Jereki ari malas penyai ngena penyiru

ENTI udah nyamai idup, bala uchu, ichit wit dudi pan deka senang mega. Nya meh ngujungka kitai deka mudah terus bulih reta, bulih pemajik baka sida indu ba gambar tu.

DIATU lebuh menua kitai tu balat tusah sereta tasah betapi enggau kerekai penyakit Covid-19 tu, endang amat sinu ninga berita sereta meda mensia mayuh bekurung di rumah diri empu, tegal ditagang mindah kin kitu.

Tu udah masuk taun kedua berengkah ari 18 March 2020 suba kitai udah ngasaika pemedis sereta pemerinsa tegal igi penyakit ti enda ulih peda, enda temu maya ngerampit kitai. Penusah tu meh ngingatka penulis pesan sida niang apai niang indai menya ti ngelalau madah kitai mensia enda tau neju pangan diri tusah. Enti ulih kitai anang enda nulung enggau naka alah. Kebuah pia, kitai enda nemu dudi hari ila engka tak bisi maya kitai tusah lalu begunaka tulung orang. Jaku ajar tu mengkang dikeingat belama.

BALAT SUNTUK

Uji kitai ninga cherita penyuntuk orang sebilik tu. Nyadi kelia bisi bala kitai Iban lima iku diri menyadi, lelaki magang. Sida lima iku tu agi biak, lalu nadai agi apai indai enggau begulai.

Sida empat iku ke biak agi nya apin nemu gawa ngidupka diri, lalu semina ngarapka menyadi sida ke tuai ngereja semua utai baka ngereja utai ke berat agi baka bambi kayu, enggau mayuh bengkah pengawa rumah ke berat.

Menyadi tuai sida tu pan nemu ngasu, nemu nyumpit sereta nemu bebubu, nyala sereta semua pengawa bukai begiga lauk dalam babas enggau ba ai. Tudah ti mit nya mina nemu minching labu kena nyauk ai.

Lebuh sida lima menyadi deka enggau orang nurun ke babas ngereja nyatu, bala Iban bukai enggai mai sida. Naka meh pengasih tudah laban orang ke enggai mai. Nya alai malu bendar meh sida lima meda orang nyeliah bala sida.

Bala sida tu suntuk bendar laban nadai belanja kena bebelikaka utai sida, kelimpah ari nadai padi dempa. Orang bukai ba menua nya semua nadai deka nulung, tauka mantu sida, siku pan nadai deka nyaup.

”Merinsa bendar ga kitai tu, laban siku nadai meh bala mensia deka nulung, deka ngulu kitai ka babas, tusah ati aku berunding ka tu.

”Tang enda ibuh ga enti sida nadai deka enggau kitai. Uji kitai lima diri menyadi turun ngereja nyatu ba babas. Anang enda nguji meh kitai nyangka ukur bisi ulih,” ku menyadi sida ke tuai, ”

NURUN NGIGA NYATU

Bala sida lima tu lalu nurun deka ngiga nyatu, ngiga kubal. Datai sida di kampung, deka makai tang nadai lauk. Sida lalu nadai betemu enggau jelu, nadai meda burung.

”Enda ibuh, enti kitai nadai bulih babi, nadai bulih rusa, kitai tau ngiga upa ka lauk. Upa pantu, upa wi (rutan), semua tau ambi ka lauk magang. Bala kitai anang milih, asal bisi utai ka lauk aja,” ku jaku menyadi tuai sida.

Sida empat nya sama enda memunyi, laban ke agi mit, lalu bisi meh nya agi takut dalam kampung.

Lama bendar sida menyadi begiga dalam kampung, tang lalu nadai bulih utai apa nama. Sida nadai bulih nyatu, nadai bulih kubal. Upa pantu, upa wi, upa aping ka lauk pan nadai bulih. Perut nyau enda nemu pengelapar, nyau engkerau.

Tusah bendar meh ati sida menyadi, kelebih iya ke tuai laban iya nemu diri udah nadai  nemu chara agi, ni jalai ngidupka diri enggau bala menyadi iya. Perut iya empu nyau asai ke dikeruk empa pengudu lapar. Perening katas, perening kia-kia nadai ga meda buah babas nyangka bisi. Tang dini nya bisi, laban ukai maya buah.

Malam nya sida lima iku diri menyadi diau ba serunggu gaga ari daun, ke digaga menyadi tuai sida enggau berumban sebedau sabung petang. Tegap ga serunggu lalu ulih muat sida lima. Nyadi alai sida ke ngaga serunggu endang dalam puak kampung din.

Menyadi tuai sida nyau mutap-mutap kediri laban ke tusah, sereta irau ati nadai bulih utai dempa.

”Malu bendar kitai tu nadai bulih nyatu. Enti kitai pulai ke rumah, tentu diketawa bala kitai serumah. Tentu rangkai ngeli sida ketawa.

”Nya alai pagila, uji kita empat tinggal ba langkau tu. Nyadi aku tu deka bejalai ke babas ngiga nyatu, sereta lalu ngiga lauk ka empa kitai. Nadai tan enda makai utai,” menyadi tuai sida iya,

Nya meh, hari udah bekau nya, menyadi tuai sida lalu nurun ari serunggu ke babas ninggalka sida empat iku ke biak agi ba langkau serunggu sida.

Seiku iya aja meh ti nemu agi, nya alai iya lalu ngejangka menua endur sida ke belangkau serunggu nya, lalu terus ngelelangka diri kedalam agi ngagai kampung.

TETEMUKA JEREKI

Nyau sehari-hari tudah tuai udah bejalai, tang lalu nadai bulih utai. Iya nadai nemu nyatu, nadai nemu kubal. Upa ka lauk, ni bansa upa, pan nadai ga bulih. Tusah bendar meh ati tudah, hari pan nyau malam. Ni pengirau ati iya ka bala menyadi iya ti tinggal din tadi ke lalu nadai makai utai dua hari ke udah. Tang taja perut iya lapar, nadai ga tentu berasai lemi tulang, laban iya selalu ngirup ai lebuh ke meraka sungai mit.

Hari nyau sabung petang, bisi ga iya berasai ikak, berasai lelak. Tang sempat ga iya mantap daun kayu enggau ramu bukai kena iya ngaga langkau serunggu rumban.

Bala  utai ke udah dipantap iya nya tadi lalu irit iya tunga ngagai pun kayu sekayu, ke alai iya lalu deka belabuh ngaga langkau serunggu dia. Peda iya bisi wi siti, lalu dibatak iya kena ngaga langkau.

Lebuh iya matak wi, dia iya bisi ninga nyawa orang bejaku.

”Apu! Nama utai tu?” ku nyawa orang nya dinga iya.

Dia iya lalu malik, meda bisi rumah orang dia. Lalu ku saut iya, ”Aku tu.”

Udah nya orang ke empu rumah lalu bejaku baru. Ku iya, ”Niki, wai niki! Lalu niki ngagai rumah kami tu.”

Ninga munyi nya, orang bujang nya lalu niki. Datai iya dia, meda rumah orang nya sepintu, selawang aja. Orang dia lalu nyambut iya, lalu ngenah, meri iya makai. Nama agi pengaga ati tudah tuai, perut nyau enda nemu agi pengelapar, tang iya mina makai pemanah iya penyampau, laban ingatka ajar apai seduai indai sida suba enda ngasuh makai mantai semantai enti lebuh baru datai ba bilik orang.

Nyau tembu makai, sida lalu duduk berandau di ruai. Orang ke empu rumah pan lalu nanya pasal pejalai orang bujang nya.

”Aku ke bejalai tu ngiga nyatu, ngiga kubal,” ku Bujang.

”Dini alai bala orang bukai enggau nuan deh?” ku orang nya nanya.

”Kami lima iku diri menyadi, tang sida empat iku tu agi biak, lalu agi beli. Sida iya agi bedau tinggal ba langkau serunggu dili dia. Aku seiku aja meh ke bejalai ngiga nyatu, tang tudah aku tu lalu nadai bulih nyatu. Lauk pan nadai bulih. Bala kami menyadi tu naka penyuntuk, nadai utai dempa.”

Ninga munyi nya, sida lalu bejaku madah, ”Enti pia, anang nuan tusah ati, laban nyatu di menua tu sigi mayuh. Nasit bendar nuan bemalam di rumah tu, laban kami tau ngajar nuan.

”Di ulu sungai tu mayuh bendar nyatu, tanah kiba, tanah kanan bisi magang. Nyatu nya tau diambi nuan magang.”

Gaga bendar meh ati Bujang  ninga  jaku orang madah pasal nyatu mayuh di menua nya.

Nyadi orang nya tadi agi nampung jaku iya baru. Ku iya, ”Lalu nambahka nya tadi, aku tu tuai rumah ditu, lalu aku tu Bunsu Empeliau. Aku nemu menua ditu. Enti nuan deka ninga ka ajar aku, mayuh nyatu ulih nuan ditu ila.”

NGAMPUN PENYAI

Nyadi awakka cherita tu mudah disimpul, sida menyadi lima iku nya amat bulih mayuh nyatu laban nepat endur munyi ti udah dipadah Bunsu Empeliau tadi. Nyau seneka ati milih ni ti deka dikereja dulu.

Kenyau ari nya, sukur sida nurun ngereja nyatu, mayuh bendar kaban deka enggau sida nurun. Menyadi sida ke biak enggai mai orang bukai. Tang ku Bujang menyadi tua sida iya, ”Anang pia, enda manah kitai malas orang ke jai enggau kitai. Awakka sida sama enggau kitai ngereja nyatu.”

Udah nya, sukur sida menyadi nurun ngereja nyatu endang sigi bulih. Semua kaban sida deka magang nitih sida.

Bujang, menyadi tuai sida, selalu bisi mimpi. Lalu dalam mimpi iya meda Bunsu Empeliau madah ka iya, endur menua bisi nyatu, mayuh kubal tau dikereja.

Nya alai sekumbang ke udah nemu alai mayuh bisi nyatu, sida menyadi sereta enggau bala bukai sigi selalu bulih nyatu, bulih kubal.

Sida menyadi lima iku nya enda jai enggau orang bukai baka orang ke jai enggau sida. Tegal pemanah budi sida enggau orang sida bulih utai bulih jereki, lalu idup lantang ari bala orang bukai. Menyadi tuai sida ke benama Bujang lalu dipadu orang nyadi tuai menua nya lebuh iya nyau tuai agi.

Bepun ari Bujang ke udah begulai diau sereta ninga ajar enggau lalau ari Bunsu Empeliau, nya alai bala sida menyadi lima iku, bala anak, uchu ambu ichit wit sida lalu mali Empeliau, nyentukka seharitu. Tebal agi bala peturun Bujang enggau menyadi iya tu diau ba sebelah menua Batang Rajang ulu din.

Oleh TELESA EMPERAN