Bujang Berani Iban II

TRACKER LUTA… Engka enda ingat, tu mih sekeda Bujang Berani Iban ke ngetanka menua kitai suba.

Tusun Ke-46  

ASAL menua Bujang Berani Iban tu datai ari Nanga Delok, Batang Ai, Lubok Antu, Sri Aman. Iya masuk Iban Tracker taun 1958. Enti enda nitihka perintah Kepala Sedadu British, Chin Peng tentu udah nyadi dengah iya. Udah ti bejam-jam nyidi bekau munsuh, Jarum pan tepedaka Kepala Sedadu Komunis nya urung lima meter ari iya ti belalai dalam kampung babas di Perak. Jarum enggau dua iku pangan iya Iban Tracker ti bukai semina diasuh ngikup munsuh aja, enda tau nimbak dulu.

Dulu agi ari Jarum bisi empat iku bala aya iya nyadi Iban Tracker. Nya alai, iya pan asai ke enggai alah. Sebedau nyadi sedadu British Malaya iya endang teleba bejalai di kampung ngasu jelu. Nya alai, iya asai ke nadai penanggul ngasu mensia sebelah babas, semina bisi ga ati kesal laban mensia ti diasu bisi ngembuan senyata lalu tau munuh.

Maya nurun ngayau sedadu Komunis Malaya nya, Jarum sereta Iban Trackers ti bukai endang orang ti pemadu dulu betempuh enggau munsuh. Sida ti nyidi bekau munsuh endang jauh dulu bejalai ari sida bala sedadu British. Enti sema ditemu lalu kena tangkap munsuh, entah baka ni penyadi sida nih? Tang sepengelama sida ti bejalaika pengawa mantu sedadu British maya nya, sida belama dulu meda munsuh.

Jarum semina ngembuan pelajar sekula ba primari aja tang iya jampat ga belajar lalu ulih bejaku English, sekumbang ninting hari hari begulai enggau Orang Putih nya. Maya perang Malaysia-Indonesia ti disebut Konfrontasyen 1963, Jarum endang udah masuk nyadi Police Field Force (PGA).     

Nyentukka ngagai taun 2016 tu, Iban Tracker tu agi regas taja umur iya udah manggai 78 taun. Agi ulih ngesan injin sepit. Iya diau mendam di  Rumah Jampong, Melaban, Limbang. Iya mega nyadi tuai bansa Iban di Limbang ti begelar Temenggong di Opis Pelilih Limbang.      

IBAN TRACKER MENGGONG ANAK PANGGIT

Kena 13 November 1952, Tracker Menggong Anak Panggit dipadu nyadi Pemangku Lans Kopral lalu nyadi Komander No.2  Platun Iban Tracker. Iya mih ti nyadi komander maya komander sida Lt. R.R.G Bald ari 1st Battalion The Cameronians (Scottish Rifles) mati berani maya ti betempuh enggau sedadu komunis kena 3 November 1952. Tegal pemerani iya nya Menggong diberi George Medal.   

Niang Tracker Michael Menggong endang suah betempuh enggau munsuh kandang taun 1951 ngagai 1957. Pulai ari Malaya iya nyadi Kepala Border Scout, di Simanggang (Sri Aman) ari 1971 ngagai 1976. Jeman nya iya mega suah nguluka bala Border Scout betachah belaban enggau sedadu Komunis PARAKU di sebelah menua Pantu, Engkilili, Batu Lintang, Lubok Antu. Simanggang di Sarawak.          

Sekeda ari komen pasal dua bengkah pelatun Iban Trackers / Sarawak Rangers 1st  Manchester Regiment & 1st  Experimental Platoon taun 1953.

“Sarawak Rangers combat the world’s best. Military Iban came uninvited, now go all tenteraku lost his life – a lot of divorced body and head. They were so fast that the human eye cannot see,” President Sukarno.

KING’S OWN SCOTTISH BORDERERS

Jeman Darurat  Malaya  urung taun 1950, Iban Tracker Andil  Anak  Unting  ari Sarawak seduai Andy Nicoll  ari Scotland  gawa sereta bebakik bendar maya ti  begulai gawa  enggau  B Company, King’s Own Scottish Borderers (KOSB) di   Ladang Getah Niyor Estate, Kluang, Johor, Malaya.

KOSB (King’s Own  Scottish Borderers) tu seraban ari Sedadu British ari Infantry Regiment Scottish Division ti ditumbuhka David Melville  kena 18 March 1689. Regimen sedadu Raja British United Kingdom udah dianjung di serata dunya. Maya Darurat Malaya, regimen tu mega ampit beperang belaban enggau sedadu Parti Komunis Malaya.    

Siku agi Iban Tracker dalam kompeni Andil seduai Andy iya nya Dempi Anak Berain. Dempi mati berani maya ti ngayau sedadu Parti Komunis Malaya. Sekali maya ngayau kena 19 Disember 1955, Komander Regimen Scotland nya  bejalai begadai-gadai enda jauh ari Andil. Maya nya Dempi tepedaka dua iku sedadu komunis belalai dalam babas urung lima ela ngipa sida. Enda chamang-chamang Dempi pan belanda lalu deka mantap munsuh nya enggau duku ilang iya. Maya nya sedadu komunis pan nimbak iya kena perut. Depi mati tegal ti kelalu mayuh darah pansut ari perut iya. Tekala nya Andy pan bebalas timbak sereta mujur munuh dua iku sedadu komunis nya. Nadai ku enggau mih Dempi danjan berani lalu ditumbak ba  Pendam Kranji di Singapura tang mujur dibai pulai ke Sarawak begulai enggau 21 iku sida bukai kena 26 Juali 2011.

21 IBAN TRACKERS LESI BERANI

Ari 1,168 Iban Trackers ti nyadi sedadu gawa begulai enggau sedadu British di Malaya ari taun 1948 ngagai 1960 semina 21 iku aja ti mati berani lalu mujur ditumbakka baru di Sarawak. Lebih 100 iku sida Iban Trackers nyambung kontrak  sida  lalu dibali nama nyadi Sarawak Rangers (Malayan Unit)  kena 1 Januari 1953. Jeman nya Iban Trackers udah pegari bendar tegal pemerani sereta pengering sida maya ngayau sedadu Komunis Malaya. Nya alai, Sarawak Rangers nya dibali nama baru nyadi Sarawak Rangers (Far East Land Force) lalu sama tikas enggau sedadu Gurkha dianjung beperang ke serata dunya nyadi Sedadu Raja British.

Sekeda sida ti udah ambis kontrak nyadi Iban Tracker di Malaya pulai ke menua diri di Sarawak lalu nyadi Polis Diraja Malaysia (PRDM) dalam unit Border Scout tauka PGA / PFF. Jeman kadang taun 1960 nya mega sida agi betachah enggau munsuh maya ngetanka tanah Sarawak maya Konfontasi Malaysia-Indonesia sereta sedadu komunis PARAKU.    

Naka taun 2016, umur sida mayuh ti udah manggai lebih 70 taun lalu  mimit sida tu ti agi idup. Pia mega kurang 20 iku aja ti ulih giga lalu ditemu nama sereta menua. Sekeda ari nama ti semina ditemu nama tang apin ditemu rita enggau menua iya nya: Lans Kopral Sanggau Anak Jani, Karabat Anak Darie, Kopral Anyau, Tracker Gani, Tracker Manggi, Tracker Luta, Tracker Anyang Ujet, Geraji enggau Garu. Arapka kitai Iban ti empu aki tauka apai ti kala nyadi Iban Tracker / Sarawak Rangers bekerejasama enggau penulis meri informasyen pasal sida tu.

Arapka kitai ulih bulih lis semua Iban Tracker / Sarawak Rangers disimpan dalam bup rekod Bujang Berani Iban ke pengingat enggau teladan ambika bansa bukai badu ngemaruhka bansa Dayak, Iban Borneo. Enti ukai kitai Iban empu, nadai bansa orang bukai deka kiruh ngangkatka nama sida tu. 

(Betampung ba Tusun Ke-47  minggu nyin ila)

Nya mih lansa sejarah Bujang Berani Iban ti begelar Bujang Malaya endang bepun ari Sarawak Rangers / Iban Trackers,  “World’s  Best  Fighters,” ku Sir Gerald Templer, 1952. Sekeda artikel ti ditulis bansa bukai bisi limpang mimit lalu kekadang enda datai ba menalan.    

Taja pia, artikel tu ukai ga tau nyadi kereban akademik ba sekula, semina tau nyadi kenang jerita tuai Iban. Enti nganti bansa bukai sigi enda, enti ukai kitai empu sapa; enti enda diatu kemaya?  Enti diijin Petara cherita tu deka ditulis baru ba bup Bujang Berani Iban, Edisyen Kedua. Sebedau nya, manah amat enti bala pemacah ulih meri komen ambika ulih diadu baru. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatsapp tu: 013 – 8325146.

Oleh HARRY USUP UMBAR