Cherpan Lalau Pendiau: Nakhoda Sebaginda Bujang Seduai Anak Chuik Keramat

TUSUN KE-1

DISEBUT ensera, kenu ku orang ke beempu, berengkah ari Enchelegit betubuh bisi ka anak ti kedua. Kenyau ari belabuh nyera, Enchelegit tetengukka mayuh macham ikan ulu. Nya kebuah tudah Sebaginda Bujang tak nyau enda belanggang hari turun di ai, ngiga ikan ke sera bini diri.

            Hari siti, mugu hari, Sebaginda Bujang nurun nginti ngagai Batang Panggau ba menua ari ulu pendai sida-empu di Nanga Wung Engkeranguh. Datai iya ba lubuk ti endang ditepat alai nginti, udah ngaitka umpan, iya lalu ngulurka ginti. Dia mih Sebaginda Bujang kenu nginti sepagi-pagi nya nyentuk ke tengah hari. Tang ginti ulur tudah tuai endang tak lalu nadai ikan negu. Meda lalu nadai utai ulih, dia ati iya ka nyida-nyida.

            “Pui! Nyangka tak buta mata ginti tu enda tepedaka ikan mansa. Pajuh nyih ikan ginti tu ulih kita,” ku Sebaginda Bujang mutap munyi Sedadap di teluk kampung, muchau munyi Melanau nimbau barung sambil jari iya nguji-nguji deka matahka baur ginti, meda ginti nya tak sial amai lalu enda bulih-bulih. Enda ga iya nyadi matahka ridan ti ke baur ginti iya nya. Diulurka iya baru. Baka nya baru ga ginti iya, endang lalu nadai ditegu ikan. Baka nya ga umpan, lalu enda puri.

            Engkadah ke langit, Sebaginda Bujang meda mata panas nyau udah ngalih limpas, tang ikan ga lalu enda bulih.

            “Hahaha..haapppp! Pai!” ku Sebaginda Bujang nyidaka diri-empu ke nyau lekap-lekap nguap, ngibun ginti. Liur iya nyau berasai tabar laban ilum pinang ti ke bekal nyau udah abis diempa iya sepagi-pagi nya. Ikan ga lalu enda bulih.

            “Hah! Banggar enda ga perut peruti lintan gerami ikan ditu tak enggai majuh ginti tu. Nyangka enggai ngerujak belut tu! Hah, ila mih aku mai ke kita telu enggau penganan,” ku ransi tudah tuai, ringat meda ginti lalu enda ditegu ikan. Iya nyau berasai irau bendar ati ka diri ke lalu nadai bulih ikan. Enchelegit ke di rumah tentu nganti iya pulai mai ikan dikena mantupka sera.

            Kelama-lama, benung iya bejaku kediri munyi Sebaru dulu ujung, sepi iya tak berenyut baur ginti, asai ti bisi utai narit.

            “Ah! Iya tu! Ikan tu! Lagi asai!” ku Sebaginda Bujang andal. Ensepi utai tak udu asai tarit, iya nguji deka ngejut sereta nyintak, tang mih ginti nya tak enda terangkat ari ai. Tali ginti makin ditarit utai ke dalam ai. Baur ginti makin ngeram ke dalam ai. Tak besai gaya reni ai. Utai ti makai ginti lalu narit iya ke ulu. Perau iya lalu ngikut betanjak ke ulu nitihka tarit utai nya. Sebaginda Bujang nguji narit penapat-inat. Tang tarit utai nya kuat agi ari tarit iya. Suah tudah tuai ka tesugam ke ai laban penguat tarit utai nya ti ari alam ai.

TEKENYIT ATI

            Nyau kira-kira tiga tanjung perau iya udah ditarit utai ke makai ginti ngejangka lubuk ti terubah alai iya ngulur, baru iya tebantaika ginti iya nya ari ai. Lebuh ginti udah tebantai ari ai, tak balat bendar ati iya tekenyit, meda tak ukai ikan ke lekat kating-kating ba mata ginti iya nya, tang tak separai anak chuik. Ga pansut ari ai, dini enda tak nyau muyur-muyur pendiau anak chuik nya basah. Pemadu pemedis ati Sebaginda Bujang dikeduan anak chuik nya ngenyadi nya. Ati iya mega chukup pengelebu, laban ngandalka nya tadi ikan besai.

            “Pui leka mata! Perut dibebas lintan dibuntas nuan tu ke ngayahka aku! Tak amat ku pangka nuan tu lagi ngambika nuan ensepi asai. Aku ke dikemelika nuan enda meiga-iga baka tu!” Lalu dirintaska iya bibir mulut anak chuik alai iya ngulihka mata ginti. Anak chuik nya lalu ditibarka Sebaginda Bujang ngagai ruang perau. Nyau merengek tudah anak chuik.

            “Akai! Pedis aku apai digaga nuan baka tu,” ku anak chuik sambil murus-murus tubuh diri-empu ba sentang ti berasai pedis. “Anang nuan agi nyamah aku ngudu tu, apai.”

            “Chiss! Gamal ke ngenyai nya ngapaika aku. Bila aku enggau indai nuan beranakka nuan?” ku perak Sebaginda Bujang.

            “Enggai-enggai pan nuan, sigi nuan mih diambi aku ke apai. Nuan ga sigi apai aku,” saut anak chuik. “Aram pai, pulai tua. Tupi aku ulih seduai indai.” Serengung jaku anak chuik getar-getar, ukai semina ketegal chelap, tang seraya ke minta dikesinuka Sebaginda Bujang.

            “Chiss! Nama guna aku enggau nuan nyaa!! Dibai gawa, tentu enda tau. Ke empa, tentu enda masuk ba nyawa. Bah, nama guna! Tak semina aku nupi nuan nyadi antu rua.”

            “Anang pia, pai. Tupi mih aku. Ila la, baru aku nulung nuan,” ku anak chuik.

            “Auu, mua ti gamal nuan nya nemu nulung gawa. Enti nulung makai, nemu mih nuan!” ku Sebaginda Bujang.

Oleh PINSIL SARATOK