Nakhoda Sebaginda Bujang Seduai Anak Chuik Keramat

Tusun Ke-3

MINGGU tu kitai macha tampung Cherpan Lalau Pendiau: Nakhoda Sebaginda Bujang Seduai Anak Chuik Keramat dichelak dalam Tusun Ke-2 ba minggu dulu tu kemari.

“Ditu pan nadai mih guna, ga nuan nadai mendingka ajar aku,” ku Sebaginda Bujang ngamang bini iya enggau penemu. Ati iya tusah meda Enchelegit tak rindu betat enda bebela ketegal rapas sera.

        “Nyawa aku tu ke tak nadai tetenguk ke asi,” saut indai Duat.

        “Utang nuan rapas sera kini?”

        “Tentu nadai nya kebuah bukai, lapa sejeman-jeman tu aku nadai kala ninggalka bul makai,” saut indai Duat, ngemerayaka diri.

        Sebaginda Bujang lalu belabuh nukik Enchelegit pasal bansa pemakai ti balat diketengukka iya kelimpah ari ikan ulu.

        “Angka bisi tetengukka pemakai bukai, ga ikan enda alah giga dih, wai.”

        “Tetengukka ikan, nyau numbas agi nyawa aku ke sepiak bulan tu,” saut bini iya.

        “Bah, nama bansa sera ti dikinginka nuan endar? Padahka dia mih wai. Tak sebarang daya mih aku mai sida aya sida ibu begiga kulu kili enti enda alah giga aku kediri, enggai mih aku nejuka nuan enda dapat baka nya. Nangika aku-empu tu ila sakit kepuas ke meda nuan baka nya dih!.”

        “Chukup sanggu mulut tu nyebut pemakai ti diketengukka nyawa, laban nyadang utai nya tusah digiga. Ila, enti nuan enda tegigaka sera aku, disebut aku sengapa, semina tak ngemunika diri-empu ga.”

        “Enchelegit.. Enchelegit, nuan tak lap tuai. Udah ga disebut, baru temu ulih sekalika enda digiga. Nama utai dikenangika nuan nelah bah. Nadai nya utai dipelalaika. Laki nuan aku tu! Ukai tak orang bukai. Iya lapa nuan, tak baka ke enda ngelala Tambap, ke ditelah orang Sebaginda Bujang tu! Belum dicuba belum tau!” ku Sebaginda Bujang sambil nempap-nempap dada diri.

NYERA KE BUAH RABA RAMANIAH

        “Enti udah munyi nya chakap laki sulu ati, enggai-enggai pan ku sebut mih.”

        “Endai, sebut dia mih!”

        “Tak nyera ke buah raba ramaniah aku tu, orang tuai,” ku Enchelegit.

        “Apu apai! Apu indai! Dini-dini ga alai ngiga buah raba nama nya. Ya aku siku, anangka nemu alai raba nya tumbuh, agi buah raba nama nya dih aku bedau kala ninga. Tu parai aku dikeduan nuan, Enchelegit. Lain sera orang, lain agi ga sera nuan. Keruan!” ku Sebaginda Bujang sesetengah nyida.

        “Aku pan enda mih nemu menua ti alai orang bisi nanam buah raba ke nama nya, Tambap.”

        Ninga randau seduai iya, anak chuik ke dalam sangkar lalu nyangking. “Ba menua Raja Sedinang Indu di pusat ai din baru bisi buah raba ramaniah, apai.”

        “Nah, dinga pemandai mulut separai anak chuik nya mantaika pemula iya. Enda meletup iya nya. Kemaya nuan kala kin ke, alai nuan nemu buah raba nya bisi din!” ku Sebaginda Bujang nengir anak chuik.

        “Aku amat enda kala kin, pai. Tang pia ku kenang orang ke tuai,” saut anak chuik.

        Ninga penemu anak chuik nya tak munyi ti bisi pengamat, dia Enchelegit lalu ngansak Sebaginda Bujang nurun begiga kin ke.

        “Bekeni kati pan nuan majakka aku Enchelegit, enda mih aku nurun. Ukai aku enggai. Tang aku enda nemu jalai ke tasik luar kin ke. Ka nuan mati enda chukup sera, enda mih aku mansal diri. Enti nurun ukai utai, sigi nganjung diri-empu parai. Nama rega!” ku Sebaginda Bujang.

        “Enti udah munyi nya penemu nuan, anang ga mih diri nurun, ni alah nuan tak nganjung diri-empu parai. Lakka aku ga mati. Ukai nya tak munyi bebendai ga tanah alai numbakka bangkai aku.” Enchelegit lalu singut-singut ngenyabakka diri.

        “Nadai utai ti ngumbang nya dipetalatka seduai ngenyadi nya dih, apai, indai. Ga tak nurun, ngiga nih, pai. Iga ga nuan takut tak baka ke ukai anak lelaki. Enti enda berani kediri, ila aku nguluka nuan,” ku anak chuik, ngerara belit Sebaginda Bujang seduai Enchelegit.

“Mulut aja ti lebih-lebih,” ku Sebaginda Bujang ngenchakka anak chuik. “Nama nuan kala mindah kediri! Nemu nuan jalai ke pusat ai kin, ku ati nuan? Jalai taruh ka nemu, tang nama ke dikena kin dih? Nama nuan ulih betensang lubang idung nyemerai meraka tasik kin!” ku perak Sebaginda Bujang.

        “Enda ibuh merak bejaku, pai. Enda nyamai ninga. Ga kami duai indai tu sama enda bengal,” ku anak chuik. “Ti pasal utai dikena kin, nya nadai nanggul. Ga gari perau ti dikena nuan nginti di pendai dia, tau mih dikena. Anang betegal iga. Ti nganti ngena kapal, badu enda nadai jalai mih, pai. Ukai baka kitai ke bisi kapal baka Raja Merom. Ka tua ngajih, tua enda ga tau ajih baka sida aya Keling.”

        “Dinga pemalui!” ku Sebaginda Bujang nerengak anak chuik. “Kati ku nemu ngena gari perau ngemit nya. Tepan siku dah meilup-ilup ka karam. Kati ku nemu ngayuh nya ke tasik luar kin bah!!”

        “Enda nya mudah karam dih, pai. Anang ngemba diri munyi nya. Peda nuan ila. Enti karam, enda baka tua ke enda nemu nyemerai. Nama dih apai, nuan enda nemu nyemerai?” ku anak chuik sesetengah ngelese.

        Nyau kemayuh kelikuh, baru Sebaginda Bujang nyanggup bekian ngiga buah raba ramaniah ke sera Enchelegit.

Betampung…

Oleh PINSIL SARATOK