Biring Gerunggang Cherpan:

TUSUN KE-1

MALAM udah tegeram lama lemai, rumah panjai nyau udah sunyi.  Semina dua tiga iku agi orang bisi di ruai. Uchak seduai Enchabuh benung betekibing megai telipon binching. Kadang-kadang telipon nya dipandalka ba pending awakka ninga jaku orang ke dia. Telipon nya nampak diasuh ba mode enda inggar enggaika ngachau orang ke udah tinduk.

        Skrin telipon Uchak bisi ayan panchar lampu ba telipon nya empu. Telipon bisi bemunyi tang enda inggar. Beguai-guai Uchak  nyaut sambil ngenyemakka telipon nya ngagai pending kiba iya.

        “Kati nya kumpum nya pagila? Kati ku permit dih?” ku telai Uchak.

        “Kumpum bisi. Pasal permit nya nadai ngawa. Udah diatur ku Ajuh? Kati Tuai Rumah udah nyain lebuh nya?” ku munyi orang ba telipon.

        “Udah. Kami dua Enchabuh nyuaka nya,”

        “Kati nadai mayuh jaku iya?”

        “Keterubah iya enggai mih. Mayuh jaku iya. Enggai iya ke batang tang udah iya meda sarung surat nya tak nyau entepal nyau bebali ga ati iya,”

        “Manah la nya. Au betemu pagila,” ku orang nya. Telipon lalu munyi tekelup tutup.

        “Okay kumpum Abuh. Jadi pagila,” ku Uchak nguing ngagai pangan iya Enchabuh. Gamal seduai bela gaga. Rerising dalam petang.

        “Enti baka nya, manah mih. Gali tua,” ku Enchabuh ke lalu mulaika diri ngagai ruai iya empu.

        Udah Enchabuh pulai, Uchak lama ga di ruai. Semadi nyau berasai chelap lebuh ambun malam nyau udah mampu dunya iya mulaika diri ke bilik.

        Di bilik lama ga Uchak enggai tinduk. Balat agi iya nguji deka nindukka diri, nyau mayuh agi ga runding iya datai. Jaku sida iya enggau Tuai Rumah Apung minggu nyin suba nyau lepung-lepung bemain ba ruang pengingat Uchak.

        “Bisi pejalai kami dua Enchabuh tu Tuai Rumah.”

        “Tak jampat aku nanya, nama pejalai seduai nyau jauh lemai tu dih Chak?”

        “Nya mih. Tak salah gaya kami dua punggal Enchabuh. Laun datai ari pasar. Ditu bisi surat diasuh sida sain nuan Tuai Rumah. Sida ngasuh kami dua nganjung tu,”

        “Nama pekara nya? Lapa sida enda ngasuh aku empu datai dih?”

        “Nya enda aku nemu. Ninga kami dua diasuh nyua surat nya, nya ga dititih kami dua,” ku Uchak sengaja apin neruska batang pejalai seduai iya Enchabuh.

        “Baka tu cherita iya aya Tuai Rumah. Sida iya ngasuh nuan nyain permit minta nyabung di Kelang Tinting Mikai dia,”

        “Apu ni nya deka nyadi baka nya? Tuan D.O. orang nyain surat peremit nya enti enda Tuan Residen,” ku Tuai Rumah.

        “Nya amat, aya tang nyangka tu beguai alai iya baka nya kini. Ku sida nyabung tu tau laban sabung ngelasi menua laban Covid-19 ku sida. Bisi aku ninga  sida nyebut nya,” ku Uchak.

        Uchak lalu mansutka pom  lalu ngayanka endur alai Tuai Rumah sain. Lama Tuai Rumah beratika borang. Udah nya iya lalu ngasurka keretas nya. Ati iya buar nemu pengawa nya salah.

        Tusah bendar ati Uchak seduai Enchabuh meda gamal Tuai Rumah. Seduai iya lalu bejeling pangan diri. Udah nya Uchak mansutka sarung surat ti nyau entepal nya ba tengah tikai ba mua Tuai Rumah.

UCHAK NGUMBUK TUAI RUMAH

        “Enda aku nemu bejaku lebih ari nya. Kami dua tu semina ngenataika jaku orang di opis din. Tau ga nuan berunding aya. Ba dalam sarung surat nya pama bendar nya aya,” ku Uchak bisi nempa jaku.

        Lama ga sida enda bemunyi tang mata Tuai Rumah udah lekat ba isi sarung surat nya. Ku orang di ili din tu enda baka duit pemansang ti patut ditemu komiti. Tu utai luar. Tuai Rumah, enti nuan irauka pekara nya,” landik Uchak ngumbuk Tuai Rumah.

        “Ku runding aku, manah nuan ngambi peluang tu, aya. Tak sain nuan surat nya. Pagila nya disua ngagai bala Polis enti sida ulih datai laban sabung nya minggu dudi,” ku Enchabuh nampung penerang Uchak.

        Uchak lalu ngambi sarung surat nya, narit jari Tuai Rumah lalu nepu sarung surat nya ba tapa jari Tuai Rumah nya.

        Gamal Tuai Rumah tak bingung tang jari iya udah lekat ba sarung surat nya. Uchak ngambi siti pen lalu nyua nya ngagai genggam Tuai Rumah. Tuai Rumah pan lalu nyain nama iya. Keretas nya dilipat Uchak lalu disua iya ngagai Enchabuh ke lalu nyimpan nya ba beg kandi apis iya.

Betampung …

Oleh JANTAN UMBAT