Pengerindu Bepangan

TUSUN KE-3

MALAM nya Brendan tekenyit bisi ninga indai iya tak sikuk-sikuk nyabak. Apai Brendan udah ba tisi indai iya mega. Brendan lalu jampat berundingka nyangka nama kebuah indai iya nyabak. Brendan lalu nudukka diri nyendi indai iya.

“Lapa nuan tak nyabak dih indai?” ku iya nanya enggau serengung nyawa ke ngayanka iya bisi pengirau.

“Entah, lama iya udah nyabak. Aku nanya, iya lalu enggai nyaut. Tanya mih nyangka iya ka madah ngagai nuan,” ku lampat apai Brendan.

“Indai, padah mih. Nama, nuan irauka aku ka?” tanya Brendan.

“Irau aku nak. Chukup irau,” ku Ipah. Iya nguing lalu nunga Brendan sambil murus bau anak bujang nya.

“Nama utai dikirau nuan indai? Aku ukai nya kini-kini. Aku belajar,” ku Brendan.

“Iya mih nak. Aku gaga amat nemu nuan masuk U tang irau. Semenanjung nya ukai semak. Ukai kami dua apai nuan ulih ngabas nuan,” ku Ipah mansutka asai ti nemuku ba tangkai ati iya.

“Ooh, pia. Enti nya ngasuh nuan irau, ndai, badu agi nyabak. Taja aku belajar jauh, lebuh maya ngetu bisi peremisi, aku ulih pulai kitu ngabas seduai,” ku Brendan.

“Nya mih. Enti baka nya, lantang agi ga ati aku,” ku indai Brendan.

Sida menyanak pan lalu bela nindukka diri. Taja pia, mata Brendan enggai lelap taja pan iya berasai lelak. Enti di sekula din, maya enggai tinduk baka nya udah iya nyulit skrin telipon. Udah iya ngangau lalu bekunsika asai ati iya enggau May. Di rumah dia nadai line internet. Nya kebuah sida bala nembiak sekula mayuh ke bukit ngiga line.

SEMINA PEDA KENAYA

“Eh, nguji ngapa kin. Nadai besemaya. Icha iya asai aku mih; nyangka iya tak baka aku enggai tinduk,” ku Brendan bejaku kediri dalam ati.

Nyau iya pansut ke ruai lalu bejalai begadai-gadai niti ruai. Nasit bala ukui semina nekus-nekus tang enda nyalak.

“Oh nasit manah. Baka ke diajih,” ku ati Brendan lebuh iya datai ba ruai sida May ti alai May agi berandau enggau Mary.

“Apu lapa nya nuan dih Dan? Lapa enda tumu tinduk, ukai enda pagila nuan mupuk?” ku May; semina jaku iya didinga laban gamal enda tampak. Semina kenaya bisi dipeda ari panchar lampu pichit ti dibalut enggau kain tula mit.

“Eh, enda ulih tinduk, mayuh utai dirunding,” ku Brendan beterus terang.

“Gagit deka betemu enggau orang baru pia?” ku May bejaku suma didinga.

“Eh nadai jaku nya. Nadai gagit baka nya. Kati gagitka orang ke enda dikelala? timbal Brendan.

“Ni nemu, orang deka bejalai jauh, tentu jampat enda ingatka orang di rumah, enda pia iya Mary,” Ku May nguing ngagai pangan semak iya. Bisi biuh chemuru munyi jaku May. Tak nyindir.

“Pia mih iya,” ku Mary nyaut sporting.

“Eh, pulai ku May,” ku Mary.

“Anang guai dulu Mary,” ku May sambil narit jari pangan iya enda ngasuh iya pulai dulu. Mary deka pulai nyangka May seduai Brendan bisi utai deka dikerandauka kediri.

“Lalu mupuk la nuan pagila Dan?” ku May.

“Au,” ku Brendan.

“Kediri nuan, tauka ibu enggau aya enggau nuan?” ku Maya nanya.

“Seduai iya bedau temu. Lapa nuan ka nganjung aku ke Kuching?” ku Brendan nanya May.

“Enda ga. Aku nadai udah nanya apai enggau indai,” ku May.

BETAMPUNG…

Oleh JANTAN UMBAT