Pengerindu Bepanga

TUSUN KE-6

IYA ke bendar sida serumah bisi nemu apai enggau indai iya udah bisi buya jaku deka nanya May ke bini Brendan. May pan kala diisik indai iya pasal nya. May madah enti orang bisi nanya nadai ga ngelaban runding apai indai. Diatu tak enggai nyadi sekali, ku May. Enda alah tak semina ikak lelenggak ikan enda ngaban, kudi memuri hari enda ujan.

Puas ninga umbuk Brendan, apai enggau indai Brendan setuju deka nguji tang ku runding seduai iya, ukai lalu diau din tang deka nemuai aja. Seduai pan nurun tang balat bekian. Lebuh seduai datai din, enda mukai-mukai Brendan bisi diasuh orang nyaga projek ba endur bukai di menua pesisir lalu Brendan enda ulih berundang ari Kuching. Ketegal nya, indai enggau apai Brendan diau ngulai menantu seduai iya nadai Brendan. Ba minggu keterubah agi nadai apa-apa utai nyadi. Nyau ba minggu ke kedua, Trish nyau ditemu mentua iya enda makai di rumah. Indai Brendan ensiban bendar laban jelekah menantu iya baka nya. Seduai iya apai Brendan berasai enda betah.

Sepemulai Brendan ke Kuching, iya nemu indai iya enggau Trish nadai betegur, nadai bejaku. Iya ke bendar seduai iya kala belaya. Trish nusui ngagai Brendan mentua indu iya masuk champur ba hal ruang bilik seduai iya. Ku indai Brendan, bini Brendan balat enda bebasa sereta enda rinduka seduai iya apai Brendan diau enggau seduai iya dia. Brendan abis akal sereta nadai daya, abis kira; enda nemu jalai ngatur penusah nya. Puas ke baka nya, Trish nyau pansut jaku madah ngagai Brendan ngasuh iya milih, iya enggau bini iya tauka ngarika indai iya. Brendan nyau baka kena banchak sangkuh aduh anang, diasur pedis, ditarit pan pedis. Tak baka ke makai buah ilang ilu, ditelan mati apai dilua mati indai. Baka ke duduk dijagul tuga, bediri terentuk pala. Nama penyadi baka tu?

BUNGAU NGELU PALA

Brendan ngasaika iya nyau bungau udu ngelu pala. Tu dih gaya pengerindu iya ke bepanga; pengerindu ke bini engau pengerindu ke apai indai nambahka pengerindu ke May ke tak nadai penunga. Kati ku iya ngelekaka bini lalu kati ku iya enda sinuka apai indai? Tusah laban pengerindu bepanga baka tu ku iya abis runding, nadai daya nadai kira. Kati ku iya tak ngelengkaka tudah May baka ke muai perinsai gari raga, dibuai sebarang alai dilengka sengapa pia?

Nyau ba ujung hari, Brendan enda ulih pulai ke menua lalu lama nadai pulai. Iya beasai malu pulai tambah mega iya nyau belidar gawa ke Semenanjung. Apai seduai indai iya tak ngair kediri ba umur tuai. May udah mujur nyadi pengajar lalu nadai penanggul mindah ke ulu ke ili laban iya agi rumpas. Semina ati iya balat telih digaga Brendan baka nya. Kenyau ari sekula primari datai ke tembu sekula sekondari seduai iya udah meram pengerindu tang diatu pengerindu nya lela baka ambun ti nyelempepai dipanchar mata hari. Puas ke bekenang enggau indai iya ke ditemu iya nyabak lebuh ngenang cherita May. Indai May kala nengah jalai ke sama. Indai iya, Endun madahka diri kala dikeduan apai Brendan kelia. Cherita indai iya, Dum ukai sengaja deka ngelekaka iya tang laban bisi penyaru niang aki sida Brendan suba, Penghulu Semiat ke ngasuh Dum rari ari menua lalu tepejuh ngagai menua orang. Nya ti ngujungka Dum betemu enggau Ipah. Diatu May seduai Brendan pan enda ga mujur laban Brendan ngembuan pengerindu ke bepanga. Asai ke bisi munyi telai ba pending Indai May ti bemunyi pisang bebuah dua kali. Nemu indai iya asai ati May.

Oleh JANTAN UMBAT