Enda ulih kerarika raban neritka kuasa

DIPERINTAH asuh nikal pulai.

ENTI kitai merati ari ripot surat berita, endang nadai ngetu bala orang ari menua sepiak Kalimantan nyin ditangkap datai tama belalai ngagai menua kitai di Sarawak ditu.

Bala sida nya ditangkap polis sereta mega sedadu enggau raban neritka kuasa opis imegresen ti bejalaika pengawa sida ngipa penatai orang luar nya nengah jalai tikus tauka jalai besai.

Ambika banding, minggu nyin kemari bisi lapan iku bala orang datai belalai tu ditangkap sereta diperintah asuh nikal pulai ngagai menua asal sida di sepiak nyin.

Ari bala sida lapan iku tu, dua iku ditangkap bala sedadu ari 1st Infantry Division di Balai Ringin urung pukul 3.00 ngalih hari. Raban sedadu nangkap seduai lebuh ditemu belalai tama nengah jalai tikus. Nitih pansik sedadu nya, seduai nya berasal ari Kampung Jangkang, Indonesia.

Sehari pengudah nya bisi lima iku bala kampar nya ditangkap tama belalai ngagai menua tu di Tebedu urung pukul 11.00 malam, ku ripot sida sedadu nya.

“Udah bekau diperesa, raban ari Entikong nya madah deka mansang ke Kuching laban bisi danji orang deka ngambi sida gawa,” ku seiku sedadu nya madah.

TERUS TAMA BELALAI, NGAMPAR

Nangkanka nya, bisi seiku ditangkap pukul 12.00 tengah hari di Serikin (sehari pengudah nya). Iya tu munyi ke ditangkap lebuh benung mansang nuju endur alai bisi sengkang jalai alun. Sebedau iya datai ba endur nya, iya lalu ditangkap seraban sedadu ti ngipa enda jauh ari nya. Lebuh diperesa iya ditemu nadai dokumen pengelala tang madah diri nuju Kuching laban deka ngiga alai gawa.

Nyadi semua sida lapan iku (seiku indu enggau tujuh lelaki) nya ditetap ngampar, iya nya datai belalai sereta nadai dokumen pengelala. Semua sida nya diperintah asuh nikal pulai ngagai menua sida empu sepengudah diripot ngagai polis.

Nitihka padah bala sedadu nya, sida ti ditangkap nya bisi udah lepi laban nadai belanja kena meli utai dempa tegal Covid-19 ti majak ngerekai diatu. Nya alai sida lalu tama ngagai menua Sarawak ngichaka bulih pengawa.

Kelimpah ari sida ke tama belalai endang bisi orang bejalaika pengawa ngatur penama sida ngagai menua tu, iya nya orang ti ngena awak nya ngulihka belanja ari kemesin mai sida tu ngagai menua, iya “nyual mensia” tauka human trafficking dalam jaku English. Mayuh agi dibai tama kitu, besai agi ga kemesin ulih sida tekong nya. Ngagai diatu endang mayuh bala orang ti dibai sida kitu kena ngulihka belanja ari kemesin nya udah kena tangkap, nyengkaum tekong empu (tukay ti ‘nyual’ sida) pan sama kena tangkap mega. Tu beduduk ari pengeran ati enggau kereja kenanas ari bala sedadu, polis enggau opis imigresen mega.

Apin lama lebuh ngatur operasyen nyidi kampar ti mungkur sekeda alai ngaga rumah di Kuching, bala pemesai opis imigresen bisi nangkap 34 iku lelaki enggau tuju iku indu ke semua nya rayat Indonesia. Sida tu ditemu nadai ngembuan surat pemendar gawa di menua tu, diau ngeluie timpuh ditu sereta ditemu tama kitu belalai, iya nya nadai surat pemendar tama ke Malaysia.

ANANG TEKELALU NYALAH KAMPAR

Enti diperati enggau manah, menua kitai tu penuh laban kampar, ukai tentu penyalah sida kampar nya. Tang endang sama salah nya endang kitai menua tu empu, kelebih agi bala tukay ke ngaji sida, ke meri pengawa ngagai sida.

“Nya alai beduduk ari ke sama betitih tauka bebaika pangan diri sama datai kitu – diatu nyamai bepadah jampat laban sama bisi talipaun binching – nya alai sida jampat betambah tubuh laban ti sama keran deka ngulihka pengawa ba menua kitai ditu, beduduk ari duit kitai ti jauh besai rega ari enggi sida ari menua sepiak tauka garis menua melunggang ari menua Kalimantan Barat din,” ku seiku kaban indu penulis ke gawa ba pos Imigresen di Tebedu, di pintu penama ngagai menua kitai kitu ari Entikong sepiak menua Kalimantan Barat (Kalibar), Indonesia.

Mayuh bala sida nya tama kitu endang amat bisi paspot tang sida nya diau ditu ngeluie tauka lebih ari timpuh ke patut. Sida nadai pansut ari menua tu taja pan udah abis timpuh tauka sain ba permit pas penemuai sida. Tu siti penyalah Imigresen.

“Tang kitai enda tau nyalahka bala sida kampar tu seratus peratus laban enti nadai orang meri sida pengawa ditu, nadai jalai sida ulih gawa, nadai jalai sida ulih beridup sereta lalu pereman enda pulai ari menua kitai ditu.

“Nambahka nya mayuh mega bala sida endang datai ketegal dipinta towkay datai ke menua tu, kelebih agi bala sida ke tama belalai kitu nengah menua Serikin, laban endang napatka pengawa ke udah diungkupka sida ba sebelah menua tu, kelebih agi di Kuching, Siburan enggau sekeda endur bukai,” ku indu nya madah lebuh ditanya penulis apin lama.

MERI PENGERUGI NGAGAI MENUA

Tang amat meh sida kampar nya ditangkap lalu ditinggang enggau ukum jil, pengawa ke bakanya balat ngerugi perintah Malaysia, laban lebuh dalam jil sida diberi perintah Makai. Munyi angka baka ke bisi dipadahka sida ari rumah jil, siku orang ke dijil nya endang diberi pemakai numbas iya emanah. Dalam sehari tiga kali makai, enti sekali makai ungkus RM5 reti nya siku orang jil nya dipelanja perintah Malaysia ungkup pemakai aja urung penyampau RM15. Lalu enti sepuluh iku orang jil ungkus pemakai sida urung RM150 sehari. Enti siku kampar nya bejalaika ukum jil setaun ungkus is kurang lebih 15 kali enggau 365 hari (RM5475. 00). Enti bisi seratus iku bala kampar dijil setaun, dia kitai meda ungkus iya sigi besai (5475 x 100 = 547,500. 00), nyau ngeluie setengah juta ringgit.

Nyadi tu siti pengerugi besai ngagai perintah Malaysia. Nya alai bepun ari tu suba, perintah kitai bisi meri awak sida nya dianjung pulai ngena kapal tauka pengangkut bukai. Tu nyengkaum sida ke udah abis timpuh maya dijil. Kekadang nyau bepuluh-puluh iku bala sida tu ditangkap ke ngujungka rumah jil nyau penuh laban bala sida. Tu balat ngerugika perintah munyi ti udah disebut tadi.

Nya alai enti bala sida tukay nya nadai meri awak alai sida gawa, bala kampar tu endang nadai endur gawa lalu tetap nadai datai kitu laban nadai alai beridup. Tang enti sida tukay majak meri awak alai sida gawa, penatai kampar sigi deka terus nyadi penanggul menua kitai.

Oleh TELESA EMPERAN