        Bekenangka pasal sejarah Darurat  Malaya 1949-1960, pemansik Sejarah Malaysia tentu nemu magang pasal  Chin Peng, Rashid Maidin, Abdullah CD ti nyadi Kepala Parti Komunis Malaya  tang engka enda  mayuh  sida nemu  pasal “jasa & pengorbanan”  Iban Trackers /  Sarawak Ranger disanggup ninggalka menua diri, apai indai  sereta bini anak  sida di Sarawak  tegal ti mantu sedadu British Malaya  beperang  belaban enggau  Komunis  di Malaya enggau Singapura maya nya. Jeman nya sedadu British ti bepengkalan di Sarawak  matau serata menua Sarawak lalu ngiga sapa anak Iban  ti berani enggau sida ngayau ngelaban sedadu Komunis Malaya maya nya. Nama kebuah anak Iban aja dipilih?  Sida milih anak Iban laban udah ninga  rita pemerani  Bujang Berani Iban ti beperang ngelaban munsuh sida di Sarawak, Berunei enggau di Sabah maya Perintah Raja Brooke Sarawak enggau Perintah North Borneo Chartered  Company – Sabah. Engka sida udah kala mansik sapa Bujang Berani Iban ti bendar? Tentu kitai kala ninga komen bansa British ti nyebut ‘Iban fears  no  tribes’: the most feared headhunting tribes.”     

               Jeman perang nya 1949  – 1960, lebih 1,168  Iban Trackers ari Sarawak nurun beperang ngetanka menua Malaya ari kayau Parti Komunis Malaya (PKM). Semina 21 iku sida nya mati berani di menalan lalu 25 iku aja bakal. Sekeda midul ti diberi ngagai Iban Tracker / Sarawak Rangers iya ti bakal sereta agi idup maya nya: George Cross,  George Medal,  Military Medal,  British Empire, Queen Elizabeth II  Medal.

BUJANG BERANI DIBAI PULAI

Kena Semua rangkah Bujang Berani Iban tu mujur dibai pulai ari Malaya lalu ditumbakka baru ba Perkuburan Pahlawan, di Jalan Budaya, Kuching kena 26 Julai 2011. Sida tu iya nya: 1.  FF/829  Jaweng Anak Jugah, 2. Lans Kopral Ungkok Anak Jugam  3. 900506 Unggat Anak Ujom,  4. 900172 Ugap Anak Utut,  5. 900601 Letan Anak Kusing,  6. 900665 Nyambik Anak Pasang, 7. 900815 Kumpang Anak Tinggi,   8. FF/253 Bulan Anak Kasau, 9. FF/1254 Kelambu Anak Gadung, 10. FF/575 Untang Anak Engan, 11. Rejap Anak Bagi, 12. FF/825 Entap Anak Tulu, 13. FF/1083 Nyantau Anak Juna, 14. Manit Anak Cheling, 15. Nyaru Anak Talap, 16. Mat Anak Akit, 17. Empati Anak Dugu, 18. Adrain Anak Tandang, 19. Utot Anak Tanggang, 20. 900557 Dampi Anak Berain,  21. 900441 Janggak Anak Ingkoi.

               Kami Dayak, Iban Borneo meri puji ke pemerani kita tu Bujang Berani Iban Tracker ti pegari jelai nama tampak rita di serata dunya. Taja kita udah lama lela danjan di menalan, lelang di menua orang ngetanka tanah Malaya  tang nama kita meruan di ati kami. Sinu naya ai mata mih kami ti agi di menua ngenang kita di sanggup berambunka nyawa talukka bansa, menua sereta Raja. Nadai utai di dunya ulih nganti seput kita ti begelar Bujang Malaya. Taja pia, kati ku enggau, kita ga endang udah dipilih Petara pulai ngagai Iya.       

 Lebih 60 taun pendam sida Bujang Berani Iban tu betatam di menua Malaya enggau Singapura. Terima kasih besai ngagai Lt. Col. Robert Rizal Abdullah ti udah meri buah penemu ngagai Ops Mai Pulai nya. “My heart bled when I saw the picture. I vowed to take the matter up to the highest authority. It became my mission,” ku Robert  Rizal.

             Kenu ku kepala sedadu British Malaya bala Iban Trackers /Sarawak Rangers bisi chara enggau pemerani ti amai nyelai sereta lain ari orang bukai maya beperang. Sedadu Iban tu mega suah nyadi chunto sereta nyadi buah mulut sedadu menua bukai dalam Menua British Commonwealth nyentuk ke sida dipasukka ngagai seraban ari  Sedadu British ba sida sedadu Gurkha ti disebut ‘ Ist Elite Far East Land Force’  ti tau beperang di serata dunya. Naka ke diatu taun 2016, mimit aja sida Iban Trackers ti agi idup udah lebih 67 taun pulai ari Malaya.   

 IBAN TRACKER UNAU ANAK SAUH 

Kena 1 Januari 1953 Iban Trackers dibali nyadi  Sarawak Ranjer (Unit Malaya) ti betuaika  Lt. Col. C. J Baird lalu nyadi komander ti keterubah Sarawak Ranjers.  Taja pan berubah nama tang pengawa ti dipegai sida endang sebaka enggau pengawa  Iban Trackers suba. Disiplin sedadu Iban maya nya maya nya dipuji  tuai sedadu British amat-amat. Unau Anak Sauh tu seiku ari Iban Trackers / Sarawak Rangers  dalam 1st Manchester Regiment &  1st Experimental Platoon taun 1953. Udah ti lebih 8 taun ngayau sedadu Komunis Malaya begulai enggau sedadu British,  Tracker Unau enda nyambung kontrak taun 1959 lalu pulai ke menua asal iya di Sg. Latong, Machan, Kanowit, Sarawak.

        Taun 1972 menua Sarawak benung charut belaban enggau sedadu Komunis Pasukan Rakyat Kalimantan Utara (PARAKU)@ NKCP (North Kalimantan Communist Party). Unau enda tan ati ninga rita penyai sida Komunis di Sarawak lalu masuk nyadi Polis ‘Border Scout’. Enggau peneleba di Malaya, pengawa Unau sebaka enggau pengawa ti nyidi lalu ngayau sedadu Parti Komunis di Sarawak. 

        Kena 31 Disember 1988 maya umur iya 55 taun, Unau badu pinchin nyadi Polis udah ti lebih 25 taun betachah ngelaban munsuh rayat menua Malaya enggau Sarawak. Taun 1998, Unau  diau enggau bala anak iya di Johor Baharu. Taun 1999, sida sebilik masuk agama Islam lalu Unau nyadi Abdul Rahman Unau Bin Abdullah.

                                                            (Betampung ba Tusun Ke-46  minggu nyin ila)

Nya mih lansa sejarah Bujang Berani Iban ti begelar Bujang Malaya endang bepun ari Sarawak Rangers / Iban Trackers,  “World’s  Best  Fighters,” ku Sir Gerald Templer, 1952.

Sekeda artikel ti ditulis bansa bukai bisi limpang mimit lalu kekadang enda datai ba menalan.    Taja pia, artikel tu ukai ga tau nyadi kereban akademik ba sekula, semina tau nyadi kenang jerita tuai Iban. Enti nganti bansa bukai sigi enda, enti ukai kitai empu sapa; enti enda diatu kemaya?  Enti diijin Petara cherita tu deka ditulis baru ba Bup Bujang Berani Iban, Edisyen Kedua. Sebedau nya, manah amat enti bala bala pemacah ulih meri komen pejah ambika ulih diadu baru. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatsapp tu: 013- 8325146.

Oleh HARRY USUP UMBAR