Bujang Berani Iban II

AUM PERANG… Bujang berani Iban seruran landik beperang dalam babas kampung.

Tusun Ke-50  

Iban Trackers & Border Scouts  maya Konfrontasi Indonesia-Malaysia 1962-1966

DUA hari udah kayau ngenyit sedadu Gurkha nya, kena 3 Oktober 1963, bala sedadu Police Field Force begulai enggau Malaysian Rangers mujur munuh 16 iku agi sedadu Indonesia maya ti betempuh dalam kampung. Sehari udah nya kena 4 Oktober 1963, kayau sedadu Malaysia mujur bebalas lalu munuh 10 iku agi sedadu TNI Indonesia.

PERANG BEDARAH LONG JAWI

Perang bedarah Long Jawi endang tebilang  agi dikeingatka rayat Sarawak datai ke sehari tu. Nya mih keterubah kayau besai sedau Indonesia ti betuaika Lieutenant Mulyono Soerjowardojo ari menua Nangabadan di Kalimantan taun nya. Taja sedadu TNI Indonesia ti dibantu Komunis PARAKU-PGRS mujur ngalahka palan Borders Scouts di menua Orang Ulu nya, sida tetap alah dalam kayau lus udah nya.  Sida ti nyengala ditemu mati iya nya 52 iku. Sida ti bukai balat bakal lalu mati  merinsa dua tiga hari udah nya. Nadai seiku sedadu PARAKU tauka sedadu Indonesia mujur mulaika diri datai di tanah Kalimantan. Nya mih upah mensia ti berani dulu mungkar nanjar orang bukai.

Ari tanah Sarawak, Malaysia, sida ti mati berani ba Long Jawi nya 11 iku sedadu Borders Scouts, seiku Gurkha, seiku Police Field Force mati berani. Kenu ku Captain Ben Ellis (1964), munsuh ari Indonesia nya endang udah dua hari belalai di menua nya tang enda ditemu bala Borders Scouts. Ubang Kasau nya seiku ari Borders Scouts ti selamat ari kayau munsuh maya nya tang udah parai tuai taun 2006.     

Nya mih, lansa Perang Long Jawi maya Konfrontasyen Indonesia-Malaysia 1963. Ari cherita pandak nya, nama ‘moral of the story’ ti patut nyadi ke ajar, teladan tauka pesan ngagai bansa Dayak bansa Iban di Sarawak?

OPS CLARET-SAS AUSTRALIA, NEW ZEALAND

Australia enggau New Zealand ti meruan betuaika Perintah Raja British Queen Elizabeth II tebilang nguna sedadu Border Scouts / Iban Trackers nyadi pengiring sereta penyidi bekau munsuh.      

CLARET nya nama kod operasyen ti diatur Sedadu British ti betuaika Major Jeneral Walter Walker berengkah ari Julai  1964 ngagai 966  jeman  Perang  Indonesia-Malaysia. Operasyen tu ngembuan sedadu “Special forces” ti ngayau munsuh ke deka meluggang garis menua Sarawak tauka  Sabah. Tuju raban sedadu tu iya nya ngiga sereta meratika munsuh ari sedadu Indonesia ti deka ngayau menua Sarawak enggau Sabah. Tanggung pengawa sedadu dalam CLARET iya nya ngumpul informasyen lalu nyerang  munsuh. Raban sedadu ti begempung nyereta operasyen tu iya nya sedadu menua Australia, British Gurkha sereta New Zealand  ti tebilang ngembuan ‘The World Best Iban Trackers” maya nya.

Sedadu Raja British bisi tujuh batalion ti ngembuan  sedadu Gurkha nambahka dua batalion Police Field Force enggau 1,500 Border Scouts. Genap batalion bisi siti seksyen Skuad Sedadu Mortar 3 sereta  senapang Amalite AR  ti bejalaika pengawa nginau kandang garis menua Kalimantan- Sarawak. Suah mega bala sedadu nya  diulur ngena tali ari bilun helikopter enti nadai padang endur terengkah. Enti gaya bisi bekau munsuh ari Indonesia nya tama menua Sarawak bala Border Scouts tauka Iban Trackers diasuh nyidi bekau munsuh nya.

Sedadu ari skuad ‘Special Air Service’ (SAS) semampai begunaka Border Scouts Sarawak mantu sida maya ti nginau musuh. Amat sedadu Iban, Dayak nya ukai sedadu ti chukup latih tang sida nya ngembuan penemu enggau pengelandik nyidi bekau munsuh dalam babas kampung. Sedadu Gurkha British mega begunaka Border Scouts lalu diberi tanggung pengawa ngelatih sida.     

Taun 1964 sedadu skuad SAS bulih pemendar melunggang garis menua Kalimantan-Sarawak; lalu disebut CLARET Operations. Terubah iya, pengawa nginau munsuh disekat semina tiga kilometer aja ke sepiak garis menua nya, tang udah nya lebih 20 kilmeter. Raban SAS semina empat iku aja ti diberi tanggung pengawa baka komando deka nentuka endur ti bisi genturung pendiau rayat sereta  palan tauka kem sedadu munsuh. Enti ulih diseliahka, skuad SAS ti beraban mimit   enda nyerang munsuh ti dipeda sida dulu ambika sida ulih bepadah lalu ngayau munsuh ti udah dipeda sida nya bebala mayuh.

Seiti ari kayau keterubah Operasyen CLARET  iya nya maya bulan Ogos 1964  ti  dipelajaika sedadu British 1/2 Gurkha Rifles ti bepalan di Bagi Menua Limbang, Sarawak. Nitihka pansik sedadu SAS begulai enggau Border Scouts, munsuh lama udah bepalan ba Nantakor di Kalimantan urung dua tia ribu ela penyauh ari  palan sedadu Gurkha nya. Kayau sedadu Gurkha nya mujur  munuh lalu muru munsuh ari kem sida nya.

Ba bulan Januari 1965, Sukarno mai menua Indonesia pansut ari gerempung Antarabansa (PBB, UN) lalu begempung enggau menua Komunis China “The People’s Republic of China”. Nya ti ngasuh iya makin berani nganjung sedadu iya ngayau ke Sarawak sereta Malaya (Malaysia).

PERANG SUNGAI KOEMBA

Kayau skuad SAS Australia keterubah ngelawa Kalimantan iya nya kena 24 Mei 1965 ti disereta dua pelatun, 5 enggau 11 Platun ari B Company ti bepalan di Bukit Knuckle di Serikin, Bau  begulai enggau seraban sedadu Borders Scouts / Iban Trackers. Kayau ti betuaika Major William Broderick bejalaika pengawa nginau munsuh ti dipelaba udah sedia ngaga pelin deka nyerang menua Bau, Sarawak.  Maya ti nginau nebing Sungai Koemba di Kalimantan, sida bisi tetmuka bekau munsuh. Pagi  26 Mei 1965 seraban empat iku sedadu SAS ti betuaika Lieutenant Patrick Beale tetemuka seraban sedadu Indonesia enda jauh ari sida empat nya. Bala munsuh nya dipelabaka endang bepalan enda jauh ari nya, kelai sida chapuh munyi bejaku lalu nimbak utai, engka jelu kampung, kini? Sida enda nemu diri ti dikemataka bala sedadu SAS Australia nya. 

Pagi hari siti, Major Broderick mai bala sedadu iya pindah ke baruh bukit ambika ulih ngaga palan ti tegap agi. Maya nya mega iya ngasuh Lt Beale mai  5 Pelatun sedadu mansang semak agi ngagai palan munuh. Sida mai senyata empat iti 7.62 mm L4A4  “Bren light machine-guns”. Enda lama udah nya sedadu SAS Australia nya tetemuka jalai mensia enda jauh ari tebing Sungai Koemba nya. Maya nya sida bisi ninga munyi nyawa mensia bejaku. Ngasaika munsuh makin semak Lt Beale mechahka pelatun iya ngagai dua raban. Seraban meratika jalai ngena dua iti  Bren Gun. Seraban da agi ngipa ba tanjung sungai nya. Maya nya Private Lawrence  Jackson diasuh nyadi senteri sepiak kanan lalu meratika penatai munsuh

Chun-chun pukul 11:32 pagi, udah ti tembu ngatur endur diri urung 40 minit, sedadu SAS nya ninga bunyi injin sepit datai ari ili. Dua buah langkan pemesai 10-kaki ti beinjin pan datai semak-sesemak. Sebuah perau langkan nya ngundan lima iku sedadu Indonesia ti ngena uniform sereta disikap ngena senyata. Siku ari sida nya, Orang Putih ti dipelabaka Paderi bansa Belanda. Perahu munsuh pan nyau semak kurang ari 35 meter, Pelatun  Lt Beale  pan  merejin munsuh nya ngena Bren Gun enggau senyata automatik. Sebuah perahu karam, sebuah da anyut  nadai  orang nepan dalam nya. Dua iku munsuh dipeda nyemerai ke tebing tang mati ditimbak baka sida lapan iku ke bukai nya mega. Dua buah perahu da ti entudi pan datai. Perau ketiga diperejin Private Jackson lalu munuh kesemua lima iku munsuh dalam perau beinjin sepit nya. Perau keempat berumban sangkai ke tebing tang  lalu diserang Jackson ngena dua igi bom tangan.

Enda lama udah nya urung 10 iku sedadu Indonesia ti udah sangkai nya malas serang SAS Australia. Lt Beale mai bala iya nyurutka diri  ambika ulih bepadah ngagai sida bukai dalam B Company nya.  Lemai nya semua sedadu Australia  selamat datai ba kem di Bukit Knuckle. Baka ke baru pulai mandi. Sida mujur bedengah enda kurang ari 15 iku munsuh. Malam nya Radio Indonesia naburka berita pasal 23 iku sedadu PRAKU / TNI Indonesia ti parai tegal ti enda sengaja ditimbak maya sida belatih di Sungai Koemba. Private Jackson diberi ‘Milatary Medal’ tegal pemerani iya maya perang nya. Lt Patrick Beale nerima ‘Military Cross’ tegal pemujur sereta pemerani iya nyadi tuai kayau mya nya.

                             (Betampung ba Tusun Ke-51  minggu nyin ila)

Nya mih lansa sejarah pun laya konfrontasi Indonesia-Malaysia, sebedau aku mai kita begulai enggau Bujang Berani Iban maya ti berambunka nyawa dalam perang nya. Sekeda artikel ti ditulis bansa bukai bisi limpang mimit lalu kekadang enda datai ba menalan.    

Taja pia, artikel tu ukai ga tau nyadi kereban akademik ba sekula, semina tau nyadi kenang jerita tuai Iban aja. Enti nganti bansa bukai sigi enda, enti ukai kitai empu sapa; enti enda diatu kemaya?  Enti ‘diizin’ Petara cherita tu deka ditulis baru ba bup Bujang Berani Iban, Edisyen Kedua. Sebedau nya, manah amat enti bala bala pemacha ulih meri komen ‘kritikan’ ambika ulih diadu baru. Engka bala pemacha bisi tanya tauka deka ngirum gambar ti releven ngagai aku tau giga aku ba lumur WhatsApp tu: 013 8325146.

Oleh HARRY USUP UMBAR