Cherpan: Pengerindu Bepanga

JANTAN UMBAT

TUSUN KE-5

 “HELLO May. Nama berita? Gaga aku nerima call nuan,” ku Brendan gagit. Dada iya ketap-ketap. Ati iya berasai lelengau. Gamal May tak nyemia di mua iya.

“Dan, aku bisi berita manah. Aku diterima masuk ba IPG Rajang ngambi Kus Pendidikan,” ku May.

“Apu. Manah amat berita nuan. Tahniah May! Kemaya melapor diri?”

Terima kasih.Udah Gawai ila report,” ku May

“Ni pengelama kus nya May?”

“Empat taun”

“Oh sama pengelama enggau kus aku,”

Empat taun ba universiti jampat abis. Brendan bisi pulai dua tiga kali ke menua. Ba taun keterubah bisi dua kali ba taun ke bukai iya enda pulai laban gawa nyambil ba kedai makai dikena ngiga belanja. Nambahka nya, Brendan betemu enggau siku indu ke benama Trish Low ke udu ngeramak ati iya. Trish sama belajar ba universiti nya tang ngambi bidang bukai. Nyau kelama, pengerindu seduai pan nyau beketupang lalu ngujungka nya nyau bebungai. Ba taun ke penudi ba universiti kaul seduai nyau makin rat-serat lalu ngasaika seduai iya enda ulih beserara. Tu ti ngasuh Brendan nyau rindang di Kuala Lumpur lalu ngasuh iya nyau enda berat deka pulai ke menua lebuh bisi peremisi semester.  Kaul iya enggau May nyau bisi tendu-setendu. Nyau kelama tudah May nyau leju betelipon ngagai iya lalu nadai disaut. May ngasaika bisi utai enda ngena, nya alai iya deka ngiga jalai mutarka nya icha kaul nya tau pulai baru.

Brendan mujur ngabiska kus iya lalu pass enggau pemutus peresa ti pemadu tinggi; bulih Ist class degree ba bidang Sains kejuruteraan. Iya ke bendar, iya bisi bulih Anugerah Chancellor. Nya pemujur ti ngasuh iya enggau sida rumah panjai Brendan temegah. Lebuh iya udah graduate, rumah panjai sida berami sekali agi baka iya ke nurun suba. Sida sebilik nirika pengerami makai selamat. Maya nya May bisi peremisi lalu bisi enggau orang begau laban iya empu pan nyau ujung pengawa, iya nya belatih ngajar ba sebuah sekula pegai Sarikei. Maya pengerami enggau udah pengerami May nadai tepedaka tanda Brendan agi nyimpan pengangkunka iya. Taja seduai lama udah enda betemu enggau bepeda mua mata, Brendan tak siga-siga gamal dipeda May. Iya nadai datai ngusung May baka lebuh malam iya deka mupuk empat taun ke udah. Meda utai baka nya, May ngasaika iya deka nyurutka diri. Enda alah tak baka udat nyau ngagai gayung ke ku orang.

Brendan bulih pengawa ba Opis Kompeni Kuasa Karan di Kuching lalu mangku penduduk ke pama pemesai. Trish Low pan udah  mujur bulih pengawa di sebuah bank di Kuching laban iya ba bidang Akaunting. Setaun udah Trish Low datai ba pengidup Brendan, seduai iya Brendan pan ngaga pemutus seduai iya deka jadi melaki bini. Seduai iya ngatur pengerami nikah ti enda besai iga ba sebuah gerija ba indu mengeri nya. Ipah seduai Tuai Rumah Dum bisi datai ba pengerami nya. Brendan seduai Trish Low diau di rumah suwa ba mengeri nya.

Sepengelama seduai ke udah begulai, Brendan lalu enda mujur ngumbuk Trish nemuai ngagai rumah panjai sida Brendan laban madahka menua nya jauh di menua ulu. Brendan berasai tusah ati berundingka danji iya enggau apai seduai indai iya suba. Puas ke berunding, Brendan nguji mai apai enggau indai iya diau di Kuching enggau seduai bini iya.

Apai enggau indai Brendan enda tentu keran ninga jaku Brendan. Seduai iya mayuh kebuah enda ulih diau di mengeri. Keterubah, seduai iya enda teleba diau di mengeri. Kedua, seduai iya berundingka rumah ke ditinggalka. Enti kelalu lama tentu utai tupi nadai nyadi lalu pia mega utai tanam deka mati laban nadai orang ngintu. Enti lada nyau abis mati, utai tupi nyau nadai agi, nya deka nyadi pengerugi besai. Kebuah ketiga, seduai iya balat ensiban ati ka Brendan laban ti ngatur diri bebini nadai betanya ba apai enggau indai. Kebuah keempat, seduai iya tak berasai malu ketegal Brendan ti nadai nanya runding seduai iya bebini.

Betampung…