Cherpan Lalau Pendiau: Nakhoda Sebaginda Bujang Seduai Anak Chuik Keramat

Tusun Ke-2

DALAM Tusun Ke-1 ti udah dikeluarka dalam minggu dulu tu kemari, cherpan tu dilengkaka naka Sebaginda Bujang ti pulai nginti tang nadai bulih ikan ke sera Enchelegit, semina bulih anak chuik. Minggu tu kitai macha tampung Cherpan Lalau Pendiau: Nakhoda Sebaginda Bujang Seduai Anak Chuik Keramat tu dalam Tusun Ke-2.

Kepuas-puas seduai ke besaut-saut, dia Sebaginda Bujang nyau bisi tebatak runding, ninga anak chuik nya tak tau bejaku munyi kitai mensia. Tambah mega ati iya nyau bisi berasai-berasai kasih meda anak chuik nya nyau selalu singut-singut deka nyabak. Lalu tekuing ati Sebaginda Bujang deka mai iya pulai, taja mega tebal agi ati iya bekian, laban nadai nemu tuju nupi anak chuik nya.

“Eh, bai pulai mih. Itah ke ayam Saloi, pama mih,” ku ati iya. Iya lalu ngesaika diri bekayuh, mulaika diri. Ikan nadai bulih. Ke ulih nya semina anak chuik.

Sereta meda Sebaginda Bujang ke baru pulai nginti, dia Enchelegit lalu nanyaka pemulih.

“Eh, nama utai ulih. Nya nyah, ka separai anak chuik nya ke bisi ulih ginti!” saut Sebaginda Bujang.

“Endai, enda kala mih aku ninga chuik diau dalam ai, telah agi ulih ginti,” saut Enchelegit, iran ati.

Raga ti dikena iya nyandik anak chuik diingkaska Sebaginda Bujang ari bau, lalu ditibarka iya ke tengah tikai, di mua Enchelegit.

“Akai, pedis aku apai! Anang bengat ngasar nya mih enggau aku, apai. Nah, indai Enchelegit, intu aku tu. Chelap aku tu indai. Kinduka aku. Beri aku makai. Lapar endar aku tu,” ku anak chuik.

“Landik endar ga anak chuik tu bejaku, apai Duat. Enda kala umur aku tu ninga anak chuik ngelandik tu bejaku, munyi Iban. Tau tupi ulih kitai, ngichaka bisi guna dudi hari,” ku Enchelegit ke bisi pengangkun ati ke anak chuik nya.

“Nya mih, indai. Udah ku besai ila, nemu aku nulung kita sida Aloi,” ku anak chuik bejaku, malik ngagai Enchelegit.

“Nyah, apai Duat. Dinga dih pemereti iya bejaku,” ku Enchelegit.

“Tak aga angkar alai iya yiau, pai. Aloi ka ain ngau iya, pai,” ku Saloi.

Iya apin tentu terus bejaku laban iya endang bansa anakmit ke laun terus bejaku. Iya ngasuh apai iya ngaga ke anak chuik nya sangkar, alai iya diau.

“Ngena lah nya, adi,” ku anak chuik ngadika Saloi. “Ila tua besulu, adi.”

Kasih ninga Saloi senganging deka bayam anak chuik, apai iya lalu ngelalin takang aping ke sangkar. Udah sangkar tembu gaga, seduai menyanak lalu nyimpan anak chuik nya dia.

“Nya baru tau dikumbai apai. Siru amat enggau anak. “Anang enda siru seduai enggau aku. Ukai aku bisi apai indai bukai. Sigi seduai mih apai indai ngadaka aku,” ku anak chuik muji penyiru Sebaginda Bujang.

Iya lalu ringik-ringik ketawa nelengaka rasa ujung dabung, gaga ati laban diri nyau bisi meruan sangkar alai diau. Likun, enda nangika diri diayahka bala mayau ti ngemayuh-mayuh nya ditupi sida Saloi, ke beselegau sebalah-belah bilik nya dia. Suah nungas-nungas mega idung sida mayau ensium bau anak chuik. Ga endang pemakai asal!

“Peda pemeli! Enggai enda ringik-ringik ga untak! Ngipakka anak penyai gamal!” ku tengir Sebaginda Bujang, ensiban ati laban nyangka anak chuik nya ngelese sida tiga menyanak.

“Anang tak bejai pangan di mua mata munyi nya, apai. Ila lusa, jam suntuk sendat, nyangka bisi ga maya kitai nguna tulung pangan,” ku anak chuik sambil tuchum lelegup. Iya enda mudah ringat, kenu ku gamal.

Laban Apai Saloi ke lalu enda bulih nginti, dia Enchelegit nyau rapas sera. Ketegal nya, pendiau iya lalu enda tentu nyamai. Selalu tabin bebirin enda nyamai, galak renga pedera pansa utai. Bulu iya selalu nyeregu enda rajin ke ai. Nyawa enda tentu masuk makai asi. Kadang-kadang tak nadai nyuap seleka asi iya besehari-sehari laban nyawa nadai au deka makai. Lalu isi iya berupai muai-semuai.

“Nadai penyadi kitai tu Enchelegit, ti nuan tak majak tabin bansa nya. Nya mih tak mati padi mati rumput kitai tu ila. Sapa ke mekuh ruang bilik, nya baka kitai di Panggau tu enda lama agi deka gawai burung dibai sida akan Keling. Sapa ke beribun, nya baka Saloi nya apin tegar nitihka aku turun kiba kanan. Nya baka ngintu anak chuik keparat nya! Sapa ke ngetau. Nya baka padi di umai nyau repi. Padi enggi orang kitai serumah tu udah tebantai magang ari umai. Engkitai diketau dih apin. Nya alai aku tu tak mati runding, Enchelegit. Tak nyau tusut diri gelung perut aku tu meda nuan ke selalu tabin baka nya, nyau baka bunga ke layu di pala ti ku pantun jaku tuai. Enti ulih bai-bai, anang nuan tak betat enda ati bebela baka nya. Itah sesuap dua pan pama mih, ke tungkat tulang. Enti nuan tak majak masarka diri enda makai baka nya, nyamai agi aku angkat ari rumah tu,”  Sebaginda Bujang.

Betampung…