Bujang Berani Iban II

Tusun Ke-48  

Bujang Berani Iban (Iban Warriors) maya Konfrontasi Indonesia-Malaysia 1962-1966

Sejarah ‘Border Scouts’ Sarawak 1963

Sarawak Rangers “peace keeping force” ditumbuhka  Raja Sir Charles Vyner Brooke lalu dibali nyadi  ‘Sarawak Constabulary ‘ (Polis Sarawak)  taun 1932, tang  diidupka baru dikumbai Sarawak Rangers nyadi Sedadu Kloni British 1941 betuaika  Lt. Col. C.M. Lane  ti ditangkap sedadu Jipun taun 1942.  Iban Trackers ditumbuhka Sir Malcom MacDonald 1948  lalu nyadi  dua pelatun Sarawak Rangers (Bujang Malaya) 1953 ti nyadi Sedadu British (Far East  Land Force – First Elite Force); udah nya lalu  dipasukka ngagai  Malaysian Rangers  taun 1963.


Jeman taun 1963 nya, semina 100 iku aja Iban Trackers ti agi nampung pengawa sida nyadi sedadu di Malaya. Sida bukai badu udah ti ambis kontrak lalu pulai ke Sarawak. Di Sarawak mayuh sida tu diambi Perintah Sarawak gawa nyadi sedadu “Border Scouts &  Police Field Force”  lalu majak tebilang nyadi Bujang Berani  bedengah  munsuh  jeman  Konfrontasi Malaysia – Indonesia 1963 -1965  enggau  perang  komunis  “Rakyat Kalimantan Utara, PARAKU” &  Pasukan Gerilya Rakyat Sarawak, PGRS) taun 1965  ngagai 17 Oktober 1990.

Engka  enda mayuh peranak menua Sarawak tauka Malaysia rebak baru diatu nemu pasal sedadu Border Scouts nyau deka sebaka enggau Iban Trackers; sekeda ari sida tu nadai sekula tinggi; lalu sekeda sebuti ke nemu macha; ukai nembiak lepas sekula tang mayuh ari sida nya endang orang ti udah besai tuai lalu udah bisi ruang bilik. Raban sedadu tu bebida ari Iban Trackers laban raban sida tu ukai semina disereta bansa Iban aja tang mayuh raban pupu bansa Dayak enggau Melayu. Raban sedadu Borders Scouts tu ditumbuhka asil ari kerejasam Perintah Menua Komanwel, Perintah Raja British enggau Perintah Raja Malaysia.

Sedadu Bansa Bumiputera Sarawak

Border Scouts Sarawak tu sebagi ari seraban sedadu bansa Bumiputera Sarawak ti tebilang mantu sedadu Police Field Force, Ranger  Malaysia sereta sedadu Komanwel kenyau ari  perang  Konfrantasi Malaysia –Indonesia taun 1963 – 1965. Raban sedadu Bumiputera tu endang tebilang ba senentang pemerani sida nya nyaga sempadan Sarawak–Kalimnatan.

 Agi ingat pasal sejarah Border Scouts, aram kitai ngenang seiku bansa Raja British ti benama Captain Ben Ellis ti gawa ti Kapit nyadi kepada sedadu Border Scouts taun 1964-1966. Lebih ari 30 iku Border Scouts ti betuaika iya di menua Kapit ti agi siga bendar dikachau sedadi PRAKU maya Konfrontasi Malaysia-Indonesia.

Captain Ben Ellis

Sekumbang ti gawa ti kandang menua Kapit, Captain Ben Ellis suah agi diau begulai enggau Iban di rumah panjai; lalu ngujungka iya landik amat bejaku ngena jaku Iban. Asai ke digenggam belama semengat, ku iya sekumbang ti gawa nyadi sedadu Borders Scouts, maya sedadu PRAKU / TNI Indonesia nguji deka melunggang antara menua Sarawak-Kalimantan lalu nyerang bala Iban di rumah panjai. Pengawa Captain Ben Ellis enggau bala nembiak iya endang seruran meri informasyen ngagai palan sedadu menua Sarawak-Malaysia di Kapit enggau Sibu awakka sida nya jampat datai mantu nyekat penatai munsuh nya.

Perang Konfrontasi Malaysia-Indonesia ti meruan dikenang Captain Ellis iya nya Perang Long Jawi bulan September 1963. Mayuh bala Border Scouts bebadi nyawa maya nya; taja pia, munsuh ti mujur ngalahka kem Borders Scouts maya nya, mujurka diserang sedadu Rangers Malaysia begulai enggau sedadu Gurkha Raja British. 

Operasyen Claret

Kena Perintah British enggau Malaysia nambahka penguat  pengawa sedadu  ti ngetanka menua Sarawak ari  munsuh, taun 1964  seiti operasyen belalai di Borneo ti  dikumbai  Operasyen Claret, 1,500 iku orang ari pupu raban bansa Iban, Bidayuh, Kayan, Kenyah, Kelabit enggau ti bukai diambi nyadi Border Scouts.  

Taun nya sida ti dipilih nyadi sedadu Border Scouts dilatih seraban sedadu British “Special Air Service Regiment (SAS)’ enggau sedadu  ‘Gurkha Independent Parachute Company” awakka sida landik nguna senjata perang ti baru: senapang enggau bom. 

Udah  tembu belatih nyadi sedadu sepengelama tiga bulan, sida pan dianjung  ngayau munsuh sebelah garis antara menua Kalimantan–Sarawak. Raban sedadu tu endang tebal agi ari raban bansa Iban enggau Dayak tu bukai ti mayuh penemu enggau peneleba pasal babas kampung. Nya alai, nadai tentu penusah sida beperang ngelaban munsuh sebelah kampung jerung tauka temuda rimba. Sida mega mudah bekaul enggau peranak menua pesisir.  

(Betampung ba Tusun Ke-49  minggu nyin ila)

Nya mih lansa sejarah pun laya Konfrontasi Indonesia-Malaysia, sebedau aku mai kita begulai enggau Bujang Berani Iban maya ti berambunka nyawa dalam perang nya. Sekeda artikel ti ditulis bansa bukai bisi limpang mimit lalu kekadang enda datai ba menalan.    

Taja pia, artikel tu ukai ga tau nyadi kereban akademik ba sekula, semina tau nyadi kenang jerita tuai Iban. Enti nganti bansa bukai sigi enda, enti ukai kitai empu sapa; enti enda diatu kemaya?  Enti ‘diizin’ Petara cherita tu deka ditulis baru ba bup Bujang Berani Iban, Edisyen Kedua. Sebedau nya, manah amat enti bala pemacah ulih meri komen “kritikan” ambika ulih diadu baru. Engka bala pemacha bisi tanya tauka deka ngirum gambar ti releven ngagai aku tau giga aku ba lumur whatsApp tu: 013 8325146.

Oleh HARRY USUP UMBAR