Cherpan Lalau Pendiau Bisa Baka Sumpah Burung Engkerasak

TUSUN KE-2

MINGGU tu kitai macha Cherpan Lalau Pendiau: Bisa baka Sumpah

Burung Engkerasak ba Tusun Ke-2, nampung ensera ba Tusun Ke-1 ti

udah dichelak dalam minggu siti tu kemari.

Lebuh malam hari, engketut kenu Tekura sebelah-belah selepak bandir, selepak batu, di baruh batang, di baruh ungkap. Tawas hari, mupuk baru ga tudah tuai bejalai, nengah kampung jerung nadai didinga pangkung nyawai bebendai, ngeresau pulau nadai didinga tempalau kangau kumbai.

DITINGGANG DAN KAYU TEBELIAN

Kelama-lama ke udah bejalai, ba rumah anak mensia pan apin mega datai, dia alai Tekura Jaung dilabuhka penusah besai ke enda ngabai-ngabai. Maya iya bejalai ringkap-ringkap, bedayuh rayap-rayap mansa pun sekayu Tebelian Kawi, tak labuh dih siti dan mati tebelian nya laban ribut lalu ninggang iya ba tengan belakang. Nya ke ngasuh iya ulau banta, enda tak luput bendar, laban seninjik dan nya enda tak ngembat belakang iya beamat-amat. Lebuh nyau ngeleda bendar, dia Tekura nemu diri-empu betul-betul tepekul. Ka iya surut, tekul laban panga dan tebelian. Ke mua enggai ke rusuk kedua-dua piak, bela dikelingi urat enggau bandir tebelian. Iya nguji enggau naka ulih deka ngelepaska diri, tang enda ulih. Nyau kelama-lama ti kual-kual dia, iya pen nyau lepi laban ke lalu nadai makai nadai ngirup. Hari siti lepi agi, hari siti lepi agi. Nyau keleju-leju, tudah tuai pen nyauka ampir ga ba pengujung nyawa. Tang sebedau seput padam, Tekura sempat bejaku enggau Kayu Tebelian.

TEBELIAN DISUMPAH TEKURA

“Tu Tebelian, ambi ubat gayu tu ari aku! Ku beri ke nuan. Ubat tu diasuh Sentuku anjung aku ngagai anak mensia, tang mih aku tu nadai daya agi nganjung iya ngagai anak mensia. Nya mih, ga nuan nyau ngembuan ubat gayu tu, kenyau ari seharitu, datai ke uchu ambu, ichit wit kita ke jemah ila enggau semua purih kita ke Kayu Tebelian deka gayu, kering sereta teguh ari semua kayu bukai di dunya tu. Nyadi kami Tekura, enda milih bansa, asal  ga Tekura, deka mega bela gayu nguan menua baka kita Kayu Tebelian. Tang, ketegal ati nuan enda berapa manah, nya kebuah nuan mekul aku datai ke pengujung seput bakatu. Kena aku malas, aku nyumpah kitai Tebelian awakka nuan enggau pejuru nuan nampung-menampung ka ditebang enggau diban anak mensia ke santubung,” ku Tekura madah ngagai Kayu Tebelian.

Semuti ke teapuska jaku, alai pala tudah Tekura Jaung melilai, mati. Tudah tuai pen lalu mati meragan tepekul ba pun Kayu Tebelian nya. Sumpah Tekura bisi pemisa, lapa dih nyentuk ke seharitu sigi kayu tebelian nyadika pilih anak mensia diambi ke santubung ngulihka enda mudah repuk sereta tan lama dalam tanah.

TEBELIAN MERUAN PEMADU KERING

Ubat gayu Sentuku enggau jaku Tekura Jaung amat bisi pengasi enggau pemisa, keba datai ke sehari tu, kayu tebelian terus meruan pemadu kering sereta tan enda repuk enti dipebandingka enggau semua kayu bukai di dunya. Pia mega tekura, sigi lalu nyadi sebansa ari utai idup ti ditemu gayu bendar. Sekeda tekura idup sampai ngagai 150 taun.

Ahh, lengkaka kita cherita  tudah Tekura Jaung ngambi ke setanjung malu tuba, endur kitai nusui cherita Burung Sentuku seduai Burung Engkerasak ke di menua, ke seruran ningas enggau nganti pemulai Tekura. Anti seduai Tekura pulai ke sebulan nandan di langit. Nyau setaun nampun di bukit bedau ga Tekura Jaung nadai pulai. Kelengah-lengah, bejaku kenu Burung Sentuku.

“Nama mih kebuah Sambi tua Tekura tu lalu enda pulai-pulai?” ku Burung Sentuku

“Kira aku, tentu iya tu bisi penusah besai. Enti nadai penusah, enda patut iya lalu enda tepulaika diri dalam setaun tu udah. Giga iya tu ulih tua” ku saut Burung Engkerasak.

Burung Sentuku pen nyau selubang mega enggau penemu Burung Engkerasak, sama nyanggup ngiga Tekura Jaung, awakka enti iya agi idup ngambika nyamai nemu. Pia mega, enti iya udah mati, nyamai ga seduai nemu iya udah mati; nya alai, ngambika seduai enda tak nganti-senganti iya ke pulai baka ke nganti sungai nadai ulu. Ari nya, seduai lalu nurun ngiga iya.

Nyau kelama-lama ti udah ngiga, baru Sentuku seduai Engkerasak tetemuka rangkah Tekura Jaung, ba baruh sekayu kayu Tebelian. Iya dipelabaka seduai mati laban kena tinggang dan Tebelian, laban dan nya mengkang ninggang rangkah iya ba urung tengan belakang.

“Apu! Patut alai Sambi Tekura Jaung tu nadai dianti tua pulai, baka tu dih penyadi iya, mati ditinggang dan Tebelian tu! Tak enda semena-mena mih tudah Sambi tu mati beketu. Tu baru tak amat mati enda besemilah, enda tepadahka nyawa diri!” ku Engkerasak, “

Lalu digilik-gilikka Engkerasak pala, nesalka pemati Tekura, ke endang unduh besai seduai iya Burung Sentuku.

“Ba iya, ku aku, Madi.  Tang mih, ngambi jaku ulih, manah ga pemati Sambi tua tu, laban pemati iya ke baka tu tau bendar diambi ke teladan kitai ngereja pengawa. Biar mati, enda mih iya nikal ngapa, alah nyau mantupka diri di bandir. Ke tu, amat endar iya, amat tepantup ba bandir Tebelian tu mih tudah iya tu. Kasih!” timbal Sentuku.

Meda pengawa Tekura ke dikarapka nganjung ubat gayu ngagai anak mensia nya nawang baka bangang padi rayu, puntan baka terunan tali pejuru, rumbau baka kembayau saruk isu, dia Burung Sentuku mai Burung Engkerasak nyulur ngereja pengawa nya, ke beniat deka nganjung ubat gayu ngagai anak mensia.

“Ubat gayu enggi aku tu amat nadai agi, tang tak ngarapka pemisa mulut tu aja mih dianjung ngagai anak mensia,” ku Sentuku.

Burung Engkerasak pen nadai ga bantah. Ari nya, seduai lalu terebai ngejangka pun Tebelian Kawi, udah seduai ke tembu nguburka rangkah Teruka Jaung, ngiga rumah anak mensia.

BETAMPUNG…

Oleh PINSIL SARATOK